Mulebapokelela Bwino

Ni bani abo tufwile ukupokelela bwino? Bonse fye abesa ku kulongana, e kutila abatendeke fye ukulongana e lyo na batendeka akale. (Rom. 15:7; Heb. 13:2) Nalimo kuti aba ni munyinefwe uwafuma ku calo cimbi nelyo abaleka ukulongana no kushimikila pa myaka iingi. Nga cali ni mwe, bushe te kuti mutemwe umuntu amupokelela bwino? (Mat. 7:12) Kanshi muleposha abantu bonse abali pa Ng’anda ya Bufumu ilyo ukulongana takulatendeka na lintu mwapwisha ukulongana. Nga mulecita ifi, mukalatemwana kabili mukalacindika Yehova. (Mat. 5:16) Limo te kuti tulande na bonse abeshile mu kulongana. Na lyo line, bonse bakatemwa nga ca kuti natubabikako amano.a

Tatulingile ukulapokelela fye abantu ilyo tuli pa kulongana kwaibela pamo nga pa Cibukisho lelo tulingile ukulabapokelela lyonse. Ilyo tulelanga abapya ukuti twalibatemwa kabili balemona ne fyo fwe Bena Kristu twatemwana, bakatendeka ukulumbanya Lesa kabili bakesa na mu kupepa kwa cine.—Yoh. 13:35.