Inshita ya Mabungano ya Kwanga!
1 Amabungano ya Nte sha kwa Yehova ni nshita ya kwanga kukalamba. Ukucila pa myaka 100, uku kubungana kwalenga kwaba ukulunduluka mu kuteyanya kwesu. Ukutendeka ilyo twali abanono, twalimona ifyo Yehova apaala nga nshi umulimo wesu uwa mwi sonde lyonse. Pe bungano lyesu ilya kubalilapo muno nshiku ilyali ku Chicago, Illinois, mu 1893, pa bantu 360 abasangilweko, 70 balibatishiwe ukulanga ukuti nabaipeela kuli Yehova. Ku Mabungano ya Citungu aya uyu mwaka wapwile aya “Bakacita wa Cebo ca kwa Lesa” kwasangilwe abantu 9,454,055, na bantu 129,367 balibatishiwe. Mwandini ico cali ca kulenga ukwanga!
2 Ukufuma fye mu nshiku sha Baibolo, ukubungana ni nshita yaibela iyo abantu ba kwa Lesa bapokelelamo amafundisho ya kwa Yehova. Mu nshiku sha kwa Esra na Nehemia, abantu bakutike Amalango ilyo yalebelengwa “ukufuma ku macaca ukufika akasuba pa kati.” (Nehe. 8:2, 3) Ico balyumfwikishe Amalango pali bulya bushiku, kwali “ukwanga kukalamba” ku bantu. (Nehe. 8:8, 12) Na ifwe bene tulaanga pantu amabungano yaba lishuko ilisuma nga nshi ilya kupokelela amafundisho yasuma ne ca kulya ca ku mupashi ica mu “nshita iyene” kuli Yehoba ukupitila mu “musha wa cishinka kabili uwashilimuka.” (Mat. 24:45) Apo Yesu atile umuntu ekalila no mweo “ku cebo conse icifuma ku kanwa ka kwa Lesa,” amabungano yalicindama pa kuti tutwalilile abatuntulu lwa ku mupashi.—Mat. 4:4.
3 Tatonaule Nshita Ukusangwako: Bonse tufwile ukuba no buyo bwa pa lwesu ubwa kuti tukasangweko ku malyashi yonse aya pe Bungano lya Citungu ilya uno mwaka ilya “Bakasambilisha wa Cebo ca kwa Lesa.” Tufwile ukupekanya ukuti tulebangilila ukufika cila bushiku no kusangwako ukufikila twalandako na “Amene!” kwi pepo lya kulekelesha. Pa kuti tukacite co, nalimo kuti twakabila ukwalula imibombele yesu iya ncito. Ukupoka ulusa ku ncito ulwa kusangwa kwi bungano nalimo kuti kwayafya. Tufwile ukukosapo fye, tatufwile ukulabako fye ukuti nalimo bakansuminisha. Nga kuti twakabila umwa kusendama nelyo imyendele, tufwile ukupekanishisha libela. Conse ico tukacita tacakabe konaula fye amaka ne nshita!
4 Abantu ba kwa Yehova tabalinganya indalama ku mapaalo yaba mu kusangwa kwi bungano. Umfweni ifya kumwenako fya bamo abapampamine pa kusangwa kwi bungano lya Nte sha kwa Yehova ilya pa Kati ka Fyalo ilya Kufwaya kwa Bulesa ilyaliko mu 1958 ku musumba wa New York City. Munyinefwe umo aisele akampani kakwe aka makuule pa milungu ibili pa kuti ayebombako umulimo wa kuitemenwa pe bungano no kusangwa ku kulongana. Munyinefwe wa ku fishi fya Virgin ashitishe impanga ya maeka yasano pa kuti ulupwa lwakwe lonse ulwa bantu 6 lusangwe ku kulongana. Abaupana bacaice bashitishe ubwato bwabo ubwa injini pa kuti basende abana babo bonse batatu, ukutendeka no wa myeshi ibili ukufika na ku wa myaka 7. Aba bwananyina batatu aba mu ng’anda imo ku California baebelwe ukuti nga basha incito baya kwi bungano, pa kubwela tabakasuminishiwe ukubomba. Nalyo line, ico tacabalengele ukufilwa ukuya kuli lilye bungano lya lulumbi.
5 Yehova Alatulambula pa Kubombesha: Yehova alamona no kulambula ababomfi bakwe pa kubombesha. (Heb. 6:10) Ku ca kumwenako, pe Bungano lya Ukusanduluka kwa Teokrasi ilyaliko mu 1950, abasangilweko baumfwile ilyashi lya lulumbi ilya kuti: “Ubwikashi Bupya.” Munyinefwe Frederick Franz acincimwine bonse abasangilweko ilyo abepwishe ukuti: “Bushe bonse mwe bali pali lino ibungano lya pa kati ka fyalo tamwabe aba nsansa ukumfwa ukuti pano pene tuli, ino nshita ya bushiku, mwi bumba lyesu mwine muno, muli bamo abengaba ba cilolo mu calo cipya?” Nomba palipita ne myaka 50, kabili tucili tuleanga pali kulya kumfwikisha kusuma ukwa Amalumbo 45:16.
6 Pa numa ya kusangwa kwi bungano lya citungu ilya uyu mwaka wapwile, umufyashi umo umwaume uwatashishe alembele ukuti: “Mwandini bamunyinane te kuti musumine ifyo ili bungano lipuswishe imyeo. Ulupwa lwandi lwakuukile ku musumba mu kubombe ncito, lelo ilyo line lwatendeke no kusuula ifya ku mupashi. . . . Twatendeke ukulekelesha imilimo yesu iya Bwina Kristu. Twasukile twaleka ukusangwa ku kulongana no kushimikila kwine. . . . Ili bungano nalitupuupuutula, na kabili tuleimika amabuyo ya ku mupashi no kutendeka ukuipekanya ukuti tukayafikepo.”
7 Yehova aletupeela ifyo tukabila lwa ku mupashi. Alatutebeta ifya mabwenge pe bungano. Ukutasha pali ifi fya kulya kuti kwalenga twalanda nga filya fyalandile Korneli ilyo atandalilwe no mutumwa Petro. Atile: “Nomba ifwe bonse e mo tuli pa menso ya kwa Lesa ku kuumfwa fyonse ifyo mwaebwa kuli Shikulu.” (Imil. 10:33) Natube no buyo bwa ‘kuba pa menso ya kwa Lesa’ pa fiputulwa fyonse ifye Bungano lya Citungu ilya uno mwaka ilya “Bakasambilisha wa Cebo ca kwa Lesa” kabili nakukabe ukwanga!
[Akabokoshi pe bula 3]
Inshita ya Kulongana
Ubushiku bwa Kubalilapo no bwa Cibili
8:45 hrs ukufika 16:00 hrs
Ubushiku bwa Citatu
8:45 hrs ukufika 15:30 hrs