‘Beni Abacindama ku Milimo Isuma’

¹ Mu myaka ya kupelekeshako ukupimpa mu butumikishi, umutumwa Paulo abombele sana na Timote na Tito. Alembeele Timote na Tito amashiwi yamo yene aya kukoselesha. Aebele Tito ukuti “abatetekela Lesa” bafwile ‘ukwangwa ukutukute milimo isuma.’ (Tito 3:8) Aebele Timote ukuti ababa ne subilo muli Lesa bafwile “ukuba abacindama ku milimo isuma.” (1 Tim. 6:17, 18) Uku kufunda kusuma nga nshi kuli ifwe bonse! Lelo cinshi cikatulenga ukubomba imilimo isuma mu mikalile yesu? Kabili milimo nshi imo iya kulungatika intu twingabomba inshiku shilesa?

² Ukusumina muli Yehova no kutemwa twamutemwa ne subilo lishaiwamina atupeela, fitulenga ukuba abacindama mu milimo isuma. (1 Tim. 6:19; Tito 2:11) Maka maka ino nshita ya mwaka, tulecinkulwako ukuti Yehova atumine Umwana wakwe Yesu pano isonde pa kuti engesa ebela Wishi no kwisula inshila ya ku mweo ku bantu bonse abawaminwa umweo. (Mat. 20:28; Yoh. 3:16) Ici cikalondololwa bwino pa Cibukisho ca mfwa ya kwa Kristu pa March 28. Pa kwankula kwi subilo twakwata ilya kunonka umweo wa muyayaya, bushe tatucincishiwa ukubombesha pa ‘kuba abacindama ku milimo isuma’? Ukwabula no kutwishika tulabombesha! Milimo nshi twingabomba nomba?

³ Imilimo Isuma iya Kubomba mu March no Kuya ku Ntanshi: Ukwabula no kutwishika, tukasangwa ku Cibukisho, inshita yacindama mu mwaka ku Nte sha kwa Yehova mu calo conse. (Luka 22:19) Lelo tulefwaya na bambi abengi bakasansamuke pali iyi nshita. Moneni lipoti wa mulimo mu Ulupungu lwa kwa Kalinda ulwa January 1, 2002, mwalamona ukuti uyu mwaka wapwile mu fyalo ifingi, abasangilwe ku Cibukisho balifulile imiku itatu, ine, isano, nelyo imiku iingi ukucila pa mpendwa ya bakasabankanya. Ca cine bonse ababa mu cilonganino balibombeshe ukwita abantu abengi ukusangwa ku Cibukisho mu cifulo cabo ica kubombelamo conse. E co, tulefwaya ukupoosa inshita ikulu kukwita abantu ku Cibukisho ukutendeka lino line ukufika na pa March 28, ukubafwa ukusambilila pa lwe subilo lya kupusuka.

⁴ Ilyo cikaba mu April, nalimo tukatendeka ukuipakisha imicele isuma. Cinshi tukacita ilya nshita ya micele isuma ku kuba “abacindama ku milimo isuma”? Tukacita ifyo nga twatwalilila ukubombako no mutima onse umulimo wa kushimikila imbila nsuma, e kutila ‘ukucincilile milimo isuma.’ (Tito 2:4; Mat. 24:14) Nga ca kutila tamwabombeko bupainiya bwa kwaafwilisha mu March, bushe kuti mwabombako mu April na May nelyo mu May mwine? Nga mulebombako bupainiya mu March, bushe kuti mwatwalilila?

⁵ Bamo abaingila incito balabombako iawala limo nelyo ukucilapo ilyo baleya ku ncito, balabombako ubunte bwa mu musebo nelyo ukuya ku bamakwebo balya besula lucelocelo. Bambi batantika ukushimikila pa nshita ya kutuusha. Bamo calibangukila ukutungulula isambililo lya Baibolo ku babomfi banabo pa nshita ya kutuusha. Bankashi abengi banamayanda balipaatulako inshita ya kubomba mwi bala ilyo abana babo bali ku sukulu. Inshiku shimo balashibuka bwangu pa kuti babombeko imilimo ya pa ng’anda imo, e co akasuba balakwata inshita iikulu iya kubomba umulimo wa kushimikila no kusambilisha.—Efes. 5:15, 16.

⁶ Nangu line teti mubombe bupainiya bwa kwaafwilisha, nalimo kuti mwateyanya bwino ukulabombesha umulimo. Kuti mwabombesha apo mwingapesha “ukucite cisuma, ukuba abacindama ku milimo isuma, ukuba abape, aba nkumbu” pa kwebako bambi icine.—1 Tim. 6:18.

⁷ Ibukisheni Umulimo Usuma uwa Kupanga Abasambi: Cila mwaka kulaba aba kusekelela abesa ku Cibukisho. Bushe bamo mu cilonganino kuti bayangwako balya basangwa ku kulongana lelo abashisambilila Baibolo? Bushe kuti mwabapempula na kabili pa kuti mubafwe ukulunduluka lwa ku mupashi? Aba basangwa ku Cibukisho nalimo kuti bakwata ba lupwa lwabo Inte. Bambi nalimo balisambilileko kale kabili balekabila fye ukukoseleshiwa pa kuti batendeke na kabili ukusambilila no kusangwa ku kulongana lyonse. Mwandi kuti twasekelela pa kumona baba babomfi banensu abakosa aba kwa Yehova!

