Bomfyeni Babroshuwa Bafika pa Mutima

¹ Icine ca Baibolo cifwile ukulandwa mu nshila ifika pa mutima. Ilyo Yesu alelondolola icine kuli bakakutika bakwe, alesala amalyashi ayo batemenwe kabili ayalebakunta. (Luka 24:17, 27, 32, 45) Ukutunguluka mu butumikishi bwesu kushintilila sana pa kubombesha kwesu ku kwishiba ifyo bakakutika besu bakabila lwa ku mupashi.

² Babroshuwa kuti baba fibombelo fisuma mu kufika pa mitima ya abo tukumanya mu butumikishi. Muleishibila libela abengankula ku bukombe muli broshuwa umo na umo uuletambikwa mu August:

—Bushe Lesa mu Cituntulu Alatusakamana? Abapiina nelyo abapita mu kayofi bakatemwa ubu bukombe bwa kusansamusha pa lwa nshita ya ku ntanshi ilyo kushakabe ukucula.

—Cinshi Caba Imifwaile ya Bumi—Ni Shani Fintu Wingaisanga? Abacaice abayangwa pa lwa ku ntanshi bakanonkelamo sana mu fyasuko fyashimpwa pali Baibolo ifisangwa muli uyu broshuwa.

—Ipakishe Ubumi pe Sonde Kuli Pe na Pe! Ifikope ifingi na malembo yaloshiwako fikaafwa abana banono na bashaishiba ukubelenga ukumfwikisha imifwaile ya kwa Lesa.

—Kamfulumende Iikaleta Paradise. Uuli onse uwaba mu buteko kuti aankulako kuli ubu bukombe pa lwa fyo Ubufumu bwa kwa Lesa bukapwisha amafya yakosa aya bantunse.

—Ilyo Untu Watemwa Afwa. Badairekita abengi ababomba ne fya mishikile balatemwa ukukwata amakope ya uyu broshuwa ku kupeela indupwa shifwililwe. Bakasabankanya bashimikila ku nshishi babomfya uyu broshuwa ku kusansamusha abaleloosha. Bankashi babili balanshenye no lupwa lwa bantu 7 ulwalepepa pa nshishi. Ukushimikila ubukombe bwa kusansamusha ubwa muli broshuwa kwalengele ukuti isambililo lya Baibolo litendeke ukutungululwa kuli nyina ubushiku bwakonkelepo!

—Bushe Ulingile Ukusumina Muli Bulesa Butatu? Umuntu watemwisha ukupepa kuti aankulako ku cine cisangwa muli uyu broshuwa, icalondololwa bwino kabili icisansalika icifundisho ca kutendekelako ica Kristendomu.

³ Belesheni broshuwa umo na umo, kabili sangeni inshila yawamisha iya kumubomfeshamo mu cifulo cenu. Moneni ibula Na. 8 ilya Ubutumikishi Bwesu Ubwa Bufumu ubwa July 1998, epo mwalasanga imitubululo. Shi Yehova apaale ukubombesha kwenu ukwa kufika pa mitima ya bantu.—Marko 6:34.