Ukupoka Penshoni—Bushe Mwinshi Uwisula Imibombele ya Teokrasi?
UKUPOKA penshoni—ku bengi e papwila iciputulwa ca nshita icalepa ica kukanshika no kukalifiwa. Pa numa ya kufimbilikishiwa mu mibombele yaswangana nelyo iya kulenga ukufunshika, abengi benekela ukukwata umwinshi waisuka uwa kupoka penshoni pa kuti bengengila mu myaka ya kucibondola no buntungwa bwa pa lwabo. Ilingi line, nangu ni fyo, uyo mwinshi utungulula ku citendwe no bunaŋani. Ukukokoloka ne fya kuleseshamo icitendwe tafingapeela nangu fye panono ukuyumfwa kwa muntu ukuti alicindama nga fintu incito imulenga ukuyumfwa.
Ku Nte sha kwa Yehova, ukupoka penshoni kuti kwaisulo “mwinshi ukalamba kabili uwa kubombeshamo.” (1 Abena Korinti 16:9) Nangu cingatila umushinku watantalila waliba na mafya ya mu wine weka no kupelebela kwa uko, aba cikalamba bamo balisango kuti mu kuba no kwaafwa kwa kwa Yehova kuti baingilishako umulimo wabo kuli wene. Langulukeni ifyo Abena Kristu ba cikalamba bamo mu Netherlands baakumanya. Mu mwaka wa mulimo uwa 1995, 269 aba muli bapainiya (bakabilisha ba Bufumu aba nshita yonse) abacila pali 1,223 baali ba mushinku wa myaka 50 nelyo ukucilapo. Pali aba, 81 baali ne myaka ya bukulu 65 nelyo ukucilapo.
Bamo baliba na maka ya kucita bupainiya pa kutwalilila fye no musenselo uyo wine baimike lintu baalebomba incito. (Linganyeniko Abena Filipi 3:16.) Umwina Kristu umo uwapoka penshoni uwe shina lya Karel ebukisho kuti: “Ilyo nalebomba incito yandi iya ku mubili, naletendeka pa 07:30 hrs. Ilyo napokele penshoni, napingwilepo ukutwalilila ne mibombele imo ine. Naletendeka akasuba ukupitila mu kubombako ubunte bwa mu musebo ubwa magazini pa ntanshi ya citesheni ce shitima cila lucelo pa 07:00 hrs.”
Ukupaanga mu kusakamana fintu uli no kucita na ko kulalenga ukutunguluka. (Amapinda 21:5) Ku ca kumwenako, bamo baliba na maka ya kusungako indalama shalinga isha kuyafwilishishamo abene mu butumikishi. Bambi balipingulapo ukucefyako ifya kushitashita ifyo bafwaya kabili balisange ncito ya nshita lubali. Langulukeni Theodore na Ann. Batendeke bupainiya ilyo fye baupene ukufikila lintu ukukakililwako kwa lupwa kwafwaile ukuti baleke ukucita bupainiya. Lelo umupashi wa bupainiya watwalilile ukuba uwacincila! Ilyo abana babo abanakashi balekula, lyonse bakoseleshiwa ukucitako bupainiya. Icacilapo kucindama, Theodore na Ann baliimike ica kumwenako, libili libili ukulabombako nga bapainiya ba kwafwilisha. Ilyo aba bakashana bakulileko, Theodore na Ann batendeke ukucefyako incito yabo iya ku mubili pa kuti bengalakwatako inshita ya mulimo wa mwi bala.
Pa numa lintu aba bana babo abanakashi baingile mu butumikishi bwa nshita yonse no kufuma pa ŋanda, Ann atendeke ukucita bupainiya. Kasuba kamo akoseleshe Theodore ukuleke ncito. Atile: “Ifwe bonse kuti twalacita bupainiya.” Theodore aishibishe abamwingishe ncito ulwa fintu alepanga. Calimusungwishe lintu umukalamba wakwe pa ncito amutambike ukumwaafwako ukupitila mu kumupeela incito ya nshita lubali, ukusoso kuti: “Ndetunganya ulefwaya ukubombela umukalamba obe uwa ncito uwaikala mulya [mu muulu] umulimo wa nshita yonse.” Theodore na Ann nomba baleipakisha ukucita bupainiya capamo.
