“Bakomfwa Shani?”
1 Yesu alandile na maka ukuti: “Ne mbila nsuma ili no kubililwa kabela ku nko shonse.” (Marko 13:10) Nangu ca kutila tulebombesha, kucili imintapendwa ya bantu abashilati bashimikilwe. Amabuteko yamo yalalesha umulimo wesu. Ifyalo ifingi fyalikwata abantu abengi abaleya balefula nga nshi. E ico, “bakomfwa shani?”—Rom. 10:14.
2 Cetekeleni Yehova: Tufwile ukwibukisha ukuti Yehova alishiba ifyo imitima ya bantu bonse yaba. Te mulandu ne fyo umo aba, nga mu bufumacumi afwaya icine pa lwa kwa Lesa, akacisanga.—1 Imila. 28:9.
3 Abrahamu alisakamikwe pa lwa bekashi ba mu Sodomu na Gomora. Lelo Lesa amulaile ukuti takonaule Sodomu nga asangamo abalungami nangu fye 10. (Ukute. 18:20, 23, 25, 32) Yehova tatala onaula abalungami kumo na babi, nga fintu cali lintu alubwile Lote na bana bakwe abanakashi.—2 Pet. 2:6-9.
4 Inshita imo Eliya atontonkenye ukuti ni eka fye uwalebombela Lesa wa cine. Lelo, Yehova amwebele ukuti tali eka no kuti umulimo uo atendeke wali no kupwishishiwa. (1 Isha. 19:14-18) Ni shani pali ndakai?
5 Beni Abapamfiwa mu Mulimo wa kwa Lesa: Tatwishibe ubukulu bwa mulimo wa kushimikila uusheleko ukubombwa. Yehova e washingamwa no yu mulimo kabili bamalaika bakwe e bo abomfya ku kwangalila uyu mulimo. (Ukus. 14:6, 7) E waishiba apo umulimo wa kushimikila ku fyalo fyonse ukafika. Nga Yehova alefwaya, kuti amona ukuti ubukombe bwa Bufumu bwayananishiwa mu nshila isho tushingatontonkanyapo pa kuti abantu abengi “bomfwe icebo ca mbila nsuma . . . no kutetekela.” (Imil. 15:7) Ifyo Yehova acita fikomfwana sana na fintu aba, e kutila Lesa wa kutemwa, uwa mano, kabili uwa bulungi.
6 Lishuko lyesu ukubomba umwabela ukufwaya kwa kwa Yehova, ukufisha apo twingapesha pa kuti onse engomfwa imbila nsuma.—1 Kor. 9:16.