Ifya Kwibukisha Ilyo Mulepekanya Icibukisho

Uno mwaka ukusefya Icibukisho kukabako pali Cimo, pa April 2. Baeluda bafwile ukubikako amano ku fyakonkapo.

◼ Ilyo muleimika inshita ya kulongana, mufwile mwaibukisha ukuti inshita ya kupishamo ifimpashanya ifwile ukuba lilya akasuba kawa.

◼ Mufwile ukweba bonse fye, kumo na kalanda, inshita ya kutendeka ukulongana e lyo no ko kukabela.

◼ Mufwile ukupekanishisha libela umukate ushatutumuka na waini ilya ine ifwaikwa.—Moneni Ulupungu lwa kwa Kalinda ulwa February 15, 2003, pa mabula 14-15.

◼ Mufwile ukupekanishisha limo imbale, amatambula ne tebulo lyalinga e lyo ne nsalu ya pa tebulo.

◼ Mufwile ukuwamisha kabela Ing’anda ya Bufumu nelyo icifulo ico mukabomfya kabili mufwile ukuwamya bwino sana.

◼ Mufwile ukusalila limo bakapyunga na ba kupishamo ifimpashanya, no kubebela kabela imilimo bakabomba kabili mufwile no kubeba ukuti bafwile ukufwala bwino no kuipempenkanya.

◼ Pekanyeni ukutwalila onse uwasubwa fimpashanya uwafilwa ukusangwa ku Cibukisho.

◼ Nga ca kutila ifilonganino fibili no kucilapo fili no kubomfya Ing’anda ya Bufumu imo, pafwile ukuba ukumfwana pa kutila pa mwinshi, mu tushila na apa kwimika bamotoka tapafulile abantu.