⁸ Apo tukalundako umulimo mu March no kuya ku ntanshi, tulemona ukuti tukasanga abantu abengi abalefwaya ukumfwa abo tuli no kubwelelako. Esheni ukusha mwabepusha icipusho ilyo mushilaya. Lyena bebeni ukuti mukesayasuka ilyo mukabwelelako. Ukucita ifyo, kukalenga tukashe apa kutampila ilyo tukabwela. Cisuma sana ukubwelelako bwangu. Nga ca kutila twafilwa ukutampa isambililo umuku wa kubalilapo, tukafwaya ukwesha ukutendeka isambililo ilyo tukabwelelako.

⁹ Ilyo tuleshimikila mu musebo, tufwile ukutontonkanya pa kwesha ukutendeka ukulanshanya na bantu. Bakasabankanya abengi balipoka amashina, akeyala, amanambala ya lamya ku bantu abo bakumenye ilyo baleshimikila mu musebo. Nga ca kutila umuntu mwalanda na o tekala mu cifulo cenu ica kushimikilamo, pokeni formu wa Twapaapaata Fwayeni Uyu Muntu (S-43) pa Ng’anda ya Bufumu, lembenipo, no kupeela kalemba wa pa cilonganino, uukatuma ku cilonganino cibombela mu ncende ikalamo uyo muntu. Nga ca kutila kalemba teti acite co, kuti atuma ku maofeshi yanono uko bengeshiba ifya kucita. Ukucite fi, kukakusha ukufwaisha kwa muntu.

¹⁰ Nga mwapoka inambala ya lamya ukwabula ukupoka akeyala, lyena citeni icipempu ca kubwelelamo pa kutumina uyo muntu lamya. Pekanishisheni libela ifyo mulefwaya ukulanshanya. Bikeni icitabo ca Ukupelulula lwa mupepi apo mwingamona bwangu. Abengi balibomba bwino ilyo balesambilisha abantu pa lamya, na balya aba kuti caleyafya ukubasanga pa ng’anda. Nkashi ayambile ukwipusha amanambala ya lamya kuli banamayo balefwaisha ukumfwa abo asangile lintu aleshimikila ku ng’anda ne ng’anda, kabili icacitike ca kuti atampile amasambililo ya Baibolo yabili.

¹¹ Bombeleni Pamo na Baeluda ku Kwaafwa Abanaka: Baeluda mu kutemwa balafwaisha ukusakamana aba. Pali aba bantu paba fye abanono, abaitendekela na kabili ukusangwa ku kulongana kwa cilonganino. Balishiba ubucindami bwa kufwaya ukubishanya sana no kuteyanya kwa kwa Yehova pa kuti bengacingililwa lwa ku mupashi nga fintu calondololwa mu Amalumbo 91. Bamo pali aba balyamba na kabili ukubomba umulimo wa mwi bala. Nga ca kutila bamo abanaka basangwa ku Cibukisho uno mweshi, kuti nalimo basumina ukwamba ukusambilila Baibolo. Nga cabe fyo, baeluda bakateyanya uwa kusambilila na bantu ba musango yo abalefwaya ubwafwilisho. Nga bamweba ukwafwilishako uyu mulimo, ukwaafwa kwenu kukatashiwa nga nshi.—Rom. 15:1, 2.

¹² Twalilileni “Ukutukuta Imilimo Isuma”: Abengi ababombako umulimo wa bupainiya bwa kwaafwilisha umweshi umo no kucishapo balisanga ukutila umulimo wabo uwa mwi bala walikulileko mu myeshi yakonkelepo. Bakumenye abantu balefwaisha ukusambilila abo batontonkenye ukubwelelako na kabili. Ici cabalengele ukubombesha ukuya mu mulimo wa mwi bala imiku iingi pa kuti bengalanda na bantu balefwaisha ukusambilila na kabili. Bamo batendeke ukutungulula amasambililo, kabili ico cabafwile ukubombako nga nshi umulimo.

¹³ Kabili bambi balisekelele sana ilyo babombeshe mulimo wa kushimikila kabili uwa kupanga abasambi ica kuti bapitulwike na mu fintu bapoosako sana amano. E co, bamo bacefyesheko inshita bapoosa ku ncito no kuba bapainiya bakwafwilisha ukwabula ukuleka. Bambi balitampako no mulimo wa bupainiya bwa nshita yonse. Babikile sana isubilo lyabo muli Lesa ukucila ifya mu calo. Bamwene ukuti “ukuba abape, aba nkumbu,” kwaletele amapaalo ya kwa Yehova ayengi pali bene ne subilo lyabo ilya kuipakisha “umweo wine wine” lyalikoshiwe. (1 Tim. 6:18, 19) Ca cine, ilyo abengi babombako umulimo wa bupainiya, icilonganino conse cilamwenamo. Bapainiya balitemwa ukushimika pa fyo basanga mu mulimo no kweba bambi ukubombako nabo ubutumikishi, kabili ukucite fyo kulakosha bumupashi mu cilonganino.

¹⁴ Shi ifwe bonse natube “abacindama ku milimo isuma” ino nshita ya Cibukisho no kuya ku ntanshi pa kulundako imilimo yesu iya Bwina Kristu. Natuletasha pa fyo Yehova atucitila, alitupeela isubilo lya kwikala umuyayaya mu calo cipya ica bulungami.—2 Pet. 3:13.