Beni Bakasambilisha ba Cebo ca kwa Lesa—Ukubomfya AmaBroshuwa
1 Umubomfi wa kwa Yehova onse uwaipeela alikwata icishingamo ca kwakana mu mulimo wa kusambilishako bambi Icebo ca kwa Lesa. Ukukakala kwa ici cishingamo kumonekesha lintu twatesekesha ukuti uwakwata amaka yonse mu muulu na pe sonde e watutuma ati “kalengeni aba nko shonse ukuba abasambi, . . . mulebasambilisha.” (Mat. 28:18-20) E co, ukwakana mu mulimo wa kushimikila imbila nsuma kufwaya ukuti tube bakasambilisha!—2 Tim. 2:2.
2 Mu August kuti twabomfya ukulamuka kwesu ukwa misambilishishe pa kutambika amabroshuwa. Kuti twasoobolamo amatontonkanyo ya kulengo buseko ayashimpwa pa Malembo no kupekanya ukulandapo kunono ukukaafwa ukubalamuna ukulanshanya.
3 Pa kutambika broshuwa wa “Bushe Lesa mu Cituntulu Alatusakamana?” kuti wasoso kuti:
◼ “Natutandalila abena mupalamano benu abengi kabili tusangile fyo bali abasakamikwa pa kufulisha kukalamba ukwa misoka, ubupondo, no lukaakala. Bushe imwe mulemono kuti mulandu nshi ici cibelele mpika yakulishe fi? [Leka asuke.] Kuli ifwe cilebalamuna ubuseko bwaibela pantu na Baibolo yalisobele ukuti ici cali no kucitika. [Belenga 2 Timote 3:1-3.] Moneni ukuti ici cili no kucitika mu ‘nshiku sha kulekelesha.’ Ici ciletubulula ukuti icintu cimo cili apepi no kupwa. Muleti cintu nshi ico cine?” Leka asuke. Kabiye kwi bula 22, no kumulangisha icikope, kabili lanshanyeni ilembo limo nelyo yabili ayambwilwe pali ili bula. Panganeni pa kuti ukabweleleko pa numa ku kulondolola umulandu twasuminina ukuti aya mapaalo nayapalama.
4 Kuti pambi watemwa ukubomfya imitununukile iyi pa kutambika broshuwa wa “Cinshi Caba Imifwaile ya Bumi—Ni Shani Fintu Wingaisanga?”:
◼ “Abantu abengi balasanga ubwafya mu kwesha ukusanga icaba imifwaile ya kubela uwa mweo. Ilintu bamo bamo balaipakishako insansa eyefilya, ubumi bwa bengi bwaisulamo ukulengwe nsoni no kucula. Bushe muletontonkanyo kuti e fintu Lesa afwaile ati tuleikala? [Leka asuke.] Baibolo ilangisha ukuti Lesa afwaya ukuti tuleikala mu calo icaba nge ci.” Sonta ku cikope pe bula 21, kabili lyene kabiye ku mabula 25 na 26, amaparagrafu 4-6, no kulondolola cintu alaya. Imya icipusho ca kuti: “Kuti twashininkisha shani ukuti Lesa akafikilisha amalayo yakwe?” ico muli no kulanshanyapo ilyo ukabwelelako.
5 Kuti pambi watambika broshuwa wa “Ipakishe Ubumi pe Sonde kuli Pe na Pe!” ukupitila mu kulangisha icikope conse ica pa nkupo ya pa ntanshi na ku numa no kwipusha auti:
◼ “Bushe kuti mwatemwa ukwisaikala mu calo caisulamo abantu ba nsansa nge ci? [Leka asuke.] Baibolo itwebo kuti Lesa alitemwa abantu kabili abafwaya ukuti bakekale kuli pe na pe mu nsansa pali lino line isonde.” Kabiye ku cikope calenga 49, no kubelengapo ilembo pa Malembo yaloshiweko. Lyene, sonta pa cikope calenga 50, no kulondolola ico tufwile ukucita nga tulefwaya ukwikala muli uyu Paradise. Mwebe fyo kuti waitemenwa ukubwelelako no kulanshanya pa mulandu icitetekelo muli Yesu Kristu cabela icakatama nga nshi.
6 Yehova alatemunwa lintu twalenga ‘ukulunduluka kwesu ukumoneka ukupitila mu kuimona fwe bene ne sambilisho lyesu.’ (1 Tim. 4:15, 16) Amabroshuwa yesu kuti yaba kwaafwa ukwine kwine ku kubombesha kwesu ukwa kwaafwa abo balefuluka ukumfwe “mbila nsuma.”—Esa. 52:7.