Bushe Umweshi wa August Ukaba Uwaibela?
1 Umwaka wa 1963 wali uwaibela ku bantu ba kwa Yehova. Bushe namwishiba icalengele? E lintu impendwa ya bakasabankanya isonde lyonse yafikile pali milioni umo. Nga ca kuti mwali mu cine pali ilya nshita, kuti mwaibukisha fintu twasansamwike ukukwata abengi baleshimikila ubukombe bwa Bufumu! Nomba, iyo e mpendwa ya bakasabankanya baba mu United States mweka kabili mu Zambia tuli 100,000. Nangu cibe fyo, cila mweshi, pali avareji, abali 20,000 muli ifwe tatucita lipoti ukuti twalibombako mu butumikishi.
2 Mukabombeko: Mu August tulefwaya ukusungilila icipendo ca pa muulu ica bakasabankanya ukucila pali 100,000 mu Zambia. Nga ca kuti tukatunguluka mu kubombesha kwesu, umweshi wa August ukaba uwaibela cine cine! Kuti twafika pali ico cipendo nga ca kuti ifwe bonse twabombesha.
3 Abalepanga ukuya kwi bungano mu August, kuti babombako mu butumikishi ilyo bashilaya. Mukasende amatrakiti, babroshuwa, nelyo bamagazini ku kuleka mukashimikile abantu mukalakumanya ilyo muli kwi bungano. Na kabili nga mwafika ukulebela ibungano kuti mwabombako mu butumikishi na bakasabankanya ba kuli ico cifulo.
4 Kuti mwabombako mu butumikishi nangu cingati mwalilwala. Pambi kuti mwashimikila kuli badokota, banasi, nelyo bambi abamupempula. Napamo kuti mwashimikila ukupitila muli kalata nelyo ukubomfya foni.
5 Bamo ukwabulo kutwishika bakatemwa ukubafwilisha ku kuleka bakabombeko mu mulimo wa mwi bala mu August. Baeluda, ababomfi batumikila, na bakatungulula ba masambililo bafwile ukupekanya ukuti aba musango yu bakafwilishiwe. Te kwesha ukulaba ukuleta lipoti wa mulimo wenu uwa mwi bala mu kwangufyanya pa mpela ya mweshi ku kuleka bakamupende nga kasabankanya mu August.
6 Katamikeni Ishuko: Ubutumikishi bwaba “icisuma icaseekeshiwe.” (2 Tim. 1:14) Tulatasha pe shuko twapeelwa ilya kushimikila imbila nsuma. (1 Tes. 2:4) Lintu twalanguluka pali fyonse ifyo Yehova atucitila, tufwile ukukuntwa ku kutwalilila ukubombako umwaka onse muli uyu mulimo wacindamisha. Twileka icili conse ukutucilikila mu kushimikila lyonse. Natulenge uyu mweshi wa August ukuba uwaibela mu mulimo wa kwa Yehova no kupampamina pa kushimikila pa lwa wene imyeshi yonse iikakonkapo!—Ilu. 34:1.