Bamo batendeke ukucita bupainiya mu kwankula ku cabacitikile mu bumi. Imfwa yabamo akayofi iya mwana wabo umwanakashi no mwishikulu wabo mwanakashi yalengele abaupana babili aba cikalamba ukubika umutima ku nshila baalebomfeshamo imyaka yabo iyasheleko. (Lukala Milandu 7:2) Mu cifulo ca kufimbilikishiwa no bulanda, batendeke umulimo wa nshita yonse, uyo nomba baaipakisha ukucila pa myaka 8 iyapitapo!
Ca cine ukuti, cifwaya umupampamina uwine wine pa kutwalilila ukuba mu butumikishi bwa nshita yonse. Ku ca kumwenako, Ernst no mukashi wakwe, Riek, batendeke ukucita bupainiya mu kwangufyanya fye lintu abana babo bafumine pa ŋanda. Tapalepele sana pa numa ya ico uo aalebomba nankwe ubukwebo atambike Ernst incito ya cibwesha. Ernst ayaswike ati: “Twaliba no mwine wa ncito uwawamisha, kabili tatwingatemwa ukumusha!” Pa mulandu wa kuti Ernst no mukashi wakwe batwalilile mu “mulimo” wa kwa Yehova, amashuko yambi aya mulimo yalibesukiile. Babombele mu mulimo wa muputule ukucila pa myaka 20 kabili balitwalilila pamo nga bapainiya ukufika na lelo. Bushe balalilishika pa nshila ya kuipeela bulilambo? Inshita imo iyapita aba baupana balembele abati: “Nga caba kufwaya kwa kwa Yehova, mu myeshi itatu tulesubila ukukumanya imyaka 50 iya kuba mu cupo, iyo ilingi beta ukusefya kwa golde. Lelo mu kuba no kushininwa kwakumanina tuleti imyaka yesu iya golde iya cine cine yatendeke lintu twatampile ukucita bupainiya.”
Abengi basango kuti umwinshi uwa mibombele yaingilishiwako na kabili utungulula ku buseko bwaingilishiwako! Munyina umo uwatendeke ukucita bupainiya imilungu ibili pa numa ya kufika pa mushinku wa myaka 65 atila: “Mfwile ukusoso kuti nshatala nkumanyapo iciputulwa ca nshita mu bumi bwandi icaisulamo amapaalo yafumba nga fintu imyaka 10 iifumineko yali.” Abaupana babili abaacita bupainiya ukucila pa myaka 7 batila: “Cintu nshi cimbi ico abaupana aba mushinku wesu na ba mibele intu tulimo bengalacita? Ilingi tulasanga abapala ifwe mu cifulo ca kubombelamo—abaikala fye umutelelwe pa ŋanda, baleina fye, ukulakota, kabili abaumina. Uyu mulimo ulatusunga ukuba abatuntulu mu muntontonkanya na ku mubili. Lyonse tulaba capamo. Tulasekesha no kuipakisho bumi.”
Kwena, te bonse aba cikalamba ababa mu mibele iibasuminisha ukubombako bupainiya. Aba Bena Kristu kuti baebekeshiwa ukuti Yehova alatasha icili conse ico bali na maka ya kucita mu mulimo wakwe. (Linganyeniko Marko 12:41-44.) Ku ca kumwenako, nkashi umo uwalemana alishinshibikwa mu ŋanda iyo batenseshamo abalwele. Nangu cibe fyo, umwinshi wa mibombele ucili walimwisukila! Dokota amwipwishe ifyo acita pa kuleshako icitendwe. Ashimika ati: “Namwebele nati lyonse ndacepelwe nshita. Taishibe umo naloseshe. Namwebele nati ici caba ni pa mulandu wa kuti inshiku shandi shaisulamo imibombele ya kwikusha. Nshaba uwatalalilwa, lelo ndafwailisha ukumona ababa abatalalilwa no kwesha ukubebako cintu Lesa akwatila umutundu wa muntu.” Asupawila ilyashi pa kusoso kuti: “Ku muntu uuli ne myaka ya bukulu 80, te kuti usubileko ifingi sana. Mulempepelako pa kuti ningatungulula abengi kuli Yehova.”
Bushe imwe muli pa mushinku wa kupoka penshoni? Umwinshi uutwala ku kucibondola kuti waleta itunko nga nshi, lelo tawaba mwinshi uwa ku mapaalo ya ku mupashi. Langulukeni pa mibele intu mulimo mu kubamo ipepo. Kuti pambi cabe fyo kuti mwaingila pa mwinshi uutungulula ku mibombele yakulilako mu mulimo wa kwa Yehova.
[Ifikope pe bula 25]
Ukupoka penshoni kuti kwatungulula ku mibombele yaingilishiwako mu butumikishi