Jehovah’s Witnesses the Organization Behind the Name

PA OCTOBER 6, 1990, ibumba lya bantu mupepi na 5,000 abalongene mu Cikuulwa ca Kulongana Kukalamba ica Nte sha kwa Yehova mu Jersey City, New Jersey, U.S.A., ku kukumana kwa pa mwaka ukwa Watch Tower Bible and Tract Society baali mupepi no kupokelela icipapwa. Ceyamani, John E. Barr, aishibishe ibumba ulwa kukakulwa kwa tepu ya video iya maminiti 55 iya mutwe wa kuti Jehovah’s Witnesses—The Organization Behind the Name (Inte sha kwa Yehova—Ukuteyanya ku Numa ye Shina). Iyi yali e video ya kubalilapo iyabala aipangwa na Sosaite, lelo mu kushininkisha taili ya kupelako.

Iyi video ilangilila fintu abantu ba kwa Yehova baba abateyanishiwa ku kucitila ubunte kwi shina lya bulesa no kusabankanye “mbila nsuma iyi ya bufumu.” (Mateo 24:14) Icishinte cikalamba pa Brooklyn, New York, ne fibombelo pa Watchtower Farms fyalyebekeshiwa. Ukucila pa makope 500,000 mu ciNgeleshi yalipangwa, kabili nomba (nelyo mu kwangufyanya) e ko ili mu ndimi shimbi 26.a

Cinshi Caba Ukwankulako?

Ni shani fintu abantu bashili Inte sha kwa Yehova baankulako kuli video? Shimakwebo umo alembele ukuti:

“Nasangile tepu ukuba iya mibele yawamisha. Ukucilisha nalisendelwe nga nshi ku kubalabata ne mikopele yalamukisha. Nalikwete icibelesho ca kulaba ukuti yali ni tepu kabili natontonkenye ulwa yene mu kupalishako nga filimu ya ku calo. Iyi tepu ifwile mu kuibela ukuba iibomba mu kulondolola imifwaile ya cishinte cenu icikalamba ica New York. Shi mwabombeni kuli ici cibombelo ca kusungusha.”—J. J.

Abo basambilila Baibolo ne Nte sha kwa Yehova balinonkelamo pa kutamba iyi video. Ifyakonkapo filelondolola umulandu:

“Nsambilila Baibolo no mulumendo uuli ne myaka ya bukulu 20 kabili uusambilila pa universiti ya cikaya. Aliba uwasakamikwa pa lwa mibele ya calo iilebipilako. Lelo pa numa ya kutamba tepu no kumona balya bonse bamunyina bacaice bashaiwamina aba pa Bethel mu kuba ne mifwaile ya cine cine mu bumi, imibele yakwe yonse yalyaluka. Asangilwe ku Bushiku Bwa Kulongana Kwaibela kabili alipwishe ukulasambilila Baibolo imiku ibili mu mulungu. Umusambi wa Baibolo na umbi, kafundisha we sukulu lya ku sekondari, ayashime video ku kutambisha yene ku bantu bakwe. Batontonkenye ukuti Inte sha kwa Yehova bali fye kuteyanya kumo ukwa bunake, ukushatemwikwa, ukunono. Balipapushiwe pa musango wa mulimo wesu uwa mu cibulungwa no kutunguluka tulekwata, ca kutotela kuli Yehova.”—J. B.

“Amashiwi te kuti yalumbulule ubuseko buntu nayumfwile lintu umwanakashi untu nsambilila na o Baibolo apukile mu filamba fya buseko no kutasha pa numa ya kutamba iyi video. Asosele mu kuba ne filamba ukuti: ‘Ni shani fintu umo ashingamona ukuti uku e kuteyanya kwa kwa Lesa wa cine, Yehova? Nshabalile njishiba ukuti abantu ba musango yo e ko baali.’ Kabili lyene atile: ‘Ndefwaya ukubatishiwa.’”—C. D.

