Mulandu Nshi Inte sha kwa Yehova Bashisefeshako Inshiku sha Kufyalwa?
Fwe Nte sha kwa Yehova tatusefya inshiku sha kufyalwa pantu twalishiba ukuti uku ukusefya kulakalifya Lesa. Nangu ca kuti Baibolo tayalanda mukulungatika ukuti tatulingile ukulasefya inshiku sha kufyalwa, ifyo ilanda filalenga twaishiba bwino ifyaba muli uku ukusefya ne fyo Lesa akumona. Lekeni tulandeko pa fintu 4 e lyo na pa mashinte ya mafunde ya mu Baibolo yamo.
Ukusefya inshiku sha kufyalwa kwafuma ku bashalepepa Yehova. Ukulingana na Funk & Wagnalls Standard Dictionary of Folklore, Mythology, and Legend, uku ukusefya kwafuma ku cisumino ca kuti “kwaliba imipashi yabipa iinga sansa umuntu pa bushiku afyelwe no kuti “ukuba pamo ne fibusa pa bushiku afyelwe no kumweba amashiwi ayasuma kuti kwacingilila uyo muntu pa kuti tabamusanshile ku mipashi yabipa.” Icitabo citila The Lore of Birthdays citila ku kale ukulemba ubushiku umuntu afyalilwepo “kwalicindeme sana pantu ubushiku umuntu afyalilwepo ebo balebomfya pa kubukila ku ntanda,” balebelenga “ifikacitikila umuntu nelyo abantu ukubomfya amaplaneti na kasuba nga bafilinganya ku po fyabelele pa bushiku umuntu afyalilwepo.” Icitabo cimo cine calanda no kuti “amakandulo babomfya pa kusefya ubushiku bwa kufyalwa, kale basumine ukuti yalikwata amaka yakulenga ifyo umuntu alefwaisha fyacitika.”
Lelo Baibolo yalilesha ukucita ifinjelengwe, ukubuka imbuko, ukumfwana ne fibanda, nelyo “ifya musango yu.” (Amalango 18:14; Abena Galatia 5:19-21) Na kuba, cimo ico Lesa aonawilile umusumba wa Babiloni ni co abena Babiloni balependula ku ntanda, pantu na ko kwaba pa kubuka imbuko. (Esaya 47:11-15) Fwe Nte sha kwa Yehova tatufwailikisha fye ifyo ukusefya konse kwatendeke, lelo nga ca kuti Amalembo yalandapo fimo pa kusefya kumo, tatusuulako fye iyo.
Abena Kristu baliko mu nshita ya batumwa tabalesefya inshiku sha kufyalwa. Icitabo ca The World Book Encyclopedia citila, “baishibe ukuti ukusefya ubushiku bwa kufyalwa kwa muntu, lutambi lwafumine ku bantu abashalepepa Lesa wa cine.” Baibolo ilangilila ukuti ifyo abatumwa e lyo na bambi abo Yesu asambilishe balecita e fyo na Bena Kristu bonse balingile ukulacita.—2 Abena Tesalonika 3:6.
Abena Kristu tabalingile ukulasefya ukufyalwa kwa kwa Yesu, lelo balingile ukulaibukisha imfwa yakwe. (Luka 22:17-20) Baibolo itila, “ubushiku bwa mfwa bwawama ukucila ubushiku bwa kufyalwa.” (Lukala Milandu 7:1) Ilyo Yesu ali mupepi no kufwa ninshi alipanga kale ishina ilisuma na Lesa. Ici calengele ubushiku afwile bucindamepo ukucila ubushiku afyelwe.—AbaHebere 1:4.
Baibolo tayalandapo ukuti ababomfi ba kwa Lesa balesefya inshiku sha kufyalwa. Baibolo yalanda fye pa bantu babili abasefeshe inshiku bafyalilwepo kabili aba bantu tabalebombela Lesa. Lelo ifyacitike ilyo aba babili basefeshe inshiku sha kufyalwa tafyaweme.—Ukutendeka 40:20-22; Marko 6:21-29.
Bushe abana ba ba Nte balomfwa ububi ifi tabasefyako inshiku sha kufyalwa?
Nga filya fine abafyashi abasuma bonse baba, ba Nte nabo lyonse balalanga ukuti balitemwa abana babo, kabili balabapeelako ifya bupe, no kwangalilako pamo nabo. Balesha na maka ukupashanya Lesa uupeela abana bakwe ifisuma. (Mateo 7:11) Abana ba Nte sha kwa Yehova tabomfwa ububi, umfweni ifyo balanda:
“Cilomfwika bwino ukupokelela ubupe ilyo ushile-enekela ukuti balakupeela.”—E fyalandile Tammy, uuli ne myaka 12.
“Nangu ca kuti tabampeela ifya bupe pa bushiku na fyalilwepo, abafyashi bandi balampeela ifya bupe pa nshita shimbi. Nalitemwa ifi caba pantu bampeela ilyo nshile-enekela.”—E fyalandile Gregory, uuli ne myaka 11.
“Bushe mumona ukuti amamineti 10, amasikono ayanono, no lwimbo e fingalenga parte yawama? Mukese ku ng’anda ku mwesu mukesemona ifyo parte ilingile ukuba!”—E fyalandile Eric, uuli ne myaka 6.