Bushe Mulatesekesha Ifyashila?
1 Nga batwipusha nampo nga tulatesekesha ifyashila, napamo kuti twasumina fye bwangu bwangu! Finshi fimo fimo ifyashila fya kwa Lesa ifyo tutesekesha?
2 Fintu twakatamika bucibusa bwa pa lwesu twasuminishiwa ukukwata na Shifwe wa ku muulu! Atulaya ukuti nga ‘twapalama kuli wene, na o akapalama kuli ifwe.’ (Yako. 4:8) Ukwabula ilambo lya cilubula ilya kwa Yesu Kristu, takuli uwingapokelela umweo wa muyayaya. (Yoh. 3:16) Mu kutasha kwafumaluka, lyonse tuleba Lesa ukupitila mwi pepo ifyo tutasha icine cine pali ubu bupe bwaumo mutengo.
3 Icebo capuutwamo ica kwa Lesa, Baibolo wa Mushilo, na co calishila kuli ifwe, nga fintu fye ukuteyanya kwa kwa Yehova ukwa pe sonde na ko kwashila. Tulangisha ukuti tulatesekesha ifi fintu Yehova atupa ilyo tuleikala umwabela ifishinte fya Baibolo, ukukosha ukutemwa kwa bwananyina, ukubaka imitantikile ya teokrasi mu kusakamanishisha, no kubombela pamo na baletungulula.—1 Pet. 1:22.
4 Tulapokelela ifilyo fya ku mupashi ifyapaka ukupitila mu musha wa cishinka kabili uwashilimuka. E fyo cikaba uno mwaka pe Bungano lya Citungu ilileti “Bakacita wa Cebo ca kwa Lesa.” Kulya kukaba ukufunda kwacindama kabili tukaipakisha ukubishanya kwa bucibusa uko tukabila mu kampampa. Kuti twalangisha shani ukutasha kwa ku mutima pali ifi fyashila tukapokelela?
5 Mwilekelesha Ing’anda ya kwa Yehova: Nehemia akonkomeshe ababombeshe mu kukuula cipya cipya ifibumba fya Yerusalemu ‘ukukanalekelesha ing’anda ya kwa Lesa wabo.’ (Nehe. 10:39) Muno nshiku, “ing’anda” ya kwa Yehova yaba mitantikile ya kupepa. Amabungano yesu aya citungu yaba muli iyo mitantikile. Pa kukanalekelesha iyi mitantikile, tufwile ukusangwako no kupooseshako amano, ukulangisha Yehova ukuti tulakatamika sana ifyo atupa. (Heb. 10:24, 25) Mapange nshi tufwile ukucita nomba pa kuti twingalangisha ukuti tulatesekesha ici cintu cashila?
6 Sangweniko Inshiku Shonse Shitatu: Ifwe bonse tufwile ukupekanya ukusangwako inshiku she bungano shonse shitatu. Bushe mulepanga ukubangilila cila bushiku, lyene ukubapo ukufika fye na kwi pepo lya kusondwelela pa bushiku bwa citatu? Nga ni fyo, mukakwata amapaalo yawamisha. Ukusangwa kwi bungano te lyonse kwinganguka. Ukuteululako fimo ku ncito kuti kwakabila ukushangila. Imyendele napamo te kuti yanguke. Lelo te kwesha ukuleka ifi fintu ukumufuupula ica kuti mwafilwa no kusangwa kwi bungano.
7 Langulukeni Ici ca Kumwenako Cawamisha: Mu calo cimo ica muno Afrika umwaba intulubundi, bamunyina bamo baleya kwi bungano lya citungu uyu mwaka wapwile kabili bakumenye abashilika. Abashilika baipwishe abati: “Ni mwe bani, kabili muleya kwi?” Bamunyina batile: “Tuli Nte sha kwa Yehova, tuleya kwi bungano lya citungu.” Umo pa bashilika atile: “Mwe Nte sha kwa Yehova mwitiina icili conse. Muleya fye, kabili mukayalongana fye bwino ukwabula ubwafya. Lelo, muli no kukumanya abashilika abengi. Muleendela fye pa kati ka musebo! Nga mwamona abantu abengi nababungana, imwe muleya fye pa kati ka musebo!” E fyo baendele kabili bafikile fye bwino bwino kwi bungano. Aba bamunyina balilambwilwe pantu balilangishe ifyo batesekesha ifyashila.
8 Na ifwe tulalolenkana na mafya kwati ni aba bamunyina. Lelo ukwabulo kutwishika, kuti twapashanya icitetekelo cabo no kupampamina pa kusangwa ku nshiku shonse ishe bungano lyesu ilya citungu. Nga kwaba ifya kuteulula, shintilileni pali Yehova ku kumutungulula, pa kwishiba ukuti akapaala ukutukusha kwenu ukwa kusangwa kuli programu onse.
9 Lobololeni Amapaalo: Tulafuluka Icebo ca kwa Lesa, pa kwishiba ukuti ukupitila muli cene kuti twafika ku kupusuka. (1 Pet. 2:2) Ukusangwa kwi bungano lya citungu no kukutika kuli programu kukaafwa ifwe bonse ukukuula icitetekelo cakoselako muli co Cebo kabili cikatwafwa ukuipangasha pa kuti tushipikishe ukusansa kwa kwa Satana. Nga tulecite fyo, tukalanga Yehova na balemonako ukuti tulatesekesha nga nshi ifyashila no kuti “ifwe tatuli abakwinda . . . lelo tuli abakwate citetekelo no kusunge mitima yesu.”—Heb. 10:39; 12:16; Amapi. 27:11.
10 Kuti twasubila ukuti Yehova Lesa akesula ifipunda fya mu muulu no kutupongolwela amapaalo ya ku mupashi ayengi. (Mal. 3:10) Imikeni ubuyo bwa kusangwa kwi Bungano lya Citungu ilileti “Bakacita wa Cebo ca kwa Lesa” ukufuma pa kwiswila kwa programu pa bushiku bwa kubalilapo ulucelo ukufika kwi pepo lya kusondwelela ukusanshako na “Amene!” wa kupelako pa bushiku bwa citatu icungulo. Tamwakalangulushiwe pa numa!