Bushe Mulebomba ne Mifwaile?
1 Yehova ni Lesa wa mifwaile. (Esa. 55:10, 11) Twakonkomeshiwa ukumupashanya. (Efes. 5:1) Ico cifwile calangwa bwino bwino mu mibombele ya butumikishi bwesu. Kanshi ici cipusho nacilinga: “Bushe mulebomba ne mifwaile?”
2 Ukushimikila kwenu ku ng’anda ne ng’anda, ubunte bwa mu lyashi, no kwananya impapulo, fyonse fyaba butumikishi bwabamo imifwaile. Lelo tatufwile ukulaba ukuti umulimo twatumwa te wa kushimikila fye, tufwile no kupanga abasambi. (Mat. 28:19, 20) Cilya twabyala imbuto sha cine ca Bufumu, tufwile ukubwelelako ku kushitapilila no kushisakamana lyonse, ninshi natushintilila na pali Yehova ukuti akamesha. (1 Kor. 3:6) Tufwile ukubombesha ukubwelelako no kutendeka amasambililo ya Baibolo.
3 Tanununeni Ubutumikishi Bwenu: Lyonse kulaba ukucankwa nga mwalolesha pa fyo mwabombele no kuitasha mwe bene amuti: “Nimpwishishisha ico nalefwaya ukucita.” Nga fintu calembwa pali 2 Timote 4:5, Paulo akonkomeshe ukuti: “Fishapo bukapyunga bobe.” Pa kufishapo bukapyunga, mufwile ukubombesha ukubwelelako ku kulundulula ubuseko bwa bantu mwatandalile. Mu kutantika kwenu ukwa mulimo ukwa cila mulungu, tantikeniko inshita ya kulungatika iya kuya ku fipempu. Bombeni no buyo bwa kutendeka amasambililo ya Baibolo ku balefwaisha ubulungami. Ico e cifwile ukuba imifwaile yenu ilyo mulebomba mu butumikishi.
4 Ipusheni bakasabankanya bamwebe ifyo baumfwile ilyo bamwene umuntu balesambilila nankwe Baibolo abatishiwa pa kulongana kukalamba. Balisekelele kwati e babatishiwe pa mulandu wa kuti balipwishishishe imifwaile yakulisha! Uupanga abasambi umo alandile ukuti: “Ukupanga abasambi kupilibula ukuti abakulumbanya Yehova balalundwako. Abapokelela icine bakakwata umweo. Nalitemwa ukusambilisha abantu icine, ukupanga abasambi mulimo waibela! . . . Abengi abaisatemwa Yehova baliba ifibusa fyandi ifyatemwikwa nga nshi.”
5 Elenganyeni fintu cingawama ukwafwilisha umuntu asuka aba umubomfi waipeela uwa kwa Yehova! Mwandi ico cilatusekesha nga nshi! Ifyo fisabo fitwala pa numa ya kubomba ne mifwaile mu butumikishi.—Kol. 4:17.