Bushe Ukupoka Penshoni Kuti Waba Mwinshi wa Kubombeshamo?
1 Abantu abengi ababombesha pa ncito balafuluka inshita ya kupoka penshoni ilyo bakalubuka ku kucucutika no kutitikisha kwa ncito. Ilingi line, nangu cibe fyo, ukupoka penshoni kuleta ukutalalilwa, icitendwe, no kukota bwangu. Ukukanakwata ifya kucita fine fine kuti kwalenga umuntu alasakamikwa pa lwa bumi bwakwe. Inyunshipepala ya ku Brazil yashimike ati ababomfi bapoka penshoni baleilishanya pa mulandu wa mafya ya ‘kukanaikushiwa, ukukalifiwa bwangu, ukukanacingililwa, no kupatwa, ukukungumana umutima no kutontonkanya ukuti tabakwete fyakucita ifine fine mu bumi.’
2 Abena Kristu abengi bamona iyi nshita ngo mwinshi ku bumi bupya ubwa kubombeshamo ifya ku mupashi. Munyina umo uwatendeke bupainiya imilungu ibili pa numa ya kufika pa myaka ya kufyalwa 65 atile: “Nshatalaikalapo bwino nge fi naikala imyaka 10 iyo nabomba bupainiya.” Umulume no mukashi balembele ati: “Inshita yawamisha mu bumi bwesu yatendeke ilyo twatampile bupainiya.” E ico kanshi, ku bengi, ukupoka penshoni ni nshita isuma sana iya kulundulwilamo ubutumikishi bwabo ne ya kupaalwa na Yehova.
3 Ukuba Abapamfiwa Kabili Abatwala Ifisabo: Abengi abapoka penshoni pali lelo baakuliile mu nshita kushali ifipe ifyangushako ubumi ifyabako ndakai ne ci cabalengele ukusambilila ukubombesha ukufuma ku bwaice. Nangu ca kuti tabakwata maka ya bulumendo nomba, balatwala ifisabo. Mu calo cimo, bamunyina ne nkashi mupepi na 20,000 ababomba bupainiya, bali ne myaka iya kufyalwa mupepi na 60. Aba bakalamba balabomba umulimo ukalamba mu kushimikila. Ubwishibilo ubufuma ku bukokole ne mibele ya bukapepa balundulula filanonsha ifilonganino balonganako.—Yako. 3:17, 18.
4 Ukuba abapamfiwa mu mulimo wa Bwina Kristu kulasangwila ku kuipakisha ubumi busuma no bwikalo bwawama. Nkashi uwa myaka ya kufyalwa 84 uwatampile bupainiya ilyo apokele penshoni atile: “Ukukwata amasambililo ya Baibolo ayengi na balefwaisha ukusambilila kwalingafwa ukuba uwacincila. Ndenda sana pantu nshakwata motoka. Ici cinenga ukuba umutuntulu sana.” Shikulubantu na nakulubantu abaupana batile: “Umulimo ulatulenga ukuba abacincila kabili abakosa lwa ku mubili. Tuba pamo lyonse. Tulasangalala sana pamo no kuipakisha ubumi.”
5 Ukubombela Ukwaba Ukukabila: Abena Kristu bamo abapoka penshoni abakwatako ulupiya baliselela ukwaba ukukabila kukalamba ukwa bakashimikila ba Bufumu. Bambi balilundako imibombele yabo pa kuyabombela ukwaba abalanda ululimi lumbi. Nga filya umutumwa Paulo acitile, aba bakasabankanya bapimpa, ‘ifintu fyonse bacitile mbila nsuma, ukuti babe aba kukumako kuli bambi.’—1 Kor. 9:23.
6 Abaupana babili batampile bupainiya pa numa ya kukusha abana baume babili. Pa numa ya kubomba bupainiya pa myaka imo, bapingwilepo ukusambilila iciChinese. Pali lelo ilyo bali ne myaka ya kufyalwa iicilile 70, balisekelele pa kumona uko ibumba lya baChinese ilyo balebombela lyasuminishiwa ukuba icilonganino. Abaupana babe fi baba fya bupe icine cine!
7 Takwaba Ukupoka Penshoni mu Butumikishi: Ilintu abantu abengi balapoka amapenshoni ku ncito yabo iya ku mubili, Umwina Kristu ena tapoka penshoni mu mulimo wa kwa Lesa. Bonse bafwile ukutwalilila aba busumino “ukufika na ku mpela.” (Mat. 24:13, 14) Lelo kwena, bamo tababomba nga filya balebomba kale mu mulimo wa kwa Yehova pa mulandu wa kukula. Lelo cilakoselesha bonse ukumona bene balebomba ukufika apo bengapesha no mutima onse! Icebo ca kwa Lesa cabalaya ukuti Yehova takalabe imilimo yabo no kutemwa balangile kwi shina lyakwe.—Luka 21:1-4; Heb. 6:10.
8 Nga muli mupepi no kupoka penshoni, tontonkanyeni pa fyo mwingabomfya bwino penshoni yenu. Lesa akamwafwa kabili mukasanga ukuti ukupoka penshoni mwinshi wa kubombesha uuleta ilumbo kuli Yehova na mapaalo ayengi.—Amalu. 148:12, 13.