Imilandile Yaanguka Ilabomba Bwino Sana
1 Mulandu nshi bakasabankanya bacaice ilingi balengela abo bashimikila ubukombe bwa Bufumu ukukutika? Umulandu umo wa kuti ifyebo fyabo filanguka. Bakasabankanya bamo kuti baumfwa ukuti pa kuti bashimikile bwino kano balanda bwino sana ifyebo. Lelo, ificitika filangilila ukuti imilandile yaanguka kabili iyaumfwika e ibomba bwino sana.
2 Yesu alebila Ubufumu bwa kwa Lesa mu nshila yaanguka, iya kukanapita mu mbali kabili akanshishe abasambi bakwe ukucita cimo cine. (Mat. 4:17; 10:5-7; Luka 10:1, 9) Alebomfya intendekelo yaanguka, ifipusho, ne filangililo ku kucebusha abalemukutika no kubafika pa mitima. (Yoh. 4:7-14) Tufwile ukupashanya ica kumwenako cakwe no kubomfya imilandile yaanguka ukumfwa.
3 ‘Imbila nsuma iya bufumu’ e bukombe tulingile ukubila. (Mat. 24:14) Ukulenga Ubufumu ukuba umutwe ukalamba kukamwafwa ukwangusha imilandile yenu. Landeni pa fintu ifikumine abalemukutika. Abanakashi bangwa sana ku lupwa lwabo ukucila ifya bupolitiki. Ico wishi angwa sana ni ncito no kucingilila ulupwa lwakwe. Abacaice bangwa sana ku nshita yabo iya ku ntanshi; abakalamba ku bumi busuma no mutelelwe. Abantu ilingi bangwa sana ifilecitika umo bekala ukucila ifilecitika ukutali. Pa numa ya kulanshanya pa fintu ifyo umuntu mulelanshanya nankwe angwa, landeni pa mapaalo abantunse bacumfwila bakakwata ilyo Ubufumu bwa kwa Lesa bukalateka. Amashiwi yanono, ayaanguka, kabili ayasalwa bwino pamo ne lembo kuti fyabomba bwino ku kucebusha uulekutika.
4 Kuti Mwatendeka Ukulanshanya Ukupitila mu Kusosa Ukuti:
◼ “Ukwabula ukutwishika mulesumina ukuti abantunse nabaponenwa na malwele ayengi ayashilepola. Lelo bushe mwalishiba ukuti Lesa alaya ukuti nomba line ali no kufumyapo amalwele yonse, pamo ne mfwa?” Lekeni basuke, lyene belengeni Ukusokolola 21:3, 4.
5 Ukubomfya imilandile yaanguka kabili iyaumfwika, kuti mwafika pa mitima ya bantu abengi mu ncende mubombela, ukubafwa ukusambilila pali Yehova ne subilo lya kuipakisha umweo wa muyayaya.—Yoh. 17:3.