“Tubombe Icisuma Kuli Bonse”
1 Ubutumikishi Bwesu Ubwa Bufumu ubwa February bwakwete ica mu kati icaleti: ‘Shimikisheni icebo ca kwa Lesa’ no bwa March na bo bwakwete ica mukati icaleti: ‘Beni abacindama ku milimo isuma.’ (Kol. 1:25; 1 Tim. 6:18). Bulya Butumikishi bwatukoseleshe ukubombesha ku kwaafwa abalefwaya ukusambilila ukusangwa ku Cibukisho, ukwaafwa abanaka ukutendeka na kabili ukubishanya ne cilonganino, no kwaafwa abana besu na balya tusambilila na bo Baibolo abafika pa fifwaikwa ukutendeka ukusabankanya imbila nsuma. Ukwabula ukutwishika twaliipakisha ukulunduluka pa mulandu wa kubombesha kwesu. Nomba, “lyonse ilyo twaba ne nshita, tubombe icisuma kuli bonse [ukwabula ukuleka].”—Gal. 6:10.
2 Balaalikeni Ukusangwako na Kabili: Mu cifulo ca kushimikilamo icisakamanwa na maofeshi yanono aya mu Zambia, abantu ukucila pali 300,000 abashili bakasabankanya ba mbila nsuma balasangwa ku Cibukisho cila mwaka. Apo ifi basangwako filelanga ukuti balefwaya ukusambilila, cinshi tulingile ukucita pa kulenga aba “abasontelwe ku kuya mu mweo wa muyayaya” ukuba ‘abatetekela’? (Imil 13:48) Bakoselesheni ukuti bakabwele ku kulongana kwa cilonganino mu kwangufyanya.
3 Cinshi mushingalalikila uulefwaya ukusambilila ukusangwa kwi Sambililo lya Citabo pa Cilonganino pa kuti akaipakishe ukulanshanya kusuma mu citabo ca Ukusesema kwa kwa Esaya? Nga ca kutila uyo muntu ni lupwa lwenu nelyo mwaishibana fye na o kabili muli ne lyashi lya kulanda pa kulongana kwe Sukulu lya Butumikishi bwa Teokrasi, kuti mwaalalika uyo muntu ukwisaumfwako ilyashi lyenu. Mulemweba imitwe ya malyashi ya cintubwingi ayakalandwa mu milungu ili ku ntanshi. (Ipepala lya Malyashi yakalandwa lifwile ukubikwa pa cipampa ca fyebo.) Fwayeniko inshila ya kulengelamo uyo muntu ukufwaya ukupepa Yehova. Kabili, nga ca kuti talatendeka ukusambilila Baibolo na umo mu cilonganino, kuti mu cikuku mwamweba ukusambilila na o.
4 Mwileka Kukoselesha Abanaka: Bamo abasangwa ku Cibukisho kale kale baliipeela kuli Yehova. Nalyo line, pa nshita imo balinakile ukushimikila imbila nsuma. Lelo, Paulo atukoseleshe ‘ukubomba icisuma . . . no kucishamo ku ba bwananyina bwa mu citetekelo.’ (Gal. 6:10) E ico, tufwile intanshi ukusakamana abanaka.
5 Nalimo bamo balyankulako kale ku kukoselesha kwa baeluda na bambi ukwa kubombako na kabili ubutumikishi. Nga ca kuti baeluda bamweba ukubomba na kasabankanya uwanaka, ishibeni ukuti ukutemwa mwatemwa Yehova no mulimo wa mwi bala kukalenga uyo muntu ukuba uwakosa na kabili. Mulangeni inshila shapusanapusana isha kushimikilamo pa kuti engaipakisha, kabili engatwalilila ukushimikila, no kupaalwa na Yehova.
6 Lengeni Bakasabankanya Bapya Ukutendeka Bwino: Ilyo umwanakashi mupya uwalefwaya ukusambilila aishibe ukuti nasanga ukuteyanya kwa cine ukwa kwa Lesa, alefwaya apo pene fye ukutendeka ukushimikila. Ilyo asambilile ifyo alingile ukucita, atile: “Ndefwaya ukutendekako nomba line.” Nga ca kutila uo musambilila na o Baibolo nasuminishiwa ukuya mu mulimo wa mwi bala, mwafweni ukumfwikisha umulandu cacindamina ‘ukutendeka ilyo line,’ no kulenga uyo kasabankanya mupya ukutendeka bwino. Mwafweni ukulapekanya lyonse no kubombako umulimo wa mwi bala cila mulungu.
7 Nga umwana wenu aba kasabankanya ushabatishiwa, bombeleni pamo na o pa kuti alunduluke ukulingana no mushinku wakwe na maka akwete. Nga mwamwafwako fye panono, kuti mwapapa pa fyo engalalanda bwino no muntu, ukubelenga Baibolo, no kutambika ulupapulo. Nga asanga umuntu uwayankulako bwino mu mulimo wa mwi bala, mukansheni ifya kupanga icipempu ca kubwelelamo no kulenga uyo muntu ukufwaisha ukusambilila.
8 Lundeniko Umulimo Wenu: Bushe takuli ifingamulesha ukubombesha mu mulimo wenu uwa kushimikila nangu fye ni pa numa ya Cibukisho? Bushe kuti mwalundako iawala limo nelyo yabili ku nshita iyo mushimikila cila mulungu? Bushe mulemwena libela pali kalenda ilyo mwingafwaya ukubombako bupainiya bwa kwafwilisha na kabili? Nelyo bushe kuti mwatelula imikalile yenu pa kuti mutendeke umulimo wa nshita yonse? Ukubombesha kwesu umulimo wa kushimikila nalimo kuti kwayafwa umuntu ukupokelela icine! (Imil. 8:26-39) Ilyo tulelolela inshiku shileisa, shi ‘pe fye natweshe ukucite cisuma ku banensu na kuli bonse.’—1 Tes. 5:15.
[Akabokoshi pe bula 3]
Mwileka Ukwaafwilisha:
□✔ Abasangilwe ku Cibukisho
□✔ Abatendeka na kabili ukushimikila
□✔ Bakasabankanya bapya abashabatishiwa