“Temweni Yehova, Mwe Babile Bakwe Bonse aba Cishinka”
Ukwibukisha Imfwa ya kwa Yesu Kukabako pa April 4
1 Ku myaka ya ku numa, ilyo Ukraine yaletekwa na baKomyunisiti, abalashi baleceta bamunyinefwe icine cine—maka maka nga bamona ubushiku bwa Mulalilo wa kwa Shikulu bulepalamina—pantu balesuubila ukutila limbi kuti basanga apo balelonganina. Ubu bwaleba bwafya lyonse, pantu abalashi baleishiba ukutila lwa mupepi ne nshiku ishi ne shi e lyo Icibukisho calebako. Bushe bamunyina balecita shani? Umuputule pa nshi ya ng’anda ya kwa nkashi walibundilwe. Apo abalashi te kuti benekele abantu ukulonganina mu ng’anda umuli mulamba, bamunyina bapangile icaba nge cintamba, ica mbao mu menshi ayalefika mu makufi. Nangu ca kutila balefutubala fye pa mulandu wa kuba mupepi na palafu, takwali wa kubapumfyanya pa nshita icilonganino calebaka Icibukisho mu nsansa.
2 Umupampamina wa bamunyinefwe mu Ukraine uwa kufwaya ukumfwila ifunde lya kwibukisha imfwa ya kwa Yesu walelangilila ukutemwa kwakulisha uko bakwatile Lesa. (Luka 22:19; 1 Yoh. 5:3) Lyonse ilyo twaba na mafya, shi lekeni ici ca kumwenako citukoseleshe no kupampamina pa kusangwa ku Mulalilo wa kwa Shikulu pa April 4. Nga twacite fyo, tukalanga ukutila na ifwe twaba nga kemba wa malumbo uwaimbile ati: “Temweni Yehova, mwe babile bakwe bonse; aba cishinka.”—Amalu. 31:23.
3 Afweni Bambi Ukukula mu Kutemwa Lesa: Ukutemwa Lesa kuti kwatucincisha ukulaalikako bambi ukwisaibukisha imfwa ya kwa Yesu na ifwe. Ubutumikishi Bwesu Ubwa Bufumu ubwa February bwakoseleshe ifwe bonse ukulemba amashina ya bo tulepanga ukulaalika ku Cibukisho. Bushe mulebombela pa kulaalika abantu bonse mwalembele amashina? Londolweleni abantu ubucindami bwa Cibukisho. Pa kusangwako, limbi icingabakoselesha kubacinkulako ulwa bushiku ne nshita ya Cibukisho kabili, nga kuti cabomba, balombeni ukwendela pamo na imwe.
4 Ilyo muli ku Cibukisho, esheni na maka yenu yonse ukuposha abo mwalaalike, kabili mwi-ifinya pa kuti na bo bangukilwe. Bushe kuti mwabafwa shani ukukula mu kutemwa Yehova? Iteyanyeni ukubasukila amepusho bakwete ukwabula ukushimba. Iteyanyeni ukutendeka isambililo lya Baibolo nga kwamoneka inshita ya kucite co. Balaalikeni ukusangwa ku kulongana tukwata cila mulungu. Baeluda balingile ukwangwa sana Abena Kristu banaka abasangilweko. Kuti bateyanya ukutandalila abantu ba musango yo no kubakoselesha ukubukulula ukubombela pamo ne cilonganino, limbi kuti babomfya ifyebo fya mu lyashi lya Cibukisho.—Rom. 5:6-8.
5 Ukulenga Ukutemwa Twatemwa Yehova Ukushikilako: Ukwetetula pa ca bupe ca cilubula kuti kwalenga ukutemwa twatemwa Yehova no Mwana wakwe ukushikilako. (2 Kor. 5:14, 15) Nte umo uushapuswapo ku Cibukisho pa myaka iingi atile: “Tulafwaisha ukusangwa ku Cibukisho. Cila mwaka cilaya cilecindaminako fye. Ndeibukisha ilyo naali mu cikuulwa umo bapekanishisha ukuya ku kushiika abafwa imyaka 20 iyapita, ilyo naloleshe pa citumbi ca batata e lyo naishilecindamika sana icilubula. Ilyo batata bashilafwa naishibe ilyashi pa cilubula ku mutwe fye. Nalishibe na malembo yonse ayalanda pa cilubula ne fya kuyalondolola! Lelo ilyo naponenwe ne mfwa ya batata e lyo umutima wandi wacilwike mu nda yandi ku nsansa pa co icilubula caumo mutengo cikatucitila.”—Yoh. 5:28, 29.
6 Ilyo ubushiku bwa Cibukisho bulepalamina uno mwaka, etetuleni pa bucindami bwa ubu bushiku. (2 Imila. 19:3) Etetuleni pa fya kubelenga kwaibela ukwa Baibolo ukwa Cibukisho, ukuli mu katabo ka Ukubebeta Amalembo Cila Bushiku—2004 na muli 2004 Kalenda. Bamo balitemwa ukupituluka mu fipandwa 112-16 ifyaba mu citabo ca Umuntu Wakulisha pa nshita ye sambililo lya lupwa. Bambi na bo balafwailapo ifyebo na fimbi ifyapekanishiwa ne bumba lya musha wa cishinka kabili uwashilimuka. (Mat. 24:45-47) Mwi pepo lyafuma pa nshi ya mutima kuli Lesa ifwe bonse kuti twatasha pa ca bupe ca cilubula. (Amalu. 50:14, 23) Muli ino nshita ya Cibukisho, shi natutwalilile ukwetetula pa kutemwa kwa kwa Yehova no kufwaya inshila sha kulangilamo icitemwiko cesu kuli wene.—Marko 12:30; 1 Yoh. 4:10.