Afweni Abantu Ukukutika Kuli Lesa
1. Mabroshuwa nshi ayafumine pa Kulongana kwa Citungu ukwaleti: “Ubufumu bwa kwa Lesa Nabwise!” kabili cinshi yawamina?
1 Pa Kulongana kwa Citungu ukwaleti: “Ubufumu bwa kwa Lesa Nabwise!” amabroshuwa yabili yalifumine. Imo yakwete umutwe uwaleti, Mulekutika Kuli Lesa pa Kuti Mukekale Umuyayaya e lyo na imbi umushaba sana ifyebo iitila, Mulekutika Kuli Lesa. Apo muli aya mabroshuwa tamwaba ifyebo ifingi, calyanguka ukuyapilibwila mu ndimi ishingi. Na kuba, ilyo aya mabroshuwa yalefuma mu ciNgeleshi, ninshi balisuminisha kale ukuti broshuwa ya Mulekutika Kuli Lesa pa Kuti Mukekale Umuyayaya ipilibulwe mu ndimi 431.
2. Ni bani bali no kunonkelamo muli aya mabroshuwa?
2 Ni bani bali no kunonkelamo sana muli aya mabroshuwa? Moneni ificitika ilyo tuleshimikila:
• Kasabankanya alelanshanya no mwine wa ng’anda pa muku wa kubalilapo nelyo abwelela ku muntu ashimikiileko, ilyo balelanshanya aishiba ukuti uyo muntu taishiba ukubelenga nelyo tabelenga bwino.
• Kasabankanya aleshimikila ku bantu abashakwata impapulo mu lulimi lwabo nelyo abakwata fye ishinono. Nangu limbi abengi mu cifulo ca kushimikililamo tabaishiba ukubelenga ululimi ulo baishiba ukulanda.
• Kasabankanya abomfya ululimi lwa bankomamatwi ukushimikila kuli bankomamatwi ababa mu cifulo ashimikilamo.
• Umufyashi alefwaisha ukulasambilisha umwana wakwe umunono Baibolo uushilaishiba ukubelenga.
3. Bushe broshuwa ya Mulekutika Kuli Lesa yalembwa shani?
3 Ifyo Bayalemba: Broshuwa ya Mulekutika Kuli Lesa tayakwata ifyebo ifingi, mwaba fye amashiwi ayanono ne Lembo pe samba lye bula limo na limo ilyalanda pa cishinka icikalamba. Mulandu nshi iyi broshuwa bailembela ifi? Tutile umuntu amupeela broshuwa iyalembwa mu lulimi ulo mushingabelenga iyalembwa mu filembo ifyo mushaishiba. Nangu ca kuti muli ifikope ifisuma, bushe kuti mwapoka? Nalimo te kuti mupoke. Abantu abashaishiba ukubelenga nabo tabafwaya impapulo umwaba ifyebo. E co muli iyi broshuwa mwabela sana ifikope ifisuma kabili mwaliba no twa kumulangilila ifyo fikonkene pa kuti cinganguka pa kulanshanya.
4. Bushe broshuwa ya Mulekutika Kuli Lesa pa Kuti Mukekale Umuyayaya yalembwa shani?
4 Ifikope ifyaba muli broshuwa ya Mulekutika Kuli Lesa e fyaba na muli broshuwa ya Mulekutika Kuli Lesa pa Kuti Mukekale Umuyayaya. Yalembelwe ukusambililamo na bashaishibisha ukubelenga nelyo na balesambilila ukubelenga. Uuletungulula isambililo kuti abomfya broshuwa ya Mulekutika Kuli Lesa pa Kuti Mukekale Umuyayaya ilyo alesambilisha umuntu muli broshuwa ya Mulekutika Kuli Lesa. Pe bula lya kuso pe sambililo limo na limo paliba icipusho. Kuti mwasanga icasuko mwi sambililo ilyo line. Pa fikope paliba ne fyebo e lyo na malembo. Pa mabula ayengi paliba akabokoshi pe samba ku kulyo nelyo ku kuso umwaba ifyebo na fimbi, umusambi nga kuti aumfwikisha kuti mwalanshanya ifi fyebo na Malembo.
