Mulekutikisha
1 Umuntu pa kuti alekutikisha, afwile ukuisalapula. Kabili uulekutika afwile ukufwaya ukusambilila no kunonkelamo mu fyo alekutikako. E co kanshi, Yesu akomaile pa kuti umuntu afwile ‘ukucenjela ku fyo omfwa.’—Luka 8:18.
2 Na kucilisha ico cibomba sana ilyo tulesangwa ku kulongana kwa pa cilonganino, ukulongana kukalamba, na mabungano. Pali iyi nshita e po tufwile ukukutikisha. (Heb. 2:1) Pano pali ifishinka fimo ifingamwafwa ukukutikisha ilyo muli pali uku kulongana kwa Bwina Kristu.
◼ Ishibeni bwino ubucindami bwa kulongana. Ukulongana e nshila nkalamba umo ‘tusambilishiwa kuli Yehova’ ukupitila mu ‘mulashi wa pa ng’anda, uwa cishinka.’—Esa. 54:13; Luka 12:42.
◼ Pekanishisheni libela. Belengenimo mu fyebo fikasambililwa, kabili mwilabako ukusenda Baibolo kumo no lupapulo ululesambililwa.
◼ Ilyo muli pa kulongana, esheni na maka yonse ukupoosa amano ku filelandwa. Mwilalanda na bo mupalamene na bo nelyo ukutamba ifyo abali mwi bumba balecita. Esheni sana ukukanapusaulwa ku kutontonkanya pa fyo mwalayacita ilyo ukulongana kwapwa nelyo pali fimbi ifya pa lwenu.
◼ Pitulukeni mu filelandwa. Ipusheni amuti: ‘Bushe ico naumfwa cankuma shani? Ni lilali nkabombelapo?’
◼ Lembeniko ifyebo finono umuli ifishinka fikalamba na malembo. Ico cikamwafwa ukutontomesha pa filelandwa kabili cikamwafwako ukwibukisha ifishinka fikalamba pa kuti mukafibomfye inshita imbi.
3 Sambilisheni Abana Benu Ukukutika: Abana balakabila ukufundwa ifya ku mupashi. (Amala. 31:12) Akale “onse uwacenjela ku kuumfwa” uwa mu bantu ba kwa Lesa alekutikisha ilyo Amalango yalebelengwa kuli bene. (Nehe. 8:1-3) Abafyashi nga balekutikisha ilyo bali ku kulongana kabili balepoosako amano, na bana bene kuti bacita cimo cine. Te kuti cibe bwino ukuletela abana ifya kwangasha nelyo ukwisa na mabuuku ya fya kulengalenga aya kupumbula abana. Ukuya ku cimbusu ukwabula ne co baleya mu kucitako, na ko kuti kwabapumfyanya ukukutika. Apo “ubupumbu bwakakatila ku mutima wa mwaice,” abafyashi bafwile ukukosapo fye pa kuti abana babo bekale no kulakutika pa kulongana.—Amapi. 22:15.
4 Nga tulekutikisha, tukaishininkisha fwe bene ukuti tuli ba mano kabili tulafwaya ‘ukulundako ukusambilila.’—Amapi. 1:5.