Bushe Kuti Mwa-asuka Ici Cipusho?

Bushe ifyebo fyaba pe libwe lya kale filanga shani ukuti ifyaba mu Baibolo fya cine?

MU CIKUULWA basungilamo ifya kale ico beta ukuti Bible Lands Museum icaba mu Jerusalem, mwaliba ilibwe apaba ifyebo ifyo balembele nalimo pa kati ka mwaka wa 700 na 600 ninshi Yesu talaisa pano isonde. Ili ilibwe balifumishe mu lucengo ulo baleshikamo abantu ulwaba mupepi no musumba wa Hebron mu calo ca Israel. Pali ili ilibwe paba amashiwi ya kuti: “Atiipwe Hagaf mwana Hagav kuli Yahweh Sabaot.” Bushe aya mashiwi yalanga shani ukuti ifyo Baibolo ilanda fya cine? Yalalanga ukuti ishina lya kwa Lesa ilya kuti Yehova, ilyo balelemba ukuti YHWH mu filembo fya ciHebere lyalishibikwe kabili balelibomfya sana mu nshita balelemba Baibolo. Na kuba ifyebo fimbi ifyo balemba mu ncengo baleshikamo abantu, filanga ukuti abalekumanina no kubelama muli ishi incengo balelemba sana ishina lya kwa Lesa ku fibumba, pamo na mashina ya bantu umwaleba ishina lya kwa Lesa.

Ba Dr Rachel Nabulsi aba pa University of Georgia balandile pali ifi fyebo ukuti: “Filya balelemba sana ishina lya kuti YHWH filatusambilishako ifintu ifingi. . . . Filalanga ukuti YHWH alicindeme sana ku bena Israele na baYuda.” Ifi ba Dr Rachel balandile filomfwana ne fyaba mu Baibolo pantu ishina lya kwa Lesa ilyo balelemba mu filembo fya ciHebere ukuti YHWH lilasangwa mu Baibolo imiku iingi nga nshi. Ilingi line mu mashina ya bantu mwaleba ishina lya kwa Lesa.

Amashiwi ya kuti “Yahweh Sabaot” ayo balembele pe libwe lya kale, yapilibula ukuti “Yehova wa mabumba.” Ici cilanga ukuti mu nshita balelemba Baibolo tabalebomfya fye ishina lya kwa Lesa, lelo balebomfya na mashiwi ya kuti “Yehova wa mabumba.” Ifi filomfwana ne fyo Baibolo yabomfya amashiwi ya kuti “Yehova wa mabumba,” ayasangwamo imiku ukucila pali 244 mu Malembo ya ciHebere, maka maka mu mabuuku yalembele Esaya, Yeremia na Sekaria.