Sambilisheni Bambi Fintu Lesa Afwaya
1 Abantu abengi abo bapusulwa lwa ku mupashi “ukuumfwe cebo ca kwa Yehova,” kuti basangwa na nomba line. (Amose 8:11) Ilintu bamo basumina ukuti Lesa e ko aba, tabaishiba imifwaile yakwe ne fifwaikwa. Muli ifyo, tulekabila ukubasambilisha icine ca Bufumu icipeelo bumi. Nga twaipangasha no kuipekanya bwino ku kushimikila inshita iili yonse, kuti twasanga abalefwaya ukusambilila cintu Yehova afwaya.
2 Mu April na May, tukakwata bamagazini ba Ulupungu lwa kwa Kalinda na Loleni! aba kwananya aba pa nshita yalinga. Mu kulundapo, pa muku wa kubalilapo, tukashalika broshuwa wa Cinshi Cintu Lesa Afwaya Kuli Ifwe? Ifikope fya uko ifya kucebusha ne fipusho fya kufwailisha umuntontonkanya filenga uyu broshuwa ukucebusha abantu abengi. Imitubululo ikonkelepo naipeelwa ku kutwaafwa ukubomfya bwino nga nshi impapulo shesu ishawamisha.
3 Ukufwaya Abantu: Mu ncende umushiba abantu abengi lintu tuleshimikila ukufuma ku ŋanda ne ŋanda, cileba ica kunonsha apakalamba ukufwaya abantu ukuli konse uko bengasangwa no kulanda na bo. Ica mu kati ca Ubutumikishi Bwesu Ubwa Bufumu ubwa September 1996 catukoseleshe ukushimikila imbila nsuma ukuli konse—pa musebo, muli bamotoka ba cintubwingi, na mu maparka, umwa kwimika bamotoka, na mu fifulo fya bukwebo. Na kabili catulengele ukwibukila ukuti tulakabila ukusanga inshita ya kushimikila ubunte bwa mu lyashi fye. Ku ca kumwenako, nkashi painiya aile ku cifulo batambilako inama na bamagazini abengi aba Loleni! wa August 8, 1996, uwakwete amalyashi yakonkana ayalelanda pa “Ifilengwa na Lesa.” Mwi awala fye limo, ashalike bamagazini 40 ku bantu batemwa inama! Mwatunguluka shani ukufika ino nshita mu kushimikila imbila nsuma ukuli konse? Ulupungu lwa kwa Kalinda na Loleni! capamo na broshuwa wa Cintu Lesa Afwaya fyaliba ifyalinga nga nshi ku kushimikila kwapusanapusana, pantu mwaba ifyebo ifyambukila ubumi bwa bantu no kubacincimuna mu kutontonkanya.
4 Ukutendeka Ukulanshanya: Ibula lya kulekelesha ilya Ubutumikishi Bwesu Ubwa Bufumu ubwa October 1996 lilondolola ifyebo pa lwa fya kupekanya inshila ya kulandilamo iya pa lwenu ilyo muletambika bamagazini ba Ulupungu lwa kwa Kalinda na Loleni! Imitubululo imo ine kuti yabomba bwino nga nshi lintu mulepekanya inshila ya kulandilamo pa kushalika broshuwa wa Cintu Lesa Afwaya. Kuti twasosa amasentensi fye ayanono nelyo ukulefyako pa kusanshako Ilembo. Calicindama ukusala amashiwi ya kutendekelako mu kusakamanishisha, apantu kuti yapima nampo nga umuntu mulelanshanya nankwe kuti atwalilila ukukutika nelyo iyo. Bamo balitunguluka ukubomfya aya mashiwi ya kutendekelako: “Nalibelengele icipande icankoseleshe nga nshi, kabili kuti natemwa ukumushimikilako.” Nelyo icipusho ca kulenga ubuseko kuti caipushiwa ku kusanshamo umuntu umbi mu kulanshanya.
