Bushe Mulabomba Ulubali Lwenu pa Kuti Lipoti Ilungame?

¹ Amalyashi ya mu Baibolo ayengi yalalumbula ifipendo mu kulungatika, ifitwafwa ukwishiba bwino bwino ifyacitike. Ku ca kumwenako, Gideone na bantu 300 fye baonawile inkambi ya bena Midiani umupwilapo. (Abapi. 7:7) Malaika wa kwa Lesa aipeye ifita fya bena Ashuri 185,000. (2 Isha. 19:35) Pa Pentekoste 33 CE., abantu mupepi na 3,000 balibatishiwe, kabili ilyo papitile nshita inono, impendwa ya basumina yafikile kuli 5,000. (Imil. 2:41; 4:4) Aya malyashi yalangilila bwino bwino ukuti ababomfi ba kwa Lesa aba ku kale baleangwako sana ku kusunga ifipendo fyakumanina kabili ifyalungama.

² Ukuteyanya kwa kwa Yehova pali lelo kutufunda ukutuma lipoti wa fyo tubomba mwi bala cila mweshi. Ukukonka bwino bwino uku kutantika na ko kulalenga umulimo wa kushimikila ukutungululwa bwino. Amalipoti kuti yalanga ukuti tulekabila ukwangwa ulubali lumo ulwa butumikishi nelyo ukuti ababomfi na bambi balekabilwa mu ncende imo iye bala. Mu cilonganino, amalipoti ya mulimo wa mwi bala yalaafwa baeluda ukwishiba abali na maka ya kulundako imibombele mu butumikishi pamo na bengakabila ukwafwiwa. Kabili amalipoti pa fyo umulimo wa kushimikila Ubufumu ulelunduluka yalakoselesha bamunyinefwe mwi sonde lyonse. Bushe mulebomba ulubali lwenu pa kuti lipoti ilungame?

³ Umulimo Wenu: Pa mpela ya mweshi, bushe mulafilwa ukwibukisha ifyo mwabombele mu butumikishi? Nga ni fyo, cinshi mushingalalembela ifyo mwabomba lyonse nga mwabombako ubutumikishi bwa mwi bala? Bamo balemba pali kalenda nelyo mu katabo balemba fimo cila bushiku. Bamo balasenda ka silipi ka kulembapo lipoti wa mulimo wa mwi bala akashalembwapo. Pa mpela ya mweshi, twaleni bwangu lipoti wenu kuli kangalila wenu uwe sambililo lya citabo. Nelyo nga mulefwaya, kuti mwabika lipoti wenu mu kabokoshi pa Ng’anda ya Bufumu. Nga mwalaba ukutuma lipoti wenu, angufyanyeni ukumona kangalila wenu uwe sambililo lya citabo ukucila ukulolela wene ukwisa kuli imwe. Ukwangwa sana ukutuma lipoti wa fyo mwabombele kulanga ukuti mulacindika ukutantika kwa kwa Yehova kabili mulalangulukilako bamunyina bapeelwa umulimo wa kupoka amalipoti no kupenda ifipendo.—Luka 16:10.

⁴ Umulimo wa kwa Kangalila we Sambililo lya Citabo: Nga kacema uwaibukila kabili uusakamana, kangalila we sambililo lya citabo alangwa sana ku mibombele ye bumba lyakwe mu mweshi onse. (Amapi. 27:23) Aleshiba nga ca kuti cila kasabankanya alabomba lyonse, alabomba bwino, kabili alaba ne nsansa, kabili alangufyanya ukwafwa abashabombele umweshi onse nga e po bali. Ilingi icikabilwa sana mashiwi ya kukoselesha, imitubululo isuma, nelyo ukulaalika umo ukubomba nankwe mu butumikishi.

⁵ Pa mpela ya mweshi, kangalila we sambililo lya citabo alashininkisha ukuti bonse mwi bumba batuma lipoti uwa fyo babombele pa kuti kalemba atuma lipoti wa cilonganino uwalungama ku musambo pa bushiku bwalenga 6 mu mweshi wakonkapo. Ilyo umweshi uli mu kupwa, kuti cawama acinkulako ibumba no kupekanya amasilipi pa cifulo basambililila. Nga paliba abalaba ukutuma lipoti wabo uwa mulimo, kuti alebacinkulako no kubakoselesha bwino bwino.

⁶ Ukutuma bwangu amalipoti ya mulimo wesu uwa mwi bala na ko kulalenga lipoti ukulembwa uulangilila bwino bwino ifyo twabombele mwi bala. Bushe mukafikilisha ulubali lwenu ukupitila mu kutuma bwangu lipoti wa fyo mubomba cila mweshi?