Inyimbo Ishipya Isha Kubomfya pa Kulongana!
1 Pa 4 October 2014, kwali ukukumana ukubako cila mwaka ukwa kabungwe ka Watch Tower Bible and Tract Society of Pennsylvania, kabili babilishe ukuti bali no kutendeka ukupituluka mu citabo ca nyimbo. Ala caliweme icine cine! Bonse abaliko balibacinkwileko ukuti inyimbo sha Bufumu shalicindama mu kupepa kwesu.—Amalu. 96:2.
2 Nalimo kuti mwapapa amuti, ‘Mulandu nshi balepitulukila mu citabo ca nyimbo?’ Kwaliba imilandu iingi. Umulandu wa kubalilapo wa kuti, ifyo twaishibe Amalembo filaya filealuka, e ico amashiwi yaba mu nyimbo nayo yafwile ukwalulwa. (Amapi. 4:18) Umulandu na umbi wa kuti: Amashiwi yaba mu citabo ca nyimbo ico tubomfya pali nomba yafumine muli Baibolo ya mu ciNgeleshi iya kale iya Amalembo ya Calo Cipya. Kanshi amashiwi yaba mu nyimbo yafwile ukwalulwa pa kuti yalingane na mashiwi ayaba muli Baibolo iya mu ciNgeleshi iyapitulukwamo. Pa mulandu wa kuti uyu wali mulimo uukalamba icine cine bapingwilepo ukuti muli ici citabo icipya bakabikamo ne nyimbo ishipya ishinono.
3 Bushe tukalolela ukuti icitabo cikafume e lyo tukatendeke ukubomfya ishi nyimbo ishipya? Awe. Tuli aba nsansa ukumwishibisha ukuti imyeshi ikonkelepo, ishi nyimbo ishipya bakashibika pa Webu saiti yesu iya jw.org. Nga babika ulwimbo ulupya pa intaneti, ulo lwimbo elo tukemba pa kwisalila Ukulongana kwa Mulimo kabili bakalatwishibisha ukuti ulu, “lwimbo ulupya.”
4 Ifyo Twingacita pa Kuti Tusambilile Ishi Nyimbo Ishipya: Tacanguka ukusambilila ulwimbo ulupya. Lelo, nga filya uwaimbile amalumbo acitile, na ifwe tulefwaya tukaleimba pa kulongana “ukwabula ukuleka.” (Amalu. 30:12) Pa kuti musambilile ulwimbo ulupya, esheni ukucita ifi.
Kutikeni imiku iingi ku lwimbo lwa pali piano ulo bakabika pa Webu saiti yesu. Nga mwakutikako imiku iingi cikamwangukila ukulalwibukisha.
Belengeni amashiwi yali mu lwimbo kabili esheni ukuyaswatila.
Imbeni ulwimbo ilyo piano ilelila. Bwekeshenipo imiku iingi mpaka mulwishibe.
Ilyo muli pa Mapepo ya Lupwa mulesambilila ifya kwimba ulwimbo ulupya mpaka bonse mu lupwa balwishiba.
5 Mu myeshi iileisa nga ulwimbo ulwalaisalila Ukulongana kwa Mulimo lwimbo ulupya, ninshi balabalilapo ukulisha ulwimbo lwa pali paino pa kuti bonse mu cilonganino bakutikeko. Lyena pa numa kuti bakonkamo ilyo icilimba cilelila nga filya ciba lyonse.
6 Ukwimba pa kulongana kwesu kulalenga tulelumbanya Yehova capamo. E mulandu wine ilyo tuli pa kulongana tushilingile ukuba ne cibelesho ca kufumina pa nse ilyo inshita ya kwimba ulwimbo yafika.
7 Kwaliba inshila na imbi iyo twingalangilamo ukuti twalicindika sana inyimbo shesu isha mushilo. Pa kulongana kukalamba no kulongana kwa citungu, balalisha inyimbo ishilangilila ukuti ukulongana kwalatendeka. Imiku ibili mu mwaka, bamunyinefwe na bankashi ukufuma ku ncende ishalekanalekana mwi sonde balailipilila indalama sha kwendela pa kuya ku Patterson, mu New York, pa kuti bayelisha inyimbo isho tubomfya mu kupepa kwesu. Kanshi, ceyamani nga alanda ukuti twikaleko mu fipuna no kukutika ku nyimbo isho aba bamunyinefwe ne nkanshi balisha, tulingile ukucita ifyo batweba. Nga twacita ifi, tukateyenya umutima wesu ku kukutika ku fyebo twakulasambilila.—Esra 7:10.
8 Pa mpela ya kulongana kwa lelo, twalaimba ulwimbo ulupya ulukwete umutwe uleti, “Ubufumu Buleteka—Nabwise!” Ulu ulwimbo balilwimbile pa kukumana ukubako cila mwaka, kabili ico baluleembela ni co ukutula apo Ubufumu bwatendekeele ukuteka napapita imyaka 100.
9 Ishi inyimbo ishipya “fisuma” ififumine kuli Yehova. (Mat. 12:35a) Shi natutendeke ukusambilila ishi inyimbo shipya no kulaimba ukufuma pa nshi ya mutima pa kuti tulelumbanya Lesa wesu no kumucindika!—Amalu. 147:1.