Ukulonganika Abantu ba mu Ndimi Shonse
1 Icebo ca kwa Lesa cilefishiwapo! Abantu “aba mu nko sha ndimi shonse” balepokelela ukupepa kwa cine. (Seka. 8:23) Inte sha kwa Yehova baleafwa shani abantu ba mu ‘mikowa yonse, ne misango ya bantu na bantu na ba ndimi’ ukwisaba abasanguluka pa cinso ca kwa Yehova, no kuba ne subilo lya kupusuka “ubucushi bukalamba”?—Ukus. 7:9, 14.
2 Ukuteyanya kwa kwa Lesa Kuleankulako: Ibumba Litungulula lyalipekanya ukuti impapulo sha Baibolo shilebako mu ndimi mupepi na 380 pa kuti abantu mwi sonde lyonse bengomfwikisha ubucindami bwa mbila nsuma. Ukupekanya no kusabankanya ishi mpapulo mu ndimi shafule fi mulimo ukalamba nga nshi. Usanshamo ukupanga amabumba ya bakapilibula bafikapo no kubapeela ubwafwilisho bakabila pa kupilibula impapulo shesu muli ishi ndimi shonse, pamo no kupulinta no kutuma ishi mpapulo. Lelo, umulimo ukalamba ubombwa na bakasabankanya ba Bufumu umo umo, abatwala ku bantu ubukombe bwa Baibolo ubwingabapususha.
3 Ukupokelela Umulimo: Nomba mu ncende shingi mwaliba amabumba yakalamba aya bantu balanda indimi sha cilendo. Pa kushimikila aba bantu imbila nsuma, ababomfi ba kwa Lesa abengi balesambilila ululimi lwa cilendo ululanda abantu baba mu ncende yabo. Bambi balesambilila ululimi lwa ba cibulu ulwa American Sign Language.
4 Pa kukumanisha fyonse fi, iofeshi lya mu Zambia liteyanya impapulo mu Cibemba, ciKaonde, iciChewa, iciFrench, iciLozi, iciLubale, iciLunda, iciNgeleshi, iciPortuguese, iciSwahili, ne ciTonga mu filonganino nalimo 2,100. Abantu bamo abashatalile abomfwa pali Yehova nelyo abashaishibe nangu kamo pali Baibolo balepokelela icine ca Cebo ca kwa Lesa.—Rom. 15:21.
5 Bushe kuti twaibikilishako ukubila imbila nsuma ku bantu abalande ndimi shimbi ababa mu cifulo tushimikila? (Kol. 1:25) Ifilonganino fimo fileteyanya umulimo wa kushimikila mu ncende umwaikala abantu abalande ndimi shimbi. Bakasabankanya babalilapo ukusambilila fimo muli lulya lulimi pa kuti bengalanda ifyebo fyaanguka pamo nga: “Mwapoleni. Nimukwatilako imbila nsuma. [Lyene babatambika trakiti nelyo broshuwa uuli muli ulo lulimi.] Cisuma naya.” Cine cine Yehova alepaala ishi ntendekelo shinono!
6 Ubukombe bwa Bufumu busekesha abantu ba fikulilo fyonse ne ndimi. Natubomfye ishuko no kubashimikila.