Amabroshuwa—Ifisolobelo Fyakatama Ifya mu Butumikishi
1 Intukushi yalamuka ilingi line isenda ifisolobelo fyalekanalekana, cimo na cimo icapekanishiwilwa umulimo wa kulungatika. Pamo nga bakabilisha ba Bufumu, twalikwata amabroshuwa yalekanalekana ku kutwaafwa mu kulamuka ukukumanisha ukukabila kwa bantu tushimikilako. (Amapi. 22:29) Pa mwinshi umo kuti pambi wakumanya umuntu umo uuli uwapopomenwa. Pali umbi mwine ŋanda alefuluka kamfulumende wa bufumacumi, ilintu umuntu umbi alelanguluka nga ca kuti kwalibako imifwaile iili yonse mu kuba uwa mweo. Ni shani fintu twingabomfya amabroshuwa yesu ku kwaafwa aba bantu?
2 Lintu uletambika broshuwa wa “Bushe Lesa mu Cituntulu Alatusakamana?,” kuti pambi wasosa ifyapale fi:
◼ “Abantu bamo abamona ukucula no lufyengo mu calo bakongamina ku kupeela Lesa umulandu. Bapelulula ukuti apantu Lesa wa maka yonse, kuti apwisha ukucula kwesu nga ca kuti mu cituntulu alatusakamana. Ni shani fintu muyumfwa pa lwa ico? [Suminisha ukwankulako.] Ilumbo 72:12-14 lilanga ukuti Lesa mu cine cine alatusakamana. Ukucula no lufyengo tafyaba mulandu wakwe. Alilayo kuti incitatubi mu kwangufyanya shikafumishiwapo. Uyu broshuwa, Bushe Lesa mu Cituntulu Alatusakamana?, alelanga cintu akacita na fintu twinganonkelamo.” Kuti pambi watwalilila ukulanshanya mu kuba no kulandapo pe bula 27, paragrafu 22.
3 Nga ca kuti ulebomfya broshuwa wa “Imifwaile ya Bumi,” nakalimo kuti wafwaya ukutendeka muli iyi nshila:
◼ “Mu kupelako, mupepi no uli onse alapapa pa lwa mifwaile ya bumi. Bushe kwikala fye imyaka 70 nelyo 80 kabili lyene ukufwa? Nelyo bushe kwaliba ifyafulilako ku bumi? Cinshi muletontonkanya? [Suminisha ukwankulako.] Pano pa Ilumbo 37:29, tulemona imifwaile ishaiwamina iya kwa Lesa ku muntu ne sonde.” Pa numa ya kubelenga ilembo, alukila ku cikope pe bula 31, kabili landapo mu kulundapo pa lwa fintu cikaba ukwikala mu Paradise.
4 Broshuwa wa “Moneni!” kuti alondololwa pa kulangisha icikope ca pa nkupo conse no kwipusha ati:
◼ “Cinshi muletontonkanya cikabilwa ukulenga isonde ukumoneka muli iyi nshila? [Suminisha ukulandapo.] Uuli onse muli ici cikope nakwata iŋanda no mulimo wa kuipakisha. Kuliko umutende ne fya kulya ifingi, kabili isonde talikwete ubukowesho. Te mulandu na fintu yengabombesha, amakamfulumende ya buntunse yalasanga cene ukuba icishingacitika kuli bene ukuletako icalo ca musango yu. Nangu cibe fyo, Baibolo ilatwebekesha ukuti Lesa ‘akalenge fintu fyonse ifipya.’ [Alukila kwi bula 30, kabili belenga Ukusokolola 21:3, 4.] Uyu broshuwa kuti amwaafwa ukusambilila cintu mukabila ukucita pa kwikala muli cilya calo cipya.” Nga ca kuti ubuseko bwakumanina bwalangwa, alukila kwi bula 3, no kulangilila fintu tutungulula isambililo lya Baibolo.
5 Napamo kuti wabomfya iyi mitununukile mu kuba na broshuwa wa “Ipakishe Ubumi pe Sonde”:
◼ “Abantu abengi batontonkanya ukuti bafwile ukuya ku muulu pa kuti bengaipakisha ubumi bwa muyayaya, lelo cinshi mwingatontonkanya pa lwa kwikala pe sonde kuli pe na pe? [Suminisha ukwankulako.] Baibolo itwebekesha ukuti ubumi bwa ciyayaya kuti bwacitikako, kabili itweba fintu twingafika pali ubo buyo.” Belenga Yohane 17:3. Lyene langa mwine ŋanda icikope calenga 49, no kwipusho kuti: “Bushe kuti mwatemwa ukwikala mu calo capala ici?” Tambika broshuwa, kabili tantika icipempu ca kubwelelamo.
6 Amabroshuwa yalangisha imitwe yalingana ne nshita, yasuka ifipusho fya bantu, kabili yapeela icisansamushi. Ukubomfya ifi fisolobelo mu kulamuka, kuti twaafwa abafumaluka “ukufika ku kwishibe Cine.”—1 Tim. 2:4.