Ica Kulya ca ku Mupashi ica pa Nshita Yalinga
1. Bushe Esekiele 36:29 ilefishiwapo shani leelo?
1 “Nketa ku ngano no kushifusha; nshakalete pali imwe icipowe,” cisemo ca kwa Shikulu Mulopwe Yehova. (Esek. 36:29) Aya mashiwi ya kusesema yakuma abantu ba kwa Lesa leelo. Ukulandila mu mampalanya, Yehova alilenge ngano, ishitantalisha ubumi, ukupuuke shingi nga nshi ku bantu bakwe. Ica kulya ca ku mupashi ica pa nshita yalinga, icipeelwa pa kulongana kwa citungu, e cilangililo ca cintu tulelandapo.
2. Bushe Yehova abomfya shani ukulongana kwa citungu ku kupeela ifya kulya fya ku mupashi pa nshita yalinga?
2 Pa kulongana ku kalamba ukwali pa Columbus, Ohio, mu 1931, Yehova atungulwile bakapepa bakwe ukuinika ishina lipya ilya kuti Inte sha kwa Yehova. (Esa. 43:10-12) Mu 1935 ibumba likalamba ilya pa Ukusokolola 7:9-17 lyalishibikwe bwino bwino. Mu 1942, Munyinefwe Knorr alandile ilyashi lyaleti “Umutende—Bushe Kuti Watwalilila?” Lilya lyashi lyaluminishe umulimo wa kushimikila isonde lyonse kabili lyalengele ukuti kube ukupanga isukulu lya bamishonari ilya Watchtower Bible School of Gilead. Nelyo ca kuti ukulongana kukalamba kumo takulabwa, konse kwaba nge tebulo lya ku mupashi apaba ifilyo ifingi nga nshi ifipeelwa pa nshita yalinga.—Amalu. 23:5; Mat. 24:45.
3. Cinshi tufwile ukucita pa kumwenamo mu mutebeto wa ku mupashi pa kulongana kwa citungu?
3 Bushe Imiliile Yenu Yaba Shani? Kuti cacitika ukulwala insala ilyo pali ne fya kulya nga ca kuti tatuleibikilishako ukulya. (Amapi. 26:15) E fyo caba na ku fya ku mupashi. Pa kulongana kukalamba kumo, casangwa ukuti abengi balendauka nelyo ukushimika ilyashi mu nshita ya kulongana. Nangu line ukulanshanya kwa kukoselesha kwalicindama pali uku kulongana, lelo inshita isuma iya uku kulanshanya ni pa ntanshi nelyo pa numa ya kulongana. (Luk. Mil. 3:1, 7) Nga tatwikele pa fipuna no kulakutikisha ifilelandwa, kuti twapuswa icebo cacindama. Bakangalila ba madipartimenti ya pa kulongana e lyo na bamunyinefwe abapeelwe imilimo, limo kuti balanshanya ifikumine ukulongana mu nshita ya kulongana. Lelo ilyo bashilebomba iyi milimo, bafwile ukuba ica kumwenako pa kupoosa amano ku filelandwa. Takuli nangu umo uufwile ukupuswa ica kulya ca ku mupashi iciteyanishiwe.—1 Kor. 10:12; Fil. 2:12.
4. Kuti twatootela shani pa ca kulya ca ku mupashi icapaka ico Yehova atupeela?
4 Ala tulasekelela mu cine ca ku mupashi icapaka ico Yehova ateyanya, icapusana sana ne fisambilisho fya bufi umushaba umulyo ifya mu Kristendomu! (Esa. 65:13, 14) Inshila imo iyo ‘twingabelamo abatootela,’ kumona ukulongana kwa citungu ukuti e nshita ya kusambilishiwa na Yehova. (Kol. 3:15) Pooseni amano ku filelandwa ukucila ukupoosa amano kuli kalanda, kabili moneni ubukombe ngo bulefuma kuli “Kasambilisha” wesu. (Esa. 30:20, 21; 54:13) Pooseniko sana amano. Lembeni fye ifyebo finono ifya pa fishinka fikalamba. Pitulukeni mu fishinka fikalamba ifya ubo bushiku cila cungulo. Citeni ifyo mwasambilila.
5. Bushe ukulongana kwa citungu kutupeela finshi ifitulenga ukusekelela?
5 Ukulongana kwa citungu konse uko tukwata ilyo Armagedone ishilaisa, nampo nga kwabela mu nkambi sha mbutushi, mu calo umwaba inkondo, nelyo umwaba umutende, kuba kucimfya Satana! Ngo lupwa ulwaikatana, twalicindamika inshita ya kubungana pamo pa kulongana kwa citungu. (Esek. 36:38) Natucetekela na kabili ukuti Yehova, mu kutemwa kwakwe, akatuteyanisha “umulingo wa filyo pa nshita yalinga.”—Luka 12:42.
[Akabokoshi pe bula 4]
Tasheni pa ca Kulya ca pe Tebulo lya kwa Yehova
◼ Pooseniko sana amano
◼ Lembeni ifishinka fikalamba
◼ Pitulukeni mu fishinka fikalamba ifya ubo bushiku cila cungulo
◼ Citeni ifyo mwasambilila