Pashanyeni Yesu
1. Ca kumwenako nshi Yesu aimike?
1 Ilyo tulebomba umulimo wa kupanga abasambi, twilalaba ukuti ifyo tubomba kuti fyakuma sana abantu. Yesu alesambilisha abantu mu fyo alesosa na mu fyo alecita. Abantu bambi balemona ukucincila kwakwe, ifyo atemenwe abantu, ifyo alefwaisha ukucindika ishina lya kwa Wishi, ne fyo alebombesha pa kuti fye apwishe umulimo Wishi amutumine ukubomba.—1 Pet. 2:21.
2. Bushe ica kumwenako cesu icisuma kuti cayafwa shani abalebomba na ifwe mu mulimo wa mwi bala?
2 Ilyo Tulebomba Umulimo wa ku Ng’anda ne Ng’anda: Abalebomba na ifwe mu mulimo wa mwi bala bakalatupashanya filya fine abantu bambi balepashanya Yesu. Bakasabankanya abapya na bashabelesha mu mulimo wa mwi bala, nga bamona ukubombesha kwesu mu mulimo, na bo bakatampa ukutontonkanyapo sana pa fyo bengabombesha mu mulimo. Nga bamona ifyo twatemwa umulimo e lyo bamona ne fyo twatemwa abantu, bakeshiba ukuti kanshi calicindama ukuti na bo balecita cimo cine ilyo bali mu mulimo. Nga bamona ukuti tulabomfya sana Baibolo ilyo tuli mu mulimo, tulaya ku fipempu fya kubwelelamo, kabili tulatungulula na masambililo ya Baibolo, na bo bene bakalacita cimo cine.
3. Bushe kuti twasambililisha shani abasambi ba Baibolo ku ca kumwenako cesu icisuma, kabili finshi nalimo bengasambilila?
3 Ilyo Tuletungulula Amasambililo ya Baibolo: Ifyo Amasambililo yesu aya Baibolo bakalamona sana, mibele yesu. Natulangilile, nangu ca kutila kuti twalondolwela umusambi umulandu cacindamina ukupekanishisha libela isambililo, ukubelenga amalembo, no kushila ifishinka, ico umusambi akabikako amano kumona nga tulecita ifyo tulemweba. (Rom. 2:21) Pa kuya ku kutungulula isambililo ku musambi nga tulafika pa nshita twapangana, te lingi umusambi akalaleka ifintu fimbi ukupumfyanya isambililo, akalaesha ukusunga icipangano. Fimbi ifyo bakamona kuipeelesha kwesu mu kubomba umulimo e lyo ne citetekelo cesu icakosa. E ico, bakasabankanya abapashanya bwino bwino Yesu, abasambi babo aba Baibolo ilingi line balesa mu kuba bakasabankanya ba mbila nsuma abacincila kabili abatwala ifisabo.
4. Ilyo tuli pa kulongana finshi abantu bambi basambililako kuli ifwe?
4 Ilyo Tuli ku Kulongana: Bonse fye ababa mu cilonganino ca Bena Kristu kuti basambilishako bambi ku ca kumwenako cabo icisuma ilyo bali pa kulongana. Ica kumwenako cesu icisuma kuti cayafwa abapya mu cilonganino abaletendeka ukulongana. Bakamona ifyo twatemwana, ifyo twaikatana, ne fyo tufwala ifya kufwala ifyalinga ne fyo tuipempenkanya. (Amalu. 133:1) Na kabili abapya balamona ifyo tusangwa lyonse ku kulongana kabili balamona ne fyo tubilisha apabuuta icitetekelo cesu ilyo tuli pa kulongana. Umuntu umo uwaishile ku kulongana kwesu alimwene uko akakashana kalekupukula no kusanga bwangu amalembo muli Baibolo, kalekonkamo no kukonkamo ilyo kalanda alelanda. Ilyo uyu muntu amwene ifyo aka kaice kalecita, alilombele ukuti balemusambilisha Baibolo.
5. Mulandu nshi ukuba ne ca kumwenako cisuma kwacindamina?
5 Amalembo yalatweba ukuti tufwile ukukonka ica kumwenako icisuma ica bamunyinefwe. (Fil. 3:17; Heb. 13:7) Kanshi tuleibukisha ukuti nga tulekonka sana ica kumwenako ca kwa Yesu, abantu bambi bakamona kabili na bo bakalacita cimo cine. Apo twaishiba ukuti ifyo tucita kuti fyakuma abantu bambi, natulekonka amashiwi yaba pali 1 Timote 4:16 ayatila: “Uleyangwa we mwine ne sambilisho lyobe.”