5. Ni lilali twingapeela abantu aya amabroshuwa kabili kuti twalanda shani pa kubapeela?
5 Ifya Kubomfya aya Amabroshuwa: Kuti mwapeela abantu aya amabroshuwa ilyo muleshimikila ku ng’anda ne ng’anda nga mwamona ukutila kuti ya-afwa abo mulelanda nabo. Kuti mwabashiila nangu ca kuti te mabroshuwa mulepeela abantu muli uyo mweshi. Ilyo mwabwelela ku bo mwalanshenye nabo, kuti mwabeba ukuti namubaletelako fimo ifyo mulefwaya ukubapeela, lyena kuti mwabapeela.
6. Bushe tukalacita shani pa kutungulula amasambililo ya Baibolo muli aya mabroshuwa?
6 Apo muli broshuwa ya Mulekutika Kuli Lesa tamwaba ifipusho, nga muletungulula isambililo tamwakaleipusha ifipusho nga filya mucita pa kutungulula isambililo mu citabo ca Ico Baibolo Isambilisha. Mu ncende fye shonse abantu balatemwa ukubashimikila amalyashi. Kanshi mulebomfya ifikope pa kushimika amalyashi ya mu Baibolo. Londololeni ifili pa fikope kabili ilyo mulelondolola mulecincimuka. Kuti mwaeba umusambi ukulanda ifyo alemona pa fikope ne fyo aletontonkanya. Belengeni amalembo ayali pa mpela ye bula no kulanshanya no musambi ifyo aya malembo yalelandapo. Ipusheni umusambi ifipusho pa kuti alelandapo na pa kuti mwishibe nga naumfwikisha ifyo mulesambilila. Nga ca kuti umusambi alebomfya broshuwa ya kuti Mulekutika Kuli Lesa pa Kuti Mukekale Umuyayaya, belengeleni pamo ifyebo na malembo ilyo mulelanshanya pa cikope cimo na cimo.
7. Kuti twa-afwa shani umusambi uwa Baibolo ukulunduluka?
7 Afweni Abasambi Ukulunduluka: Tulesubila ukuti ifyo mukalalanshanya no musambi fikalenga akalefwaisha ukusambilila ukubelenga pa kuti akaleisambilisha pali Yehova. (Mat. 5:3; Yoh. 17:3) E ico, nga mulebomfya broshuwa ya Mulekutika Kuli Lesa, e lyo mwamona ukuti umusambi kuti asambilila ukubelenga, kuti mwamusambilisha ukubelenga, kabili kuti mwatendeka ukusambilila nankwe muli broshuwa ya Mulekutika Kuli Lesa pa Kuti Mukekale Umuyayaya. Nomba ico mufwile ukwishiba ca kuti nangu mwapwisha ukusambilila muli aya mabroshuwa umusambi te kuti afikepo ukubatishiwa. Nga mwapwisha ukusambilila muli aya mabroshuwa kuti mwatendeka icitabo ca Ico Baibolo Isambilisha nelyo ulupapulo lumbi ulwingafwa umusambi ukumfwikisha ifyaba mu Baibolo.
8. Mulandu nshi mwingatashisha pali aya mabroshuwa aya kubomfya mu mulimo?
8 Abantu balingile ukukutika kuli Mulopwe uwabumba ifintu fyonse pa kuti bakekale umuyayaya. (Esa. 55:3) Kabili Yehova afwaya ukuti “abantu balekanalekana,” na bashaishiba ukubelenga nabo balekutika kuli ena. (1 Tim. 2:3, 4) Tulatasha sana pali aya mabroshuwa ayatwafwa mu kusambilisha abantu ukukutika kuli Lesa!