Ifyo Mwingalanda

Pa Kutendeka Amasambililo ya Baibolo pa Cibelushi ca Kubalilapo mu June

Belengeni Esaya 42:8. Lyena landeni ukuti: “Ukulingana ne li lembo, Lesa alikwata ishina. Bushe batini calicindama ukubomfya ishina lya kwa Lesa? [Lekeni basuke.] Umfweni ifyebo fili apa.” Peeleni umwine wa ng’anda Ulupungu lwa kwa Kalinda ulwa June 1, kabili belengeleni capamo no kulanshanya ifyebo fili pa kamutwe ka kubalilapo pe bula 16. Shalikeni magazini, kabili panganeni ilyo mukabwelelako pa kuti mukayelanshanya icipusho cikonkelepo.

Ulupungu lwa kwa Kalinda June 1

“Ndefwaya ukumfwa ifyo mwingalanda pa lyashi limo ilyacindama. [Kupukuleni pe bula 3 no kubalanga umutande ulipo.] Bushe pali ifi ifilembelwe apa, ni fili kwi ifilelangilila bwino ifyo mumona Baibolo? [Lekeni basuke.] Umfweni ifyo Baibolo yalondolola ifyo yaba. [Belengeni Abena Roma 15:4.] Muli iyi magazini muli ifishinka fisano ifingamwafwa ukwishiba ico Baibolo yapusaninako ku mabuuku yambi ne fyo ingamwafwa.”

Loleni! April–June

“Abantu bamo nga bamona amafya yacilamo, bamona ukuti tapali ica kwikalila pa calo, kabili limbi kuti bafwaya no kuipaya. Bushe abantu ba musango uyu kuti bacita shani pa kuti beshibe ukuti balicindama? [Lekeni basuke lyena belengeni Amalumbo 147:3.] Takwaba umuntu uushikwata amafya pali lelo. Lelo icipande cili pe bula 16 muli iyi magazini ciletwafwa ukwishiba ifyo Baibolo ingatwafwa ukucindamika ubumi.”