5 Ku nshila intu mulebomfya iya kulandilamo uno mweshi, nakalimo kuti mwaesha ukusanshako ifipusho ukupala ifyakonkapo, nga ca kuti nafilinga mu ncende yenu:
◼ “Ilelo tulamona ifilembo ifingi, ifisooso, no kukowela. Cinshi cikafwaikwa ku kuwamya isonde no kulilenga ukuba icifulo cawaminako ica kwikalamo?” Lekeni asuke, e lyo mutile namukwata ifyebo ifyo fitwebekesha inshila isonde likabelamo ibala lya mwi sonde lyonse na lintu ico cikacitika. Landeni ifyebo fya kulungatika, ilembo ilipi, ne cikope cabalabata ukufuma muli magazini wa ndakai, e lyo mutambike magazini ku muntu pa kuti engalabelengamo. Londololeni inshila ya kulembeseshamo bamagazini. Ilyo mushilaleka ukulanshanya, esheni ukupangana pa kuti mukatwalilile ukulanshanya pa nshita imbi.
◼ “Bushe muletontonkanya ifyo Lesa afwaile ukuti tuleikala na mafya pamo nga ya tulepitamo ilelo?” Pa numa umuntu ayasuka, kuti mwatila: “Ukwabulo kutwishika mwalishiba ipepo ilyo Yesu asambilishe abakonshi bakwe ukupepa, ukulomba Ubufumu bwa kwa Lesa ukwisa. Bushe mwalitontonkanyapo pa cintu Ubufumu bwa kwa Lesa bwaba mu cine cine?” Alukileni kwi sambililo 6 muli broshuwa wa Cintu Lesa Afwaya, no kubelenga ifipusho fipushiwe pa kutendeka kwe sambililo. Lyene, ilyo mulebelenga paragrafu 1, londololeni icasuko ca cipusho ca kubalilapo. Londololeni ukuti ifipusho fyashalako filasukwa mu nshila iipi ukupala iyi ine. Tambikeni broshuwa, kabili ipeelesheni ukubwelelako na kabili ku kulanshanya ifyebo na fimbi pa lwa Bufumu.
◼ “Abantu bapelulula abengi nabatendeka ukumona imipepele ya calo pamo nga iyalenga amafya yacusha abantu ukucila ukuyapikulula. Muletontonkanyapo shani pali ico?” Pa numa ya kukutika ku fintu umuntu alandapo, mulangeni icintu cimo muli bamagazini ba ndakai ico cingamucebusha, icilelanda pa kufilwa kwa mipepele ya bufi nelyo ukubongoloka kwa iko ukulepalamina. Ipusheni nga kuti atemwa ukubelengapo. Ipushanyeni amashina, no kuipeelesha ukubwelelako na kabili pa kuti mwingalondolola fintu caba ica cine ukuti ukupepa kwa cine takwafilwa ukusambilisha abantu. Tukusheni ukupoka ukulembesha Ulupungu lwa kwa Kalinda.
◼ “Ilyo mwamona amafya ayengi ayaba mu ndupwa ilelo, bushe mwalibala amuipusha icaba inkaama pa kuba aba nsansa mu lupwa?” Pembeleleni asuke, e lyo mulondolole ukuti muli Baibolo, Lesa alisokolola inkaama ya cine cine pa kuba aba nsansa mu lupwa. Nakalimo kuti mwabelenga Esaya 48:17. Lyene alukileni kwi sambililo 8 muli broshuwa wa Cintu Lesa Afwaya no kulanda pa fikomo fya mu Baibolo fimo ifiloshiweko ifyo fipayanya ubutungulushi bwashintililwapo ku uli onse uwaba mu lupwa. Belengeni umutande wa fipusho pa kutendeka kwe sambililo. Ipusheni nga ca kuti umuntu kuti atemwa ukubelenga ifyasuko. Ipeelesheni ukubwelelako pa nshita imbi ku kulanshanya ifya kutungulula fya kwaafwa na fimbi ifyaba muli Baibolo pa kuti ubumi bwa lupwa bube ubwa nsansa.
6 Fintu abantu bakabila apakalamba kusambilila cintu Lesa afwaya e lyo no kucicita. (Kol. 1:9, 10) Tukanonsha bambi apakalamba mu April na mu May nga twingatendeka ukubasambilisha fintu twaishiba pa lwa fifwaikwa fya kwa Yehova ifya bumi.—1 Kor. 9:23.