Umukululo wa Fipusho

◼ Ni mpapulo nshi tulingile ukusambilila na bapya ilyo bashilabatishiwa?

Ilyo umuntu ashilaipeela kuli Yehova no kubatishiwa, afwile ukunonka ukwishiba kwalungika. (Yoh. 17:3) Kuti akwata ifyebo alekabila ukupitila mu kusambilila fyonse fibili broshuwa wa Cinshi Cintu Lesa Afwaya Kuli Ifwe? ne citabo ca Ukwishiba Uko Kutungulula ku Mweo wa Muyayaya. Ilingi broshuwa wa Cintu Lesa Afwaya e usambililwa intanshi. Lelo, nga ca kuti mwatendeke ukusambilila mu citabo ca Ukwishiba, broshuwa wa Cintu Lesa Afwaya alingile ukusambililwa ilyo mwapwisha icitabo. Mulandu nshi ici cibelele icalinga?

Broshuwa wa Cintu Lesa Afwaya asupawila ifisambilisho fya kutendekelako ifya Baibolo. Nga ca kuti eo mwabalilapo ukusambilila, akalenga umusambi ukwishiba ifya kutendekelako ifikabilwa pa kutemuna Yehova. Nga ca kuti eo mwalekelesha ukusambilila, cikaba kwati alepituluka mu fyo asambilila mu citabo ca Ukwishiba. Te mulandu ne co abalilapo ukusambilila, koselesheni umusambi ukulabelenga amalembo yatungilila ifyo fyebo no kuyabebeta. Shininkisheni ukuti mwalandapo pa fikope, pantu filaafwa sana pa kusambilisha.—Moneni Ulupungu lwa kwa Kalinda ulwa January 15, 1997, amabula 16-17.

Ilyo umusambi wa Baibolo apwisha ukusambilila ishi mpapulo shibili, kuti aasuka ifipusho fyonse ifyo baeluda bakapitulukamo na wene mu kupekanishisha ulubatisho. Nga cabe fyo, napamo tacingakabilwa ukusambilila na wene mu lupapulo lumbi, nangu cingati katungulula alingile ukutwalilila ukupoosa amano ku fyo umusambi wakwe alelunduluka.—Moneni Ulupungu lwa kwa Kalinda ulwa January 15, 1996, amabula 14, 17.