Uutwafwa Lyonse
1. Cinshi cingalenga umuntu ukuleka ukubomba imilimo ya Bwina Kristu?
1 Anna, nkashi uwaupwa ku ushili Nte kabili uubomba incito iimushilako fye inshita iyinono, calemukosela ukusangwa lyonse ku kulongana kwa Bwina Kristu, ukushimikila, no kubelenga Icebo ca kwa Lesa. Nangu ca kuti alitemenwe Yehova, alilekele ukubomba imilimo ya Bwina Kristu. Icaweme ca kuti baeluda balimwafwile ukukosa mu kupepa na kabili.
2. Bushe Abena Kristu bonse kuti balecita shani pa kuti baleafwa bambi lyonse?
2 Umuntu nga asumina ukwafwa kwa ku mupashi ukufuma ku cilonganino ca Bena Kristu ninshi alicetekela Yehova. Baeluda mu cilonganino, abapashanya ukutemwa ne cikuuku ca kwa Yesu Kristu, balafwaya inshila bengakoseshamo bambi no kwafwa abali na mafya ya ku mupashi. (1 Tes. 5:14) Ilingi line icikabilwa fye, kubebako amashiwi ya kukoselesha ukufuma pe lembo ilingabakosha. Abafwile ukuitendekelako ukubika amano ku kwafwa abanakile te baeluda fye beka iyo, Bena Kristu fye bonse. Ukwabula no kutwishika ifwe bonse twalimona ifyo “icebo icasoswa apayene” cawama.—Amapi. 25:11; Esa. 35:3, 4.
3, 4. Bushe finshi fyasanshiwa mu kwafwa bambi, kabili bushe kuti twabafwa shani?
3 Muleitendekelako: Nga tulefwaya ukusakamana abalekabila ukwafwa, tufwile ukuitendekelako, ukubalangulukilako, no kuba no mukoosha wa kubafwa. Ilyo Yonatani aishibe ukuti Davidi balemulunga nge nama, “aliimine, aile kuli Davidi mu Horesha, alakoselesha no kuboko kwakwe.” (1 Sam. 23:15, 16) Muleba ne cikuuku pa kwafwa abantu bambi. Nga mulefwaya ukwafwa umuntu, mulelanda amashiwi ayalelanga ukuti mwalimusakamana. Kabili, Yesu alitusambilishe bwino bwino ukuti nga tulefwaya ukuwikisha munyinefwe nelyo nkashi tufwile ukuba no mukoosha. (Luka 15:4) Nga tulefwaisha ukwafwa umuntu umbi tukatwalilila ukulamwafwa nangu cilemoneka kwati talelunduluka bwangu.
4 Ala abantu bambi, pamo nga abo twaba na bo mwi sambililo lya citabo, balakoseleshiwa nga nshi nga twaitendekelako ukubeba ukuti tulefwaya ukubomba na bo mu mulimo! Ilyo tuleafwa umubomfi munensu uwa kwa Yehova ukulabombako umulimo, kuti twamwafwa no kukosa mu mulimo wa kwa Lesa. Ukubombela pamo mu mulimo wa kwa Yehova kulakoselesha sana abalepuputulwa lwa ku mupashi.
5. Bushe limo limo baeluda kuti bacita shani pa kwafwa bambi?
5 Ubwafwilisho Busuma: Abaleka ukushimikila no kulongana pa nshita imo kuti bakabila ubwafwilisho na bumbi pa kuti icitetekelo cabo cikoseleko. Icingabafwa, kusambilila na bo Baibolo mu citabo ca Pepeni Lesa Wine Wine Eka, icitabo ca Palameni Kuli Yehova, nelyo ica Bushe Cinshi Baibolo Isambilisha? Apo uyu muntu alibatishiwa kale, isambililo te kuti litwalilile pa nshita yalepa. Komiti wa Mulimo pa Cilonganino afwile ukumona abantu bengakabila ukwafwa kwa musango yu.—Moneni Ubutumikishi Bwesu Ubwa Bufumu ubwa November 1998 no bwa November 2000 pa Mukululo wa Fipusho.
6. Bushe nkashi umo apuupuutwike shani?
6 Anna, ulya tulandilepo kale, alitemenwe pa kwafwa kwa baeluda, abamupeele nkashi wafikapo ukulamusambilisha Baibolo. Basambilileko fye imiku 4, muli iyo ine fye nshita alipaleme kuli Yehova na kabili. Atendeke no kusangwa ku kulongana e lyo no kulalumbanya Yehova Lesa ku cintubwingi nga filya alecita kale. Nkashi wafikapo alimwafwile ifya kubomba umulimo, alemuseenda ku masambililo yambi aya Baibolo mpaka fye akosa ica kuti alashimikila na ku ng’anda ne ng’anda. Ico uyu muntu alekabila pa kuti apuupuutuke kumwafwa cikuuku cikuuku!
7. Busuma nshi bufuma mu kukoselesha bambi lwa ku mupashi?
7 Ukukoselesha abalekabila ukwafwa kulaleta amapaalo kuli bonse. Uo baleafwa, alatemwa pa kupalama kuli Yehova no kulabombako imilimo yaba mu kuteyanya kwakwe. Baeluda balatemwa ukumona ukulunduluka kwakwe ukwa ku mupashi. (Luka 15:5, 6) Icilonganino cilekatana pantu bonse balesakamanana. (Kol. 3:12-14) E ico kanshi cisuma nga nshi ukupashanya Yehova, uutwafwa lyonse ilyo tulekabila ukwafwa!—Efes. 5:1.