Ifyo Mwingalanda

Pa Kutendeka Amasambililo ya Baibolo pa Cibelushi ca Kubalilapo mu April

“Tulekoselesha abena mupalamano besu ukulabelenga Baibolo. Lelo abantu abengi batontonkanya ukuti ifyaba mu Baibolo fyalyafya ukumfwa. Bushe na imwe e fyo mutontonkanya? [Lekeni basuke.] Moneni ifyo iyi magazini ilelanda.” Langeni abo mulelanda nabo ifyebo ifili ku numa ya Ulupungu lwa kwa Kalinda ulwa April 1, kabili belengeleni capamo no kulanshanya ifyebo ifili pa cipusho ca kubalilapo no kubelengeko nangu fye ilembo limo. Shalikeni magazini, no kupangana ilyo mukabwelelako pa kuti mukayelanshanya icipusho cikonkelepo.

Ulupungu lwa kwa Kalinda April 1

“Abantu abengi abo tulanda nabo balikwata amafya. Pa mulandu wa mafya abantu bakwata, cilenga baletwishika nga kwaliba umulandu abantu bafwile ukubela abomi. Bushe kuti mwatila bwafya nshi ubukalamba ubulenga abantu ukukaanaba ne nsansa pali ino nshita? [Lekeni basuke.] Mu Baibolo Lesa alilanda ukuti akafumyapo amafya tukwata pali ino nshita. [Belengeni Ukusokolola 21:4.] Iyi magazini ilelanda pa fyo Lesa alaya ne fyo twingasanga insansa nangu fye ni pali ino nshita.”

Loleni! March–April

“Shino nshiku caliseka ku bantu ukukuka ukuya ku calo cimbi pa kuti bayeikala bwino. Bushe muletontonkanya balasanga ifyo bafwaya? [Lekeni basuke.] Ukukuka ukuya ku calo cimbi takwatendeka nomba. Moneni ici ca kumwenako ca mwi buuku lya kubalilapo ilya mu Baibolo. [Belengeni Ukutendeka 46:5, 6.] Iyi magazini ilelanda pali ifi fipusho.” Langeni abo mulelanda nabo icipusho icili pa mpela ye buula 6.