Ukukoseleshanya Kwaibela
1 Cila bushiku Inte sha kwa Yehova balakwata amafya yesha icitetekelo cabo. Kaseebanya alesanshila umuku wa limo ku konaula bumpomfu bwesu kuli Yehova, apo naishiba ukuti ashele fye na kashita kanono. (Ukus. 12:12) Calicindama ukuti twaba ‘abakosa muli Shikulu na mu bulamba bwa maka yakwe’ pa kuti ‘twingashangila mu bushiku bwa bubifi, kabili ukuti twiminine ndi apo twacita fyonse.’—Efes. 6:10, 13.
2 Ukulongana capamo na basumina banensu kwaba kuteyanya kwafuma kuli Yehova ukutwaafwa ukuba na maka. Umutumwa Paulo alitesekeshe ubucindami bwa kulongana capamo. Alefuluka ukubishanya na bamunyina ba Bwina Kristu pa kuti ‘bengakoseleshanya capamo’ no ‘kwikashiwa.’ (Rom. 1:11, 12; NW) Pa kuti tube abakosa ilyo tulecita ukufwaya kwa kwa Lesa, Ibumba Litungulula mu kutemwa naliteyanya ukutupeela ishuko lya kuti tukamwenemo ilyo tukalakoseleshanya pe Bungano lya Citungu ilileisa ilileti: “Bakabila ba Bufumu Abapimpa.”
3 Sangweniko pa Kuti Mukanonkelemo: Pangeni ubuyo bwa kuti mukasangweko inshiku shonse shitatu. ‘Tulainonsha fwe bene’ nga twafika bwangu ilyo ulwimbo lwa kubalilapo lushilatendeka no kuba kulya kwine mpaka twalandako na “Ameni” wa kufuma pa nshi ya mutima pa mpela ye pepo lya kwisalila. (Esa. 48:17, 18; NW) Abengi bakakabila ukuteyanya imilimo yabo mu kubangilila pa kuti bengakwata inshita ya kusangwako inshiku shonse shitatu. Na lyo line, nalimo te kuti cibe icayanguka ku bene bancito ukumupeela cuti, lelo Yehova alitulaya ukuti akatwaafwa ukucita ukufwaya kwakwe. (1 Yoh. 5:14, 15) Nga ca kuti tatulati tucite ifyo, e nshita ino ine iya kuteyanya imyendele no kwa kusendama, mwicetekela fye ukuti fyonse fikaba bwino. Tulecetekela ukuti Yehova akapaala ukubombesha kwesu pa kuti tukasangweko inshiku shonse shitatu.—Amapi. 10:22.
4 Fulukeni Ukukoseleshiwa: Bushe mwalitala amufuma kwi bungano lya citungu no kusosa ati: “Ili e bungano lyawamisha pali yonse!” Cinshi nalimo icalengele ukuti muyumfwe ifyo? Ni pa mulandu wa kuti apo tuli bantu bashapwililika mu kupita kwa nshita tulafunshika, no kusanga ukuti tulekabila ukukoseleshiwa lwa ku mupashi. (Esa. 40:30) Nkashi umo atile: “Buno bwikashi bunenga ukufunshika, kabili amabungano yangafwa ukutonta amenso pa fya ku mupashi, yampeela inkosho nkabila lwa ku mupashi. Ciba kwati ukukoseleshiwa kwisa fye pa nshita intu ndekukabila sana.” Nalimo ne mwe e fyo mwayumfwile.
5 Tulakoseleshiwa ukupitila mu malyashi na malyashi umuba ukwipusha ne mbali sha kunonsha shimbi isha mabungano yesu. Munyina umo atile: “Ndaipakisha sana ukuumfwa ifyo balondolola bwino ifya kubomfya ifishinte fya mu Baibolo. Ukwabula ukutwishika, ifilangililo fikalamba filafwilisha sana mu kulanga ifyo twingamwenamo ku fyacitike kale, ifisuma ne fibi. Lyonse ndafwaisha ukumona impapulo shipya ishafuma, kabili ndaipakisha ukubelenga pa nshita ntali ilyo nabwelela ku ng’anda.”
6 Amabungano yaba kuteyanya kusuma ukufuma kuli Yehova muli shino “inshita ishayafya.” (2 Tim. 3:1) Yalatwafwa ukuumfwila ukufunda kwapuutwamo ukwa kuti: “Loleni, iminineni ndi mu kutetekela, mube abaume, koseni.” (1 Kor. 16:13) E ico, shi natupampamine pa kusangwako ku fiputulwa fyonse no kuipakisha ukukoseleshanya kushaifulila ukukaba pe Bungano lya Citungu ilileti: “Bakabila ba Bufumu Abapimpa”!
[Akabokoshi pe bula 3]
Pangeni Ukusangwako Inshiku Shonse Shitatu
■ Lombeni cuti ku ncito.
■ Pangeni amapekanyo yashininkishiwa pa lwa kuntu mukalasendama.
■ Teyanyeni imyendele ya kwi bungano.