Umukululo wa Fipusho

◼ Mulandu nshi tulingile ukucitila lipoti imibombele yesu iya mulimo wa mwi bala mu kwangufyanya cila mweshi?

Ifwe bonse tulayumfwa aba buseko lintu twaumfwa ilyashi pa lwa fintu fisuma ifilepwishishiwa mu kushimikila ubukombe bwa Bufumu. (Moneni Amapinda 25:25.) Imilimo 2:41 ishimika ukuti pa numa ya lyashi lya kukumbamo ilya kwa Petro pa bushiku bwa pa Pentekoste, “kwalundilweko abantu nalimo amakana yatatu.” Mu nshita fye iipi pa numa, ilya mpendwa yalikulile ukufika ku “makana yasano.” (Imil. 4:4) Fintu aya malipoti yafwile yali aya kucilimusha ku Bena Kristu ba mu mwanda wa myaka uwa kubalilapo! Tulankulako mu nshila imo ine ku malipoti ya kukoselesha ilelo. Tulacincimushiwa ukumfwa pa lwa fintu bamunyina baleipakisha ukutunguluka mu kushimikila imbila nsuma mwi sonde lyonse.

Apantu inshita no kubombesha filabimbwamo mu kulonganika aya malipoti, calikatama nga nshi lintu kasabankanya wa Bufumu onse alebombela pamo no kuteyanya. Bushe mwaliba abasakamanishisha pa lwa kutuma lipoti wenu mu kwangufyanya cila mweshi?

Amalipoti ya kwingilishiwako yalatuletela ubuseko apakalamba. Mu kulundapo, amalipoti yalaafwa Sosaite ukubebeta ukulunduluka kwa mulimo wa mwi sonde lyonse. Ukupingulapo kulabako ukukuma ku ncende ukulekabila ukwaafwa kwakulilako nelyo umusango wa mpapulo no bwingi ifilingile ukupayanishiwa. Baeluda mu cilonganino cimo cimo babomfya amalipoti ya mu mulimo wa mwi bala ku kusanga apalekabilwa ukuwamyako. Amalipoti yasuma yalakuulilila, ukukunta ifwe bonse ukubebeta ubutumikishi bwesu ku kumona umo twingawamyako.

Bakasabankanya bonse balekabila ukutesekesha icishingamo cabo umo umo ica kutuma lipoti wa mulimo wa mwi bala mu kwangufyanya cila mweshi. Bakatungulula be Sambililo lya Citabo pa Cilonganino ebengacinkula bwino bakasabankanya pa lwa ici cishingamo, apantu na kabili balibukila pa lwa kuipeela abene ukwaafwa abo bengaba na mafya mu kubomba umulimo wa mwi bala cila mweshi. Uku kucinkulako kuti kwabilishiwa pe sambililo lya citabo ilya kulekelesha cila mweshi nelyo pa nshita imbi iyalinga. Nga ca kuti takuliko inshita ya kutuma amalipoti ya mulimo wa mwi bala pa Ŋanda ya Bufumu, katungulula we Sambililo lya Citabo pa Cilonganino kuti apoka yene no kushininkisha ukuti yapeelwa kuli kalemba mu kwangufyanya pa kuti yengasanshiwa kuli lipoti wa cila mweshi uwa cilonganino uutumwa ku Sosaite.

Umukoosha wesu mu kucita lipoti imibombele yesu iya mulimo wa mwi bala mu kwangufyanya ulenga icisendo ukwangukilako kuli abo bashingamwa no butuntulu bwesu ubwa ku mupashi.