Ebeniko Bambi pa “Lubuuto lwa Calo”

1. Lubuuto nshi ulukalamba ulwasobelwe mu Cebo ca kwa Lesa, kabili cintu nshi icilenga twabikako sana amano ku kulanda pali ulu lubuuto?

¹ Yehova asobele muli kasesema Esaya ukuti: “Abantu abaleenda mu mfifi, nabamono lubuuto lukalamba; abekashi ba mu calo ca kufiita kwa mfwa, ulubuuto nalubalikila pali bene.” (Esa. 9:2) Ulu “lubuuto lukalamba” lwaishibikilwe ku milimo ya Mwana wa kwa Lesa, Yesu Kristu. Umulimo alebomba ilyo aali pe sonde na mapaalo yafumine mu kuipeelesha kwakwe yaafwile abali mu mfifi ya ku mupashi. Ulu lubuuto e lo abantu bakabila muli ino nshita ya mfifi. Umulaalilo wa kwa Shikulu ulatupeela ishuko lyaibela ilya kwebako bambi pa “lubuuto lwa pano calo.” (Yoh. 8:12) Uyu mwaka wapwile, abengi balangile ukuti balikweteko icitetekelo pantu twaumfwilile pamo na bo ifunde lya kwa Yesu ilya kuti: “Mulecite ici ku kunjibukisha.” (Luka 22:19) Apo Icibukisho ca uno mwaka cili mupepi, cinshi twingacita pa kuti twebeko bambi pa lubuuto lukalamba ulo Yehova alenga ukuti lulebalika?—Fil. 2:15.

2. Cinshi cingalenga tuletasha sana ukufuma pa nshi ya mutima pa cilubula, kabili bushe ukucite ici kukatukuma shani?

² Sambilileni Ukutasha Ukufuma pa Nshi ya Mutima: Inshita ya Cibukisho (March ukufika mu May) ni nshita ya kutontonkanya sana pa fyo Yehova na Yesu balanga ukutila balitemwa sana abantu mu kupeela abantu icilubula. (Yoh. 3:16; 2 Kor. 5:14, 15) Nga tuletontonkanyapo sana pali uyu mulandu twakulatasha nga nshi pali ici cintu cacindamisha. Abantu ba kwa Lesa bonse bafwile ukukwata inshita ya kubelenga no kutontonkanya pa Malembo yalanda pa Cibukisho ayaba mu katabo ka Ukubebeta Amalembo Cila Bushiku. Ukutontonkanya pa mibele yapulamo iya kwa Yehova, iyamoneka bwino sana pa mulandu wa cilubula atupeela, kulalenga tulesekelela ukuti ni Lesa wesu. Ukutontonkanya pa busuma ubo icilubula catuletela kulakusha icitemwiko cesu muli Lesa no Mwana wakwe kabili kulalenga tulebombesha mu kucita ukufwaya kwa kwa Lesa.—Gal. 2:20.

3. Bushe kuti twalangisha shani ukutasha pa Cibukisho?

³ Nga tuletasha sana Yehova pa kupekanya inshila ye pusukilo, insansa shesu pa kwishiba ukuti Icibukisho cili mupepi shikamoneka ku basambi besu aba Baibolo, ku fipempu fya kubwelelamo, ku bantu besu, ku bena mupalamano besu, ku bo tuya na bo ku sukulu, ku bo tubomba na bo, na kuli bambi abo twitileko kuli uku kulongana kwaibela. (Luka 6:45) E ico, bombesheni ukwitako aba bonse, mukabapeele no tupepala twa kubetilapo pa kuti bakaleibukisha ukuti baalitwa. Pa kuti mwikalabapo nangu umo, kuti mwacita nga filya bakasabankanya abengi bacita, abaalembela limo amashina ya abo beta lyonse ku Cibukisho, e lyo cila mwaka balalundako amashina na yambi. Inshila isuma iyo twingatashishamo Yehova Lesa “pa ca bupe cakwe icishingalondololwa,” kuba abaiteyanya bwino no kucita conse icingaba mu maka yesu ukwitako abalesekelela ku Cibukisho.—2 Kor. 9:15.

4. Cinshi cingatwafwa ukulundako inshita ya kubombako umulimo mu March na mu April?

⁴ Lundeniko Inshita mu Mulimo: Bushe kuti mwalundako inshita mukabomba mu mulimo mu March na April? Tukapaalwa na Lesa nga twabomba apapela amaka yesu ukwebako bambi “mbila nsuma ya bukata bwa kwa Kristu.” Yehova, Intulo ya lubuuto lonse ulwa ku mupashi, atwebo kuti: “Ulubuuto nalubalike ukufuma mu mfifi.” (2 Kor. 4:4-6) Nga ca kutila baeluda bamona ukuti balekabila ukulundako imiku ya kukumana kwa mulimo wa mwi bala ne fifulo bakalakumaninapo, kuti bacite co pa kuti batungilila bakasabankanya abalefwaya ukulundako inshita bengabombako. Limbi kuti batantika ukulabomba ulucelocelo mu musebo nelyo ukubombela mu cifulo ca makwebo nelyo ubunte bwa pali foni inshita ya kasuba nelyo icungulo kasuba. Pa kuti mukalundeko inshita ya kubombako umulimo wa mwi bala, pangileni limo amaawala mukabomba, kabili bombesheni pa kuti mukafikilishe. Abengi bamona ukubombako bupainiya bwa kwafwilisha nge nshila bengapeelelamo Yehova ifyawamisha.—Kol. 3:23, 24.

