Citenipo Fimo pa Kuti Mukwate Ishuko lya Kushimikila Abantu
1 Mu cilonganino ca Bena Kristu mwaba abantu balekanalekana. Lelo, tufwaisha ukulumbanya Yehova capamo. (Amalu. 79:13) Nga ca kutila ukulwalilila nelyo amafya yambi yalelenga twilashimikila sana, kuti twacita shani pa kuti tukwate ishuko lya kushimikila?
2 Mu fyo Mucita Cila Bushiku: Muli fyonse ifyo Yesu alecita, alesangako inshila ya kushimikilamo abantu aleba na bo. Alandile na Mateo ilyo alepita apo balesonkela imisonko, alandile na Sakeo ilyo ali pa lwendo, kabili alandile no mwanakashi umwina Samaria ilyo aletuusha. (Mat. 9:9; Luka 19:1-5; Yoh. 4:6-10) Na ifwe ilyo tulecite ifintu fyalekanalekana, kuti twashimikila abantu ilyo tulelanda na bo ilyashi. Nga tulesenda Baibolo, na matrakiti nelyo amabroshuwa, tukafwaisha ukulanda pe subilo lyesu pantu ninshi natuipekanya ukulanda.—1 Pet. 3:15.
3 Bushe ukulemana kulalenga mwalafilwa ukubombako umulimo wa ku ng’anda ne ng’anda? Kuti mwalashimikila ababomba mu cipatala abaleisa ku kumumona na bonse abo mwingamonana na bo. (Imil. 28:30, 31) Nga ca kutila ilingi line mwikala fye pa ng’anda pa mulandu wa mafya yamo yamo, bushe mwalyeshako ukushimikila pa lamya nelyo muli bakalata? Nkashi umo lyonse alalemba bakalata ku bantu bakwe abashili baNte. Muli bakalata alalembamo ifyebo fya kukoselesha ifyaba mu Baibolo e lyo ne ficitika ilyo aleshimika ubunte.
4 Ku Ncito Nelyo ku Sukulu: Ukufwaisha ukulumbanya Yehova kukalenga no kuti tulecitako fimo ifingatupeela ishuko lya kubyala imbuto sha cine ilyo tuli ku ncito nelyo ku sukulu. Bushiku bumo kasabankanya uwali ne myaka 8 aleshimikila aba mu kalasi bonse ifyo abelengele muli Loleni! ifyalelanda pa mweshi. Ilyo kafundisha aishibe uko abelengele ifi fyebo, atampile ukulapokako lyonse Ulupungu lwa kwa Kalinda na Loleni! Nga tulebika icitabo ca Baibolo Isambilisha pa mbilibili ilyo tuli ku ncito, bambi kuti baipusha amepusho yengalenga twabashimikila.
5 Kuti mwafwaya ica kucita pa kuti mukwate ishuko lya kushimikila abantu mu fyo mucita cila bushiku. Lekeni lyonse tuletuula “ilambo lya kulumbanya kuli Lesa” pa kushimikila abantu lyonse ilyo kwabe shuko lya kushimikila.—Heb. 13:15.