Bushe Ni Mwe Bakabila ba Bufumu aba Lyonse?

¹ Bonse twalicankwa ukumfwa ukuti Zambia yalifikile pa mpendwa ya bakasabankanya iishatala aifikwapo. Bakasabankanya bafikile 107,233 mu August 1999. Cine cine kwali kubombesha kwaikatana kabili ukwabamo umupampamina! Ukwabula no kutwishika, mu myeshi yakonkelepo, bamo muli aba bakasabankanya calibakosela ukuba bakabila ba Bufumu aba lyonse, pantu pa myeshi yonse ukutule lyo, avareji wa bacita lipoti ni 92,000 cila mweshi. Ici cilelangilila ukuti pali bakasabankanya 7, ninshi umo tatuma lipoti wa kuti alashimikilako cila mweshi. Tulemona ukuti ukukoselesha kwakonkapo kuti kwayafwilishako ukupwisha ubu bwafya.

² Tasheni Pali Ili Shuko: Tufwile ukutasha apakalamba pe shuko twakwata ilya kwebako bambi imbila nsuma ya Bufumu. Uyu mulimo ulalenga umutima wa kwa Yehova ukusamwa kabili ulaafwa abafumaluka ukusambilila inshila ya ku mweo. (Amapi. 27:11; 1 Tim. 4:16) Ukushimikila lyonse kulalenga tulebelesha mu butumikishi no kutulenga ukuba aba buseko no kumfwa ukuti tulebombapo cimo.

³ Tumeni Lipoti wa Mulimo Wenu: Bamo ababombako umulimo wa mwi bala tabapoosako amano ukutuma lipoti wa mulimo wabo mu nshita. Tatufwile ukutontonkanya ukuti ifyo twabombele tafilingile no kutumwa. (Linganyeniko Marko 12:41-44.) Tulingile ukutuma lipoti ifyo twabomba nangu cafye shani! Ukukwatako inshila imo iyateyanishiwa bwino mu ng’anda iya kulemba inshita mwabomba, pamo ngo kulemba pali kalenda, cakulamucinkulako lyonse ukulemba lipoti walungika no kutuma bwangu bwangu pa mpela ya mweshi umo na umo.

⁴ Afwilisheni Abalekabila Ukwafwilishiwa: Napamo kuti mwakabila ukuwamyako ukutantika kwa pa mwenu ukwa kwafwa abalekabila ukwafwilishiwa pa kuti balekonkanya ukubombako mu butumikishi. Kalemba wa pa cilonganino na bakatungulula ba masambililo ya citabo balingile ukutantika ukuti bakasabankanya babelesha bafwilisheko bambi. Nga mwalikwata abana, nelyo abasambi ba Baibolo abali bakasabankanya bashabatishiwa, bakansheni ukutuma lipoti wa mibombele yabo cila mweshi.

⁵ Ibukisheni ilyashi lyaleti “Ndetasha Pa Myaka Ubwingi Nabombela Yehova,” ilya bumi bwa kwa nkashi Ottilie Mydland uwa ku Norway ilyali mu Ulupungu lwa kwa Kalinda ulwa October 1, 1997. Uyu nkashi abele kasabankanya wa mbila nsuma uwa lyonse ilyo ashilabatishiwa mu 1921. Ilyo papitile imyaka 76, ninshi ali ne myaka ya bukulu 99, atile: “Ndi uwa nsansa ukuti ncili naliba kasabankanya wa lyonse.” Mwandi mibele ishaiwamina iyo ababomfi ba kwa Yehova bonse bengapashanya!