Shimikileni Konse Ukuli Abantu

¹ Pa kwishiba umulimo untu umupashi wa kwa Lesa wabombele mu butumikishi bwakwe, umutumwa Paulo alondolwele ukuti: “Ni Lesa e wameseshe.” Na kabili asumine ukuti: “Ifwe tuli [bakabomba banankwe aba kwa Lesa, NW].” (1 Kor. 3:5-9) Ili lyaba lishuko lyawamisha. Ni shani fintu twingalangisha apabuuta ukuti tulatasha pa kuba bakabomba banankwe aba kwa Lesa? Ilyo twabilisha imbila nsuma kuli bonse abo tukumanya mu mulimo wa ku ng’anda ne ng’anda na ku fifulo fimbi.

² Twalikambishiwa ‘ukulenga aba nko shonse ukuba abasambi.’ (Mat. 28:19) Nga ca kuti twalanda fye na bantu abanono lintu tulebombako ubutumikishi, nalimo kuti twanaka mu kwangufyanya no kumona ukuti tapali ico tucitile. Lubali lumbi, tulaipakisha ubutumikishi bwesu apakalamba lintu tulesanga abantu abengi no kulanda na bo. Kwena, ici kuti cayafya, apantu ciletupinda ukuitendekelako ukuya konse ukuli abantu pa kuti twingalanda na bene.

³ Ifya Kumwenako fya Cine Cine: Kuti twashimikila ku bantu pa mishiika, mu maparka, apo bamotoka beminina ku kupemwinako, ne fitesheni. Lintu muli mu myendele ya cintubwingi, bushe mulaba abaipekanya ukushimikila mu nshila? Inte shibili abaninine basi walimo abantu abengi ilyo baleya ku kukumana kwa mulimo wa mwi bala batendeke ukulanda pa cikope ca Paradise mu citabo ca Ukwishiba, ukulanshanya amalayo ya kwa Lesa aya ku ntanshi. Nga fintu baleenekela, umulumendo waiminine lwa mupepi alekutika kabili alitemenwe ifyo aumfwile. Ilyo ashilafuma muli basi, alipokeleko icitabo no kwipusha nga kuti kwaba umuntu wa kumutandalila ku ng’anda ku mwakwe.

⁴ Bakasabankanya abengi baliipakisha ukushimikila mu lyashi fye. Nkashi umo aile ku cifulo cabapo amatuuka ayengi mu cungulo kasuba no kutununuka abantu abo bapwishishe ukushita ifyo baleshita lelo abashalemoneka ukupamfiwa. Alishalike impapulo shonse isho akwete mu cola cakwe. Umwaume umo uwaikele muli motoka alepembelela alitemenwe ukupokako bamagazini ukufuma kuli uyu nkashi. Alisangilwepo ku kulongana akale, kabili ifyo balanshenye fyamulengele ukusekelela mu kusambilila icine na kabili.

⁵ Caliba lishuko ukusansabika ishina lya kwa Yehova. Ukupitila mu kulangisha ifyo twapimpa mu mulimo wa kushimikila, tulanga ukuti tatwapusa imifwaile ya cikuuku ca pa fye ico Lesa atulanga. Pa kuti nomba ni “nshita ya kupokelelwamo” iya kwaafwa bambi, shi natuye konse ukwingaba abantu no kushimikila kuli bene pa lwa “bushiku bwe pusukilo” ubwa kwa Yehova.—2 Kor. 6:1, 2.