5. Bushe abengi balemwenamo shani ifi amaawala ya bapainiya ba kwafwilisha yacefiwa?

⁵ Bushe Kuti Mwabombako Bupainiya bwa Kwafwilisha? Papita imyaka 7 apo bacefeshako amaawala ya bapainiya ba kwafwilisha. Ukucite fi kwalilenga abengi ukubombako no kuipakisha umulimo. Bushe mwalibombapo? Bamo balabombako cila mwaka. Mu filonganino ifingi bakasabankanya balapangana ukubombela pamo uyu mulimo, kabili iyo nshita ya mwaka ilaba ni nshita isuma icine cine mu cilonganino. Bushe na imwe kuti mwabombako bupainiya bwa kwafwilisha mu nshita ya Cibukisho (March ukufika mu May)? Umweshi wa April kuti wawama ukubombako pantu ukwete Ifibelushi fisano ne nshiku sha Mulungu shisano.

6. Fisuma nshi batuteyanishishe?

⁶ Bushe icilonganino cenu cikatandalilwa na kangalila wa muputule mu March nelyo mu April? Kanshi namukwata ishuko na limbi. Nga filya babilishe, mu 2006, bonse abakaba bapainiya ba kwafwilisha mu mweshi uo kangalila wa muputule akalatandala, bakasangwa ku kukumana kwa bapainiya na kangalila pa maminiti 30. Te kuti tutwishike ukuti ukukoshiwa kwa ku mupashi ukukapeelwa pali uku kukumana kukafwa sana bapainiya ba kwafwilisha ukufwaisha ukuba bapainiya ba nshita yonse. Kabili, mu March tukaba ne shuko lya kwafwilisha abantu ukwisa mu lubuuto lwa ku mupashi pa kubomfya icitabo cipya icitila Bushe Cinshi Baibolo Isambilisha? Bushe kwena te kuti ciwame nga mwapanga ukutendeka isambililo lya Baibolo muli ulu lupapulo lupya?

7, 8. (a) Cinshi cingatwafwa ukutantika bwino inshita ya kubombako bupainiya bwa kwafwilisha? (b) Bushe ulupwa kuti lwabombela shani pamo, kabili bushe ulupwa lonse kuti lwanonkelamo shani?

⁷ Ilyo muletontonkanya pa maawala 50 ayafwaikwa kuli bapainiya ba kwafwilisha, pekanyeni ifyo mukalabomba pa kuti mukalebeeka ulubuuto lwa cine pa maawala 12 cila mulungu. Lanshanyeni na babombapo kale uyu mulimo, e lyo na bakasankanya bambi. Nga mwacite fyo limbi na bo kuti balembesha. Ukuiteyanya bwino kwalenga bakasabankanya babatishiwa, abaice na bakalamba ukubomba bwino uyu mulimo ukwabula no bwafya. Pepelenipo. Lyena, kuti mwaipekanya ukubombako, no kuipakisha bupainiya!—Mal. 3:10.

⁸ Indupwa ishingi shasanga ukuti nga ca kutila baumfwana umo mu lupwa kuti abombako bupainiya. Ulupwa lumo umwaba abantu basano ababatishiwa lwasalilepo ukubombela pamo bupainiya bwa kwafwilisha. Abana bambi babili abali tabalabatishiwa balibombele amaawala ayengi ukucila ifyo balebomba lyonse. Bushe ulupwa lwaumfwile shani pa kubombesha kwa musango yu mu mulimo? Balembele ukuti: “Ala uyu mweshi walituwamine icine cine, kabili ulupwa lwesu lwalikatene nga nshi. Tuletasha Yehova pe paalo lyakwe!”

9. Bushe kuti twabeeka shani ulubuuto mu nshita ya Cibukisho?

⁹ Bushe ukubombesha kwesu mu March na mu April kukatwafwa ukupalama kuli Shifwe wa ku muulu? Cikaba fye ku fyo mwe bene mukabomba ne fyo mukaibikilishako mu kutemwa Lesa no Mwana wakwe e lyo ne nshita mukalundako ukubomba umulimo. Shi natube nga filya kemba wa malumbo aali uwaimbile ukuti: “Ndetootesha kuli Yehova ku kanwa kandi, kabili mu kati ka bengi ndemutasha.” (Amalu. 109:30) Yehova akapaala ukubombesha kwesu mu nshita ya Cibukisho. E co natulebeeka ulubuuto lukalamba pa kuti abantu abengi bafume mu mfifi no ‘kuba no lubuuto lwa bumi.’—Yoh. 8:12.