Muleshalika Magazini ya Kale

Mu nshita ya kulasunga fye magazini ya kale nelyo ukuipoosa, kuti cawama ukulapeela abantu ilyo tuleshimikila. Magazini fye imo kuti yalenga umuntu ukufwaya ukusambilila icine no kwisaba umubomfi wa kwa Yehova. (Rom. 10:13, 14) Ifi e fyo mwingalacita pa kushalika magazini ya kale:

• Nga muleshimikila mu ncende umo mushishimikila sana, e lyo mwasanga pa ng’anda apashili abantu, kuti mwasha magazini ya kale apa kuti abapita nshila te kuti baimone.

• Nga mulebomba ubunte bwa mu lyashi mu cifulo umwaba ifitesheni fya basi nelyo ifye shitima, kuti mwaipusha umuntu amuti: “Bushe kuti mwafwayako ifya kubelenga?” Lyena kuti mwabalanga magazini ya kale iyapusanapusana no kubeba ukusalapo iyo balefwaya.

• Nga mu cifulo mushimikila mwaliba ifipatala nelyo amayanda basungilamo abakote, kuti mwasha magazini ya kale palya abalwele balolelela ukumona badokota nelyo apa kuti uuli onse kuti aisenda no kubelenga. Ilyo mushilasha magazini, kuti cawama mwatala mwaipusha ababombela pali ico cifulo nga cili fye bwino ukushapo magazini iya kuti abantu balebelenga. Nga ca kuti mwasanga pali kale magazini, tamulingile ukubikapo imbi.

• Nga muleipekanya ukuya ku fipempu, muletontonkanya na pa lyashi cila muntu engatemwa ukubelenga. Bushe abo mulepanga ukuyamona balikwata ulupwa? Bushe ni balya abatemwa ukutandalila ififulo fyalekanalekana? Bushe balitemwa ifya kulimbalimba pamo nga amaluba e lyo ne fintu fimbi? Nga mwaishiba bwino ifyo batemwa, fwailisheni ilyo ilyashi muli magazini ya kale no kuyabalanga lintu mwabatandalila.

• Kwaliba abantu bamo abatemwa ukubelenga impapulo shesu, lelo ilingi nga twaya mu kubamona tatubasanga. Nomba ubushiku twasanga abantu ba musango uyo kuti cawama ukubalanga magazini ya kale yonse iyo tukwete pa kuti basalapo iyo bashapokelele.