Tooteleni Yehova pa Luse Lwakwe
Icibukisho ca Mfwa ya kwa Kristu Cikaba pa March 24
1. Bushe Yehova atulanga shani uluse?
1 Kemba wa malumbo abilishe ukuti: “Lekeni batootele Yehova pa luse lwakwe, ne fipesha amano ifyo acita ku bana ba bantu.” (Amalu. 107:8) Uluse lwa kwa Lesa lwalicila pa cikuuku ico akwatila abantu bakwe. Kuti twashininkisha ici ku mashiwi yaputwamo aya kutasha aya kuti: “Uluse lwenu lwantungilila, mwe Yehova.” (Amalu. 94:18) Ulu, luse lwaibela icine cine ulo Yehova alaanga pa kututumina Umwana wakwe uwafyalwa eka!—1 Yoh. 4:9, 10.
2. Kuti twalanga shani ukuti tulatasha kuli Yehova?
2 Ilyo ubushiku bwa Cibukisho bulepalamina, ni shani twingatasha ‘Lesa uucito luse’? (Amalu. 59:17) Ifwe bonse tufwile ukushako inshita ya kutontonkanya pa nshiku sha kulekelesha isha kwa Yesu ilyo ali pe sonde. (Amalu. 143:5) Tukanonkelamo nga twalabelenga Amalembo yatantikwe mu nshita ya Cibukisho, ayali mu katabo ka Ukubebeta Amalembo Cila Bushiku—aka mu 2005 kabili nga kuti cacitika kuti caba bwino ukufwailapo ifyebo na fimbi mu citabo ca Umuntu Wakulisha ifipandwa 112-16. Kuti mwamona na mu mpapulo shimbi ishilanda pali Baibolo. Mukaletontonkanyapo sana pa fyebo mukalabelenga, no kufyumfwikisha. (1 Tim. 4:15) Ukusambilila Icebo ca kwa Lesa pamo ne pepo takukosha fye umutima wesu lelo kulalanga ne fyo twatemwa Yehova.—Mat. 22:37.
3, 4. (a) Kuti twapashanya shani bamunyinefwe aba ku Liberia? (b) Ni bani mulepanga ukwita ku Cibukisho?
3 Cincisheni Bambi Ukutasha Lesa: Umwaka wapwile abantu 16,760,607 e basangilwe ku Cibukisho isonde lyonse. Mu mushi wa ku calo ca Liberia, bamunyinefwe balembeele mwine mushi kalata ukumweba ukuti balefwaya bakasefye Umulalilo wa kwa Shikulu mu mushi wakwe. Mwine mushi asumininshe bamunyinefwe ukubomfya icibansa ca mupila icali muli ilya ncende kabili apishishemo imbila mu mushi onse, ukwita abantu ukusangwa ku Cibukisho. Nangu ca kutila bakasabankanya bali fye basano muli ulya mushi, abasangilwe ku Cibukisho bali 636!
4 Na ifwe bene tulefwaya ukucita cimo cine, ukwafwa abantu abengi ukwisasangwa ku Cibukisho. Mulandu nshi te kuti mulembele abo mulepanga ukwita ku Cibukisho? Ku nkupo ya ku numa iya Ulupungu lwa kwa Kalinda ulwa March 15 pali ifyo twingacita pa kwita abantu. Kuti mwabomfya no tupepala utwapulintwa ku kwita abantu ukusangwa ku Cibukisho. Taipeni nelyo lembeni bwino bwino inshita ne cifulo ukukabela Icibukisho, kabili peleni abo muketa. Ubushiku bwa pa March 24 nga bwaya bulepalamina, tandalileni bonse abo mwaita no kumfwa bwino bwino nga bakasangwa ku Cibukisho.
5. Ni shani twingakoselesha amasambililo ya Baibolo ukusangwa ku Cibukisho?
5 Kuti twaafwa shani abasambi abashilatendeka ukwisa ku kulongana ukuipakishe Cibukisho? Lyonse ilyo muletungulula isambililo muleshako inshita inono iya kwaafwa umusambi ukumfwikisha ifyo Icibukisho cacindamina. Kuti mwabelenga ifyebo na fimbi ifisuma mu Ulupungu lwa kwa Kalinda ulwa March 15, 2004, amabuula 3-7, na mu citabo ca, Ukupelulula amabula 113-7.
6. Mulandu nshi cacindamina ukusengela abeni pa bushiku bwa Cibukisho?
6 Pokeleleni Abeni: Landeni na beni abaleisa ku Cibukisho kabili bapokeleleni. (Rom. 12:13) Ikaleni nabo mwitile ku Cibukisho kabili shininkisheni ukuti nabakwata Baibolo no lwimbo. Tukalakabila ukuitendekelako ukuposha bamunyinefwe na bankashi bonse abanaka, ababombeshe ukusangwa ku Cibukisho. Ukubapokelela mu cikuuku kuti kwabafwa ukutendeka ukulasangwa lyonse ku kulongana. (Luka 15:3-7) Pali ubu bushiku bwacindama ubwa Cibukisho, shi natukabombeshe ukukoselesha abantu bambi ukutootela Yehova pamo na ifwe pa ‘luse lwa kwe ulwa kupapa.’—Amalu. 31:21.