Isambililo 19
Ukubomfye Sukulu ku Kuwamyo Butumikishi bwa mwi Bala
1. Lintu tulepekanya malyashi yesu aya busambi, mifwaile nshi ye sukulu tulingile ukwibukisha?
1 Imo iya mifwaile ikalamba iye Isukulu lya Butumikishi bwa Teokrasi yaba kutwafwilisho kuba abacishapo kufumamo cimo mu butumikishi bwa mwi bala. Uleibukishe co lintu ulepekanya imbali wapeelwa. Ba uwasekelela te mu kunonka fye ukwishiba kweka, lelo na kabili ifyo wingabomfya uko kwishiba mu kushimikila kobe no kusambilisha mu butumikishi bwa mwi bala.
2. Ni shani fintu ukubelesha kwa malyashi ya busambi kufwile ukucitwa mu kuti wingapeelo bunte?
2 Bamo babomfya bwino mu kulungatika imbali bapeelwa mu kushibelesha pa ntanshi ya fibusa fyabo, abena mupalamano, bakafundisha ba ku sukulu, ifilundwa fya lupwa fishasumina na bambi abengakutikako. Ici cipwilikishe fintu fyafulilako. Umusambi kuti amono kwankulako kwa bambi kabili kuti ateululako ku kuwamye lyashi. Na kabili, ici kuti cabimbulo buseko bwa muntu umbi muli Baibolo lintu aumfwe fyebo fyakatama filepeelwa. Kuti cabe nshila ya kumulaalikilamo ku kusangwa kwi sukulu lya butumikishi. Abantu abengi baliletwa ku Ŋanda ya Bufumu muli iyi nshila. Nte umo mu Japan alepituluka mu lubali lwakwe lwa muli programu we sukulu lya butumikishi pa ntanshi ya cilundwa ce calici uyo atandalile ukutandala kwaibela. Umutwe wa lyashi lyakwe wali wa kuti “Abantu ba kwa Lesa bakambishiwa ukufuma muli ‘Babele.’” Namayo alangishe ubuseko no kusumina isambililo lya Baibolo.
3. Cinshi cikabimbula ukubomfya mu butumikishi bwa mwi bala ukwa fintu tumfwa mwi sukulu?
3 Tontonkanya mu kuba no mulimo wa mwi bala mu cilolwa. Mwi sukulu lya butumikishi ulomfwamo ifyebo fyawamisha ifyapaka, kabili ubwingi bwa fiko kuti fyabomfiwa mu kulungatika mu butumikishi bwa mwi bala. Pali programu tulanshanyapo ifyebo pamo nge milandu ya kusuminina Baibolo, ifyasuko ku fipusho fya pa fifundisho, ukufikilishiwa kwa masesemo ya Baibolo, ukulondololwa kwa malembo yamo, na fintu ifishinte fya Baibolo fingabomfiwa mu bumi bwesu ubwa cila bushiku. Fwayo kupanga mashuko ya mu nshita aya kubomfye fi fyebo mu mulimo wa mwi bala. Tauli na kulolela ukufikila umo akwipusha pa lwa fyene. Nga cingabe calinga, letako ifyebo iwe wine. Ici kuti cafwatike fyebo pa muntontonkanya obe kabili cikakulenga ukuba uwakondenkana mu butumikishi.
4. Ni shani fintu isukulu lingatwaafwa ukuwamyako ukubomfya kwesu ukwa Baibolo?
4 Ukubomfya Baibolo kwa mu kulungatika lwaba lubali lwapulamo ulwa mulimo wesu. Lelo bakasabankanya bamo cilabaafya ukukupukula pa malembo yalinga mu kwangufyanya. Bushe na iwe cilakwaafya? Nga ni fyo, isukulu kuti lyakwaafwa ukulunduluka mu kukosa. Shani? Konka cila kalanda mwi sukulu lya butumikishi mu kuba na Baibolo obe. Lintu kalanda abelenge lembo, lyonse fwaya lyene muli Baibolo obe wine. Ilyo ulefwaya amalembo libili libili, ukayeshiba bwino kabili ukeshiba ukwa kuyasanga. Icikabilwa kubelesha, kabili kuti wakwata uko kubelesha, te lintu fye wafumina mu butumikishi bwa mwi bala, lelo cila mulungu lintu ulesangwa kwi sukulu. Na kabili, kuti wamwenamo mwi sambililo ilicitwa na bakalanda bonse. Basoobolamo amalembo yacilapo kupulamo pa malyashi ayapeelwa kuli bene. Ilyo ulekonka bakalanda mulandu nshi te kushilila pe samba lya mbali sha mpikwe muli ayo malembo ayo ulecetekele fyo kuti wafwayo kuyabomfya mu butumikishi bobe? Limbi na kabili kuti wafwayo kuyalemba, pamo pene no mutwe wa lyashi, mu kati ka nkupo ya Baibolo obe. Muli iyi nshila ukacisango kube cayanguka ukubomfya fintu usambilila mu sukulu mu butumikishi bwa mwi bala.
