Ukumwenamo Sana mwi Bungano lya Citungu Ilya “Bakabila ba Bufumu Abapimpa”
1 Programu wa Kucincimusha: Mwandi twaliipakishe programu wa kucincimusha pe bungano lyesu ilya citungu nomba line! Twalonganine icintu cimo, ukuba abaipangasha bwino ku kushimikila mu kupimpa pa lwa Bufumu bwa kwa Lesa. Bushe muleibukisha ifyo kalanda wabalilepo alondolwele ishiwi “ukubila”? Bushe muleibukisha ukusokota batukoseleshe mu lyashi lyaleti “Shipeni pa Kwishiba Ukuti Yehova Ali na Ifwe”? Malyashi nshi aya bumi bwa bamunyinefwe aya cine nga yalya ayo mwasokotapo?
2 Amalyashi ya kukonkana ayakwete umutwe waleti “Umusango wa Citetekelo Cesu Uleeshiwa ku fya Kwesha fya Misango Misango” yatupeele imilandu itatu iyo Yehova asuminishisha ukupakaswa. Bushe kuti mwalondolola iyi milandu? Fishinka nshi ifya mu Malembo fwe Bena Kristu twakwata ifyo tushiipoosela mu milandu ya calo? Cinshi twakoseleshiwe ukucita pa kuipekanya ku mafya yesa pa mulandu wa kukanaipoosa mu milandu ya calo? Ni shani fintu ukushipikisha amesho muli bucishinka kwingaleta ilumbo kuli Yehova?
3 Ni mbali nshi isha cilangililo cikalamba icaleti “Iminineni Abashangila mu Nshita sha Mafya” ishamukoseshe sana? Bushe kuti twapashanya shani Yeremia?
4 Fintu nshi ifikalamba ifyalondolwelwe mu lyashi lya ku cintubwingi ilyaleti, “Imibele ya Pano Isonde Ilepita,” ifikacitika ku ntanshi no kutufisha ku bushiku bwa kwa Lesa ubwa kutiinya? Ilyo mwalekutika ku lyashi lya kusondwelela ilyaleti, “Isulenimo Imilimo Isuma nga Bakabila ba Bufumu Abapimpa,” mwayampenye shani ifyebo no butumikishi bwenu?
5 Ifishinka Fikalamba Ifya Kubomfya: Ukulingana no bulondoloshi bwali mu lyashi lyaleti “Beni Abatootela,” bushe kuti twalanga shani ukutasha kwesu kuli Yehova? Mu lyashi likalamba ilyaleti, “Bakabila ba Bufumu Bapuutwamo no Kupimpa,” kupimpa kwa kwa nani uko batukoseleshe ukupashanya? Bushe twaebelwe ukuiceeceeta shani?
6 Ilyashi lya kukonkana ilyaleti “Ukusesema kwa kwa Mika Kulatukosha Ukuti Twendele mwi Shina lya kwa Yehova,” lyakomaile pali finshi fitatu ififwaikwa ifyo tufwile ukucita pa kusenaminwa na Yehova? Bushe kuti twafikapo pali ifi? (Mika 6:8) Ukulingana ne lyashi lyaleti “Sungilileni Umusangwela Ukupitila mu Kulindo Mutima Wenu,” ni mu nshila nshi tufwile ukuba ne mibele yasanguluka? Ni muli finshi ilyashi lyaleti “Ibakeni ku Bucenjeshi” lyatusokele ukukanabepwa no kubepa bambi?
7 Fishinka nshi fingabomba ifyali mu lyashi lya kukonkana ilyaleti “Bakabilisha ba Bufumu Abacindika Ubutumikishi Bwabo” ifyo mwatendeka ukubomfya mu butumikishi bwenu? Mu lyashi lyaleti “Ukulanda pa fya ku Mupashi Kulakuulilila,” mwali ukuceeceeta Abena Filipi 4:8. Ni shani fintu ili ilembo litwafwa ukulanda pa fya ku mupashi ilyo tulelanshanya, kabili ni lilali tufwile ukucite fyo?
8 Ilyashi lyaleti “Tetekeleni Yehova no Mweo Onse mu Nshita sha Bwafya” lyalandile pa fyo twingashipikisha ku fibi, ukwafya kwa ndalama, ukulwala, amafya ya mu lupwa, no bunake bwa mutatakuya. Ni shani fintu twingacetekela Yehova ilyo tuli na ya mafya?
9 Ifyuma Fipya Ifya ku Mupashi: Twalitemenwe ukupokelela icitabo cipya icaleti Pepeni Lesa Wine Wine Eka. Bushe ukubilisha kwalelondolola ubufwayo bwa ici citabo kumukumine shani? Mulandu nshi ici citabo ca bubili ica kusambililamo cikabela ica kwaafwa mu mulimo wesu uwa kupanga abasambi?
10 Lyene twapokelele icitabo cayemba icaleti Palameni Kuli Yehova. Fisuma nshi fimo ifilimo? Fikope nshi ifyo mutemenwe sana? Bushe ukucibelenga nakumupalamika kuli Yehova? Ni bani bambi bengamwenamo muli ici citabo?
11 Ibungano lya Citungu ilya “Bakabila ba Bufumu Abapimpa” lyalitukoseleshe lwa ku mupashi, ukukoselesha uko tukabila pa kushipikisha shino inshita shayafya. E co pa kuipakisha sana uku kuteyanya kwapulamo ukwa ku mupashi, shi natubombeshe ukwibukisha ifyalandilwe, ukutasha pa fyo twapokelele, no kubomfya ifyo twasambilile. (2 Pet. 3:14) Ukucite fyo kukatukosha ukuba na bumpomfu lyonse no kuba bakabila ba Bufumu abapimpa mu kupashanya Shikulu Yesu Kristu, ukucita fyonse ku bukata bwa kwa Yehova.—Fil. 1:9-11.