Awake! Iyaibela Iyo Tukalashalika mu November!
1 Abantu abengi balafwaisha ukwishiba ico Baibolo yacindamina. Nga ca kutila abantu e bailembele, mulandu nshi twingalandila ukuti Cebo ca kwa Lesa? Mulandu nshi ningacetekela ukuti Baibolo kuti yantungulula? Finshi ninganonkelamo nga nabika sana amano ku kubelenga no kusambilila Baibolo? Apo kwaliba amaBaibolo ayapusanapusana ayo bapilibula, bushe ninshi ni Baibolo nshi ningalabelenga? Aya e mepusho yamo yamo ayo Awake! yaibela iya November yaswike. Ikwete umutwe uuleti, “Can You Trust the Bible?”
2 Kanshi tukabombeshe ukupeela abantu abengi iyi Awake! ababa mu cifulo umo tushimikila. Cila Cibelushi mu mweshi wa November, esheni ukubombela pamo ne cilonganino mu mulimo wa ku ng’anda ne ng’anda. Peeleniko na balupwa lwenu iyi Awake!, abena mupalamano benu, abo mubomba nabo, bakafundisha benu, abo musambilila nabo, e lyo na bo mwashimikile. Sendeni iyi ine Awake! ilyo mwaya mu kushita fimo nangu ilyo mwaya mu kutandala. Iofesi lya musambo lyalitumina icilonganino cimo na cimo bamagazini na bambi aba iyi Awake!
3 Tendekeni Isambililo lya Baibolo: Nga mwapeela umuntu magazini, ilyo mushilapwa ukulanda nankwe, kuti mwalanda fimo ifingalenga afwaya ukusambilila Baibolo. Ku ca kumwenako, kuti mwasosa amuti, “Ilyo nkabwela, nkamulanga ifyo Baibolo yasuka icipusho ca kutila, ‘Bushe Lesa afwaya isonde ukuba shani?’” Ilyo mwabwelelako, sendeni icitabo ca ico Baibolo Isambilisha no kulanga uyo muntu amabula 4 na 5, nangu amaparagrafu 1 ukushinta ku 3 mu cipandwa 3. Nangu kuti mwalanda ukuti, “Ilyo nkabwela, kuti cawama tukeselanshanya pa busesemo bwa mu Baibolo ubulefikilishiwa muno nshiku.” Nga mwabwelelako, langeni uyo mwalanshenye nankwe icipandwa 9 mu citabo no kulanshanya amaparagrafu 1 ukufika ku 3. Nelyo kuti mwabeba fye ukuti: “Abantu abengi cilabakosela ukumfwikisha ifyo babelenga mu Baibolo. Ilyo nkabwela, nga mulefwaya nkamulanga ifyo mwingomfwikisha bwino Baibolo.” Ilyo mwabwelelako, balangeni icitabo ca ico Baibolo Isambilisha no kubalanga ifyo tusambilila Baibolo.
4 Ni mu Baibolo fye mweka e mwaba “amalembo ya mushilo,” ayaba na maka ya kutulenga ‘aba mano ayatwala ku kupusuka.’ (2 Tim. 3:15) Kanshi, shi ifwe bonse tukabombeshe ukushalika uyu Awake! waibela pa kuti tukafwe abantu abengi ukucetekela Baibolo!