5, 6. Ni shani fintu imitantikile ya cine cine ku malyashi yesu ikatwaafwa?
5 Lintu ulepekanye lyashi lyobe, ukusala kwasakamanisha ukwa mitantikile nako kukakwaafwa ukumwensekesha ubunonshi bufuma mwi sukulu mu butumikishi bobe ubwa mwi bala. Lintu cingacitika, bomfya imibele iyo mu cine cine ikumanishiwa mu butumikishi. Pa nshita shimo kuti limbi wasanga ukuti ilyashi lyobe lyampene ku mipeelele ya ku ŋanda ne ŋanda nelyo ubunte bwa mu lyashi. Pa nshita shimbi kuti pambi lyabe lingacilapo kubomba ngo kulanshanya kwa cipempu ca kubwelelamo. Nelyo nakalimo kuti kwaba kulanshanya ukukuulilwe ukushinguluka icishinka icingemako pe sambililo lya Baibolo ilya mu ŋanda. Lyonse tukuta ukulenge mibele ukube ya cine cine. Kuti wasansha ku lyashi lyobe ukuba ilya cine cine pa nshita shimo pa kuteyanya mwine ŋanda ukukaanya cintu ulesosa. Lyene kuti walangilila ifya kubomba ne yo mibele. Amalyashi ayampana ku mibele ya mu butumikishi bwa mwi bala tayalingile lyonse ukutwala ku kutunguluka kwa apo pene; caliba na kabili ca mutengo ukulanga ifya kubomba no kubulwo buseko.
6 Lintu wapeelwa ulubali lwa kuba mwine ŋanda, kuti nobe wamwenamo mu kwampana ku butumikishi bwa mwi bala. Bomfya ili shuko ku kwesha ukumfwikisha fintu abene mayanda batontonkanya, no mulandu bemisho kukaanya. Ukupange cikope kwa cine cine ukwa kwa mwine ŋanda wa musango yo, no kumone fyo umusambi abomba ne mibele, kukaafwo kukukansha ukuba uufumamo cimo mu butumikishi.
7. Pa kulunduluka lyonse, ni pa cishinka nshi pambi twingafwaya ukuwamya mu butumikishi bwesu mu kati ka mulungu?
7 Lintu ilyashi lishimpilwe pa Icitabo ca Kutungulula Isukulu lya Butumikishi bwa Teokrasi, bebeta ukufunda ukufuma ku mimwene ya kuwamyo butumikishi bobe, nampo nga bwa kufuma ku ŋanda ne ŋanda nelyo kumbi. Mulandu nshi te kucitile co ukube cishinka cikalamba ica kuwamishapo ubutumikishi bobe muli uyo mulungu? Ku ca kumwenako, lintu ilyashi lili pa lwa kufwaikwa kwa mutwe wa lyashi, ipushe we mwine nga imipeelele yobe mu butumikishi bwa mwi bala mu cituntulu ilakwato mutwe wa lyashi. Bushe ulaulengo kusoobokamo ica kuti abene mayanda mu cine cine balaupampamika mu muntontonkanya pa numa walanda na bene? Nga te ifyo, bombelapo muli uyo mulungu. Lyene, na kabili, kuti waumfwe fyebo ifibomba no kubelenga no kubomfya amalembo. Ilyo ulekutika kuli ili lyashi, bebeto kubomfya kobe ukwa malembo. Bushe uyabelenga kuli mwine ŋanda ukwabulo kuyalondolola? Ni shani fintu ukakanye fikomo mu mutwe obe wa lyashi? Ni shani fintu ufibomfya kuli mwine ŋanda? Ukubebeta kwa musango yo kuti kwakwafwilisha ukuwamyo kubelenga kobe no kubomfya kwa malembo. Bushe ilyashi lili pa kubomfye filangililo? Ni shani fintu wingawamyako mu kubomfye filangililo? Nelyo pambi ilyashi likaba pa kusambilisha pe sambililo lya Baibolo ilya mu ŋanda. Fwailishe nshila shobe ukumona fintu wingabomfye fyo fyebo ku kusambilisha mwi sambililo lyobe lya Baibolo ilya mu ŋanda, kabili cita cene mu mulungu wine uyo. Muli iyi nshila, ukalabomfye fyo usambilila mwi Isukulu lya Butumikishi bwa Teokrasi ku kuwamya ubutumikishi bobe ubwa mwi bala.
