Programu Mupya uwa Bushiku bwa Kulongana Kwaibela

Umutwe wa programu wa bushiku bwa kulongana kwaibela uwa mwaka wa mulimo uupya ufumine pa cishinka cacindama ica mu Malembo ica kuti: “Lambeni Kuli Lesa—Kaaneni Kaseebanya.” (Yako. 4:7) Ayo mashiwi yaletweba bwino ica kucita muli shino nshiku shayafya! Icumfwila cesu ku mafunde ya kwa Lesa citulenga ukuba abalwani ba kwa Satana. Uyu programu akatusambilisha ifya kwiminina abashangila ku matukuto ya kwa Kaseebanya aya kufwaya ukonaula icitetekelo cesu. Fishinka nshi fimo fimo ifya ku mupashi tukasambilila pali uku kulongana?

Mu lyashi lya kuti: “Ukunakila Lesa Nga Aba mu Lupwa” kangalila wa muputule akalondolola ifyo ukucite co kwingakosha indupwa ukushangila ku mafya ya cino calo. Ilyashi lya kubalilapo ilya kwa kalanda umutandashi pali bulya bushiku ilya kuti: “Umo Calola Ukukaana Kaseebanya,” likalondolola umulandu ne co tufwile ukubela abashipa pa kukaana amapange ya kwa Satana aya kufwaya ukonaula bumupashi bwesu. Amalyashi yabili nayapekanishiwilwa maka maka abacaice, pantu na bo bene bafwile ukucenjela ku mapange ya kwa Kaseebanya. Abena Kristu abengi abakalamba pali nomba balikeene ukukonkelesha ifya pano calo lintu baali abacaice. Tukaipakisha ukumfwa ifya kukumanya fyabo fimo fimo.

Ukunakila bakateka kulafwaikwa ku muntu onse mu bwikashi bwa bantunse. E co, ilyashi lya kulekeleshako ilya kwa kalanda umutandashi likakomaila pa mbali shine umo tufwile ukulamba kuli Lesa: (1) ku buteko, (2) mu cilonganino, (3) ku ncito sha ku calo, na (4) mu ng’anda. Mwandini uyu programu akalanda pa fintu fya cine cine!

Abengatemwa ukubatishiwa pali uku kulongana kwaibela, beikata na ku cani ukweba kangalila wa kutangilila. Bonse tufwile ukubika icishibilo pali kalenda wesu no kuipekanya ukusangwako ku malyashi yonse ayakaba kuli uku kulongana. Tukapokelela amapaalo ya muyayaya ilyo tulelamba kuli Yehova kuli pe na pe.