Kristu nge Cipasho ca Misepela

¹ Pa numa ya kulanshanya Baibolo mu kutantalila, umusepela walondolwele ukuti: “Nalipeshiwe amano ku cifyalilwa cabamo kushipa ica kwa Yesu Kristu. Wene ni ntungulushi iyo ningasuminamo.” Te kuti tusose fimo fine kuli politishani uuli onse nelyo impalume sha fyangalo ne fya kusekesha. Abena Kristu ba cine tabengapashanya abakakatila ku fipimo fya ku calo ne misango ya bumi iishili ya bwina kristu.—Ilu. 146:3, 4.

² Abacaice kuti baebekeshiwa ukuti lintu bacetekela Yesu Kristu, balailangisha abene nge mpaanga sha kwa Lesa kabili baleshibikwa kuli Yesu. Kacema Musuma alabasakamana. (Yoh. 10:14, 15, 27) Imisepela iikonka Kristu nge Cipasho cabo ilapaalwa.

³ Munyina umo uyo pali nomba abomba pa Bethel ya ku Brooklyn aimike ili shuko lya mulimo ngo buyo bwakwe ukufuma fye pa nshita aali ne myaka ya bukulu cinekonsekonse. Akoseleshiwe ukumona umulimo wa pa Bethel nge nshila ibomba iya kukonkelamo ica kumwenako ca kwa Kristu lintu akula. Abafyashi bakwe, pamo pene na bakangalila benda, balimwimikile ubu buyo. Pa kumwaafwa ukuipekanishisha, bamukoseleshe ukulabombesha kwati fye na o cilundwa ca lupwa lwa Bethel, ukulabombako utumilimo pa ŋanda, ukwaafwa ukuwamya Iŋanda ya Bufumu, no kulundulula ukulamuka mu butumikishi. Pa numa ya kuipakisha umulimo wa pa Bethel pa myaka iingi nomba, alatasha ukuti ilyo aalekula, alibombeshe ku kupashanya ica kumwenako ca kwa Kristu.

⁴ Yesu takonkelele umulimo wa ku calo; asalilepo ubutumikishi. Nkashi wacaice alefwaya ukubomba bupainiya lintu apwishishe isukulu lelo alekwinda pa mulandu wa kuti talesanga incito yalinga iya nshita lubali. Atwalilile ukutontonkanya ukuti: ‘Intanshi kankengile ncito, lyene nkatuma formu wa bupainiya.’ Eluda amulondolwelele ukuti nga akokola sana, incito ya kubomba akasuba konse yali no kumubeleleka, apantu taali na kukwata icili conse ica kumulesha ukwingila yene. Uyu nkashi ashimike ati: “Nalipepele kuli Yehova ukuti umupashi wakwe wingantungulula.” Ilyo line fye alilembeshe nga painiya wa kwafwilisha kabili pa numa abele painiya wa nshita yonse. Mu kwipipa, alisangile ncito yalinga iyo yamusuminishe ukutwalilila bupainiya.

⁵ Yesu abilishe ubukombe bwa Bufumu mu kushipa ku uuli onse. (Mat. 4:23) Abena Kristu bacaice na bo bene kuti basambilila ukuba abashipa mu kushimikila, ukukanaleka bambi ukubatiinya. Nte wa myaka ya bukulu 14 umo ashimike ukuti: “Bonse pa sukulu balinjishiba ngo Mwina Kristu. . . . Balinjishiba bwino ica kuti nga nakumanya uo tusambilila na o ilyo tuli mu butumikishi, nshiyumfwe nsoni. Ilingi line abasambi banandi balakutika, kabili imiku iingi balashitako impapulo.”

⁶ Ukulanguluke ca kumwenako ca kwa Kristu kuti kwaafwa abacaice ukupingulapo bwino pa lwa nshita yabo iya ku ntanshi. Mu cifulo ca kufimbilikishiwa ne fikonkelelo fya ku calo, ‘balebukisha Kalenga wabo Uwakulisha’ pa kulangisha ukupimpa mu mulimo wa kwa Yehova. (Luk. Mil. 12:1) Ukupala Kristu Yesu, balelundulula “ukutemwa Shifwe,” ukuletako amapaalo ayacilapo kucindama pa cili conse ico icalo cingatambika. Mu cifulo ca ‘kuya’ ne li sonde likote, kuti baenekela ‘ukwikalilila umuyayaya.’—1 Yoh. 2:15-17.