Imyeo Kuti Yaisaloba!
1 Baibolo yalilondolola bwino bwino ukuti Yehova afwaya “abantu [ba misango yonse, NW] ukupusuka.” Lelo, ubumi bwa ku ntanshi ubwa mintapendwa ya ba pano nse bwashintilila na pa fyo imitima yabo yaba kuli Yehova Lesa no Bufumu bwakwe ubo akatekela muli Yesu Kristu. Umutima usuma kuti washintilila fye pa “kwishibe Cine [mu kufikapo, NW].” (1 Tim. 2:3, 4) Ilyo tulesoka abantu ukuti nomba line ububifi buli no kufumishiwapo pano isonde pa kuti icalo cipya ica kwa Lesa ica bulungami cikese, tulabomba no mulimo wacindamisha uwa kupusushe myeo.—Mat. 24:14; 28:19, 20; Rom. 10:13-15.
2 Mulandu Nshi Cipamfishe? Yesu asokele pa lwa “bucushi bukalamba ubushatala abubako ukutula pa kutendeka kwa pano isonde.” (Mat. 24:21) Ubo bucushi bukafika pa kalume pa Armagedone. (Ukus. 16:16) Pa mintapendwa ya bantu abengaloba nga bafilwa ukumfwila imbila nsuma kuti paba balupwa lwesu abashatetekela, abena mupalamano, abo tubomba na bo, abo tusambilila na bo ku sukulu, na bantu twaishibana fye na bo. Lelo ico tulefwaisha sana, kufika ku “bantu bonse” mu kupashanya Lesa, uwalangishe ifyo atemwa aba pano isonde bonse lintu apeele Umwana wakwe, Yesu Kristu, ukuba icilubula ca bonse. (Yoh. 3:16) Tufwile ukutukuta mu kupimpa ukweba bonse ukufulumukila ku cifulo Lesa ateyanya ica kuubamo. Nga tulefishapo umulimo wesu uwa kushimikila, kuti twataluka ku kuba no mulandu wa mulopa.—Esek. 33:1-7; 1 Kor. 9:16.
3 Cinshi Twaimininapo? Ubucindami bwa mulimo wa kushimikila bwalikomailwapo ukupulinkane Cebo ca kwa Lesa conse. Nga fintu umutumwa Paulo alandile, “ukutemwa kwa kwa Kristu e ko twaobelwa” ukuti twikale umwabele mibele ya kwa Lesa. (2 Kor. 5:14) Ukulunda pali fyo, Ulupungu lwa kwa Kalinda ilingi line lulakomaila pa mulimo twakwata uwa kushimikila. Ubutumikishi Bwesu Ubwa Bufumu pe fye bulatulanga ifya kubombo yu mulimo wa kushimikila. Baeluda balateyanya uyu mulimo no kutukoselesha bonse ukubombako. Bakasabankanya banensu balatulaalika ukubomba na bo mu butumikishi. Tulomfwa ifyebo ifingi pa lwa kupekanya imilandile ya kushimikililamo, ifya kutambika bamagazini ne mpapulo shimbi, ifya kusosa pa fipempu fya kubwelelamo, ifya kutungulula amasambililo ya Baibolo, ne fya kushukila akashita akali konse no kukabomfya ku kushimikila. Ifi fyonse filatwafwa ukufishapo ico twaimininapo, ne co caba kupususha imyeo.—1 Kor. 9:22, 23; Efes. 1:13.