8. Ilintu tuli mu mulimo wa mwi bala, ni shani fintu mu kubamo bunonshi twingaifunda fwe bene?
8 Bebete mipeelele yobe. Mu sukulu ulomfwa lyonse ukufunda kupeelwa no kumona ubunonshi bwa kuko. Kangalila we sukulu limbi te kuti abe na iwe pa mwinshi mu butumikishi bwa mwi bala, lelo mulandu nshi te kupange cibelesho ca kulaifunda we mwine? Lintu wapwisho kulanda kuli mwine ŋanda kabili uleendo kuya ku ŋanda yakonkapo, ipushe auti: Cinshi nacilingo kucita pa kucishapo ukuba uwa kufumamo cimo? Ukwishibe ci nomba, nga ningamutandalila na kabili, cinshi ico ningacita mu kupusanako? Ukubebeta kwa musango yo limbi kuti kwakwaafwa ubo bwine bushiku, pantu limbi kuti wakumanye mibele yapalako pa ŋanda imbi. Nga wacipango kube cibelesho ukulabebete mipeelele yobe ilyo ulebomba, ukulunduluka kuti kwaba kwa lyonse. Kwena, lintu ulebomba na kasabankanya umbi, kuti waipusho munobe ukukupako imitubululo.
9, 10. Cinshi cingacitwa pa kukumana kwa kubelesha kwa pa ŋanda ku kutwaafwa ukubomfya mwi bala fintu tusambilila muno?
9 Inshila isuma nga nshi iya kuwamishamo ukufumamo cimo kwa mipeelele yobe yaba kupituluka muli yene na bambi, kabili lyene ukubebeta yene capamo. Kuti wacite ci mu kuba ne filundwa fya lupwa lobe lwine nelyo na bambi mu cilonganino. Leka bene babe nga bene mayanda, ukuletako ukukaanya kwaseeka. Lintu ukukaanya kwaimishiwa, bomba na kwene nga nawishibe fya kucita. Nga tawishibe, iminina kabili ipushe mitubululo ukufuma kuli abo abalipo. Lyene twalilila, ukubomfya imo iya mitubululo ipeelwe. Lintu mwapwisha, bebeteleni capamo ifyo icacicitwa cingabe ca kufumamo cimo. Ukukumana kwa kupitulukamo kwa musango yo pa ŋanda kuti kwaafwa ukuwamya imipeelele yobe, kabili kukupeela na kabili ishuko lya mu nshita ilya kuwamya ifilubo intanshi taulafumina mwi bala. Kuti kwakwaafwa ukutambulwila ifishinte ifisambililwa mwi sukulu ku butumikishi bwa mwi bala. Ibukisha, umutumwa Paulo atile abantu bakosoka ni abo “bakansho kulingulula kwabo pa kweshaesha ukupaatululo busuma ukubulekanya no bubi.” (Heb. 5:14) Inshila imo iya kunoona amaka ya kulingulula yaba ni mu kubomfya yene mu kukumana kwa kubelesha.
10 Isukulu lya Butumikishi bwa Teokrasi ni kumo kwa kupayanya kwa kwa Yehova kwabamo bukapekape ku kutukansha. Ilyo mu mukoosha tulesambilila no kubomfya amasambililo ya liko tukaba na maka ya kusosa pamo na kasesema ukuti: “Shikulu Yehova apeela kuli ine ululimi lwa basambilila, ulwa kwishibo kukosesha ku cebo uwapomponteka; ambuushisho kutwi ulucelo no lucelo, ku kuumfwa nga basambilila.”—Esa. 50:4.