Kampeni Waibela uwa Kwananya Broshuwa Mupya
1 Abengi pali lelo balacushiwa ne mibele ya mu calo, lelo banono fye baishiba umulandu ifintu fyabela ifi, tabaishiba uko ifintu filelola, ne fyo balingile ukucita pa kuti bakapusuke ubupingushi buli ku ntanshi. (Esek. 9:4) Pa kubafwa ukwishiba ubupilibulo bwa nshita tufikilepo, kukaba kampeni waibela uwa kwananya broshuwa mupya uuleti Mulelola! ukutampa pali Cimo, October 18, ukuyafika pa Mulungu, November 14.
2 Broshuwa kuti apeelwa mu mulimo wa ku ng’anda ne ng’anda, pa fipempu fya kubwelelamo, na mu bunte bwa kulanshanya mu misebo, nangu ilyo tuli pa cintubwingi. Lelo, broshuwa wa kuti Mulelola! te wa kupeela icipelepele. Ukucila, uyu broshuwa alingile ukupeelwa fye ku balefwaisha ukwishiba ifyo Baibolo ilanda pa bupilibulo bwa filecitika mu calo. Abashilemoneka ukupoosako amano kuti twabapelelamo trakiti.
3 Nalimo kuti mwakolopeko muntu pa kulando kuti:
◼ “Abantu abengi balisakamikwa sana pa mafya yabipisha ne fya kupapusha ificitika mu nshiku shesu. [Landeni pa bwafya bumo ubwaishibikwa mu ncende yenu.] Bushe mwalishiba ukuti ifintu fya musango yu fyalisobelwe muli Baibolo? [Lekeni basuke. Nomba belengeni lembo ilikatene no bwafya mulandilepo, pamo nga Mateo 24:3, 7, 8; Luka 21:7, 10, 11; nelyo 2 Timote 3:1-5.] Baibolo ilalondolola umwalola ifilecitika mu nshiku shesu ne fikacitikila abantu ku ntanshi. Bushe kuti mwafwaya ukwishiba ifyafulilako? [Lekeni basuke. Tambikeni broshuwa nga ca kuti balefwaya icine cine.] Kuti twamupeela uyu broshuwa ukwabula ukulipilisha. Lelo nga mulefwaya ukupeela ubupe bwalinga ku mulimo wesu uwe sonde lyonse, kuti twatasha nga nshi.”
4 Inshila imbi na yo kuti yabomba pamo nge yi:
◼ “Abengi muno nshiku nabatendwa ku fya kucitika fya kupapusha nelyo ifyabipa ifibaponena. Bamo balapapa umulandu Lesa talesesha no kucilima ifya musango yu. Baibolo yatulayo kuti nomba line fye Lesa akafumyapo ifilecusha abantu. Moneni ifyo Lesa akacitila abantu bonse. [Belengeni Amalumbo 37:10, 11.] Bushe kuti mwatemwa ukwishibilapo na fimbi?” Kuti mwabomfya insondwelelo imo iine iili mu paragrafu 3.
5 Esheni ukulemba ishina ne cifulo ukwikala umuntu onse uwapokako broshuwa, no kuipekanya ukubwelelako ukuyalundulula ukufwaisha kwakwe. Imitubululo pa fyo ici cingacitwa ikaba mu Ubutumikishi Bwesu Ubwa Bufumu ubwa November 2004. Nga ca kuti umuntu alefwaisha sana pa muku wa kubalilapo mwakumana nankwe kuti mwatampa isambililo lya Baibolo apo pene fye, nga mulefwaya kuti mwabomfya broshuwa wa kuti Mulelola! nangu ulupapulo lumbi pamo nga broshuwa wa Cintu Lesa Afwaya.
6 Uyu broshuwa mupya akananishiwa pa Kulongana kwa Mulimo ukukabako ilyo cino cipande cikalasambililwa. Tuletubululo kuti pa kutampa bakasabankanya na bapainiya bakapoke fye amabroshuwa ayo bengaba na maka ya kushalika mu nshiku shinono isha kubalilapo muli uno kampeni. Shi Yehova napaale uyu mulimo waibela. Ici cikaleta ilumbo kuli wene kabili aba mitima ya bufumacumi na bo bakanonkelamo mpanga yonse.—Amalu. 90:17.