Mufwile Muleipekanya Sana pa Kuti Mulesambilisha Bwino

Pa tushita tubili utwapusana, Yesu balimwipwishe icipusho cimo cine icalelanda pa mweo wa muyayaya, lelo Yesu pa kwasuka aleyasuka ukulingana na ifyalekabila uwaleipusha. (Luka 10:25-28; 18:18-20) Na lyo line, nangu ca kutila kuti twaishiba bwino ifyo tuleya mu kusambilisha umusambi, tufwile ukulatontonkanya pali uyo musambi ilyo tulepekanya. Tufwile ukulayipusha ukuti: Fishinka nshi engafilwa ukumfwikisha nelyo ukusumina? Lilembo nshi pa malembo yalimo ilyo ningayabelenga no musambi? Bushe maparagrafu yanga mfwile ukuyasambilila na uyu musambi? Kuti twapekanyako icilangililo, ukuyalondolola ifyebo fimo, nelyo ifipusho ifyo twingayaipusha pa kuti umusambi omfwikishe ifishinka. Na kabili, apo ni Yehova e umesha imbuto sha cine isho tubyala mu mitima ya bantu, tufwile ukulapepa kuli Yehova ilyo tushilatendeka ukupekanya, ukupepelako umusambi no kuti Yehova engatupaala ilyo tuleyafwa umusambi ukulunduluka mu fya kwa Lesa.—1 Kor. 3:6; Yako. 1:5.