Sambilisheni Bambi Ukumwenamo
1 Yehova afwaya abantu bonse ukumwenamo. (Esa. 48:17) Alishiba ifituletela insansa shine shine. Afwaisha abantunse ukusengauka utuyofi no kuipakisha ubumi ukupitila mu kupeepeka ku mafunde yakwe. Tulamwenamo apakalamba ukupitila mu kwikala mu nshila ya kwa Lesa. (Amalu. 34:8) Ni shani twingasambilisha bambi ukucita cimo cine?
2 Cinshi Abantu Bafwaya? Finshi fisakamika abene mayanda kuntu mwikala? Bushe te mutelelwe wa pa ng’anda, ukuba mu cupo cakosa, ifyo abana bakekala, na fimbi ifyapalako? Lintu bakwata amafya, ni kwi bafumya ubwafwilisho? Nalimo abene balayafwilisha, nalimo bashintilila pa maprogramu ayalangilila fintu umuntu engayafwilisha, nelyo bashintilila pa butungulushi bwa bambi. E ico, abengi tabamwenamo, bapelenganishiwa fye ku mano ayaalukaaluka kabili ayashibomba. Tufwile ukubashinino kuti ubutungulushi bwa mu Cebo ca kwa Lesa bwena bwalisumbuka. (Amalu. 119:98) Kuti twacite fyo ukupitila mu kubalanga fintu bengawamyo bumi bwabo nomba nga baibikilishako ukusambilila Baibolo no kubomfya fintu isosa.—2 Tim. 3:16, 17.
3 Ubumi bwa Lupwa Bulawaminako: Abengi tabaishiba ukuti ukufunda kwapuutwamo ukusangwa pa Abena Efese 5:22–6:4 kulabomba bwino ku kupwisha amafya mu lupwa. E fyo cali kuli bamo abaupene pa myaka 10 lelo abafwaile ukupaatukana. Nangu cibe fyo, umukashi alitendeke ukusambilila Baibolo, no kusambilishiwa ifishinte fya mu Malembo pa lwa cupo. Tapakokwele umulume alimwene fintu umukashi aalwike ilintu alebomfya ifishinte fya mu Baibolo, kabili na o alitendeke ukusambilila. Pa numa atile: “Nomba twalisanga apashintilila ubumi bwa lupwa ubwa nsansa sha cine cine.”
4 Balakwata Imifwaile Ine Ine mu Bumi: Lintu umulumendo uwakunkwime ku miti ikola alombele ubwafwilisho ku Nte, alisambilishiwe ukuti Yehova alamusakamana. Atile: ‘Nasambilile ukuti Kabumba alikwatila umuntu imifwaile kabili alatambika umweo wa muyayaya ku bantu abekelwamo. Te kuti mwelenganye fintu nasansamwike pa lwa ici. Ilelo nalikwata ubumi busuma, umutende wa muntontonkanya, no kwampana kwapalamisha na Lesa.’
5 Umuntu onse kuti amwenamo mu bwafwilisho bubomba ubusangwa mu Cebo ca kwa Lesa. Ukupitila mu kububomfya ngo butungulushi bwesu, tulashininkisho kuti inshila ya kwa Yehova yalisumbuka ukucila inshila sha cino calo. (Amalu. 116:12) Twalikwate shuko lya kwebako bambi ubu bukombe, ukubasambilisha ukuti bamwenemo. Ilyo tulecite co, tukamona ifisuma ifingi ifikafumamo.