“Twalikwata ukutunguluka ukwingi pa kubomfya video mu kuba na basambi ba Baibolo. Ubushiku bwafumineko umulume wa umo uwa basambi ba Baibolo aba mukashi wandi alishile mu kutandala. Aali uukaanya apakalamba nga nshi. Alitambile video. Pa numa ya ico alipwishe ifipusho no kufuma kuno mu kuba na Baibolo ne citabo ce sambililo lya Baibolo ica Kuti Waikala Kuli Pe na pe muli Paradise Pe Sonde. Mu nshita yafumineko aali naoca shonse impampulo sha Baibolo isha mukashi wakwe!”—D. H.

Abacaice na bo bene balisanga video ukuba iya kucincimusha, nga fintu ukulandapo kwakonkapo kulangilila:

“Ndi ne myaka ya bukulu mutanda na citika. Nalitemenwe ulubali pa lwa maBaibolo na lintu ifibokoshi fyalepita mu ku kwankwanya.”—K. W.

“Abana besu abacaice batile yali iyacilapo ukuwama ukucila pali programu iili yonse iyo bamonapo pa TV.”—R. C.

“Pa numa ya kutamba video pa muku walenga ibili, umwana mwaume wesu uwa myaka ya bukulu isano, uwapeeleko ukusakamana mu kupulinkana, aipwishe ukuti, ‘Bushe kuti tuletamba lyonse?’ Umwana mwanakashi wesu uwa myaka ya bukulu itatu acilime ukuti, ‘Ndefwaya ukuya ku Bethel ku kupanga ifitabo!’”—M. E.

“Abana bandi, Robin na Shannan, aba myaka ya bukulu 12 na 9, balatamba iyi tepu libili libili. Umwana mwanakashi wandi kasuli pa numa ya kutamba tepu abilishe ukuti, ‘Nalitemwa ukuya mu mulimo wa mwi bala. Ca kusekesha nga nshi.’ Tuleyumfwa ukuti iyi video yalikwata ukusonga kwa kulungatika pa bumi bwa lupwa lwesu. Fintu cili ica kupembesula ukwisula programu ya televisioni intu uleyumfwa uwacingililwa ukutamba!”—N. B.

“Ndi ne myaka ya bukulu 131/2. Iyi video ipya yanengele ukumwensekesha ifyo nsendela mu kabepekesho ukupayanya kwa kusungusha ukufuma kuli Yehova. Lishuko ukuba umo uwa bantu ba kwa Lesa.’”—K. W.

“Ndi ne myaka ya bukulu 16, kabili iyi video yalingafwa ukupampamika mu muntontonkanya wandi ukuti uyu mulimo uulecitwa wa cibulungwa conse.”—A. M.

“Abana besu balandilepo ukuti ukutamba TV ukwa lyonse kwalufishe ukwipukisha pamo nge ca kufumamo ca kumona ifya kusekesha fya cine cine ifya teokratiki ifintu fingaba. Na kabili yalikosha ukufwaisha kwabo ukwa kwingila mu mulimo wa nshita yonse.”—L. M.

Nangu fye ni abo ababa Inte sha kwa Yehova pa myaka iingi baliseshiwe ku cintu bamwene.

“Nga ca kuti video ingasha ukwebekesha kwa musango uyo pali ifwe pamo nge Nte sha kwa Yehova, ni shani fintu ingambukila bambi? Lintu iyi micitile ya fintu yaba iyacilapo ukwafya ukubomba na yo, nsendako iawala limo ilya nshita yandi no kutandalila Bethel mu cisansamushi ca muputule wandi uwa kwikalamo!”—K. B.

“Pa numa lintu namwene ukusakamana no kulungamika kubikwa mu mulimo onse, nafwaile ukuya mu muputule wandi no kufukatila ifitabo fyandi ifya Baibolo.”—L. P.

Tulekukoselesha, na iwe wine, ukubuulako inshita ukutamba video Jehovah’s Witnesses—The Organization Behind the Name. Ikakupeela ukulingulula kwapusanako pa bumi kabili ikakwaafwa ukukwata ukucetekela mu nshita ya ku ntanshi iya mutelelwe.

[Futunoti]