Ulubali 2—Ukutungulula Amasambililo ya Baibolo Ayalunduluka
Ukupekanishisha Libela Ukutungulula Isambililo
1 Pa kuti tufunde bwino umusambi pe sambililo, icikabilwa te kulanda fye pa fyebo no kubelenga amalembo. Tufwile ukutungulula isambililo ica kuti twafika umusambi pa mutima. Pa kucite ci, kano twapekanya bwino uku ninshi tuletontonkanya pa fingafwa umusambi.—Amapi.15:28.
2 Ifya Kupekanya: Intanshi pepeleni uyo muntu kuli Yehova e lyo no kupepela ifyo alekabila. Lombeni Yehova ukuti amwafwe ukufika umusambi pa mutima. (Kol. 1:9, 10) Pa kuti mumfwikishe icilelandwapo sana mwi sambililo, taleni bebeteni umutwe wa cipande nelyo sambililo, bebeteni no tumitwe tunono, ne fikope fyonse ifilimo. Ipusheni mwe bene ati, ‘Cinshi ili sambililo lilelandapo sana?’ Ici cikamwafwa ukukomaila pa fishinka fikalamba ilyo muletungulula isambililo.
3 Pitulukeni bwino bwino muli paragrafu umo na umo. Fwayeni ifyasuko ku fipusho fili mu cipande, no kushila fye pa fishinka. Moneni ifyo amalembo yalimo yampene ne cishinka cimo na cimo icili muli paragrafu, kabili saleni amalembo ya kuyabelenga pe sambililo. Kuti camwafwa ukulemba ifyebo finono mu mbali ye pepala mu citabo. Umusambi afwile ukumona bwino bwino ukuti ifyo alesambilila filefuma mu Cebo ca kwa Lesa.—1 Tes. 2:13.
4 Tungululeni Isambililo Ukulingana no Kukabila kwa Musambi: Icakonkapo, tontonkanyeni pa fyo isambililo lingafwa umusambi. Esheni ukwelenganya amepusho engepusha e lyo ne fingamukosela ukuumfwa nelyo ukusumina. Ipusheni mwe bene amuti: ‘Finshi afwile ukwishiba nelyo ukubombelapo pa kulunduluka lwa ku mupashi? Kuti namufika shani pa mutima?’ Lyene musambilisheni ukulingana ne fyo fine. Limo kuti mwamona ukuti mufwile ukupekanye cilangililo, ukulondolola fimo, nelyo ukwipushe ifipusho fimo pa kuti mwafwe umusambi ukuumfwikisha umulolele icishinka cimo nelyo ilembo. (Nehe. 8:8) Lelo mwibikamo ifyebo ifishileumfwana ne cilelandwapo sana mwi sambililo. Ukupitulukamo panono pa numa ye sambililo kukamwafwa ukwibukisha ifishinka fikalamba.
5 Ala tulatemwa abapya nga batwala ifisabo fya bulungami ifiteemuna Yehova! (Fil. 1:11) Pa kubafwa ukutwale fi fisabo, pekanyeni bwino cila nshita ilyo tamulatungulula isambililo.