Cinshi Mukasosa ku MuHindu?
1 Nalimo mwalishiba ukuti kwaliba abaHindu abengi abekala mu fyalo fyalekanalekana, na muno calo cesu mwine. Kanshi akashita kamo kuti mwakumanya umuHindu mu butumikishi. Nga mwalimukumenye, kuti mwalanshanya nankwe shani?
2 Ibukisheni Ifi Fishinka: Bamishonari abashimikilapo bwino ku baHindu batila tacikabilwa ukusoma ifisambilisho fyabo fyonse pa kuti mwingabashimikila bwino. Ilingi line balankulako bwino ku milandile yayanguka, ukubalondolwela icine mu mucenjelo. Balombeni ukuti mubalilepo ukulanda no mutwe wa lupwa. Nga asumina, kuti cayanguka ukushimikila kuli bambi aba mu lupwa lwakwe. Pa kutendeka pene fye, sengaukeni imilandile ilelanga ukuti mwaleta ubukombe ubwacindama ukucila ifyo mwine ng’anda aishiba, nelyo ukuti mulefwaya ukulanda nankwe pa lwa kwa Lesa wine wine eka nelyo pa lwa citabo cashila icakokwesha ukucila fyonse. Apo abaHindu abengi bamona kwati Baibolo citabo ca bena Amerika, kuti mwafumyapo umutunganya wabo pa kubalondolwela ukuti Baibolo taisambilisha ukuti abantu balingile ukutekwa na bamwisa nelyo ukuti imishobo imo yalicindama ukucila iibiye.
3 Bomfyeni Ifibombelo Fyalinga: Amabroshuwa yabili yalembelwa maka maka abaHindu. Iitila Why Should We Worship God in Love and Truth? e ko yaba mu ciGujarati ne ciPunjabi. Iya mutwe wa kuti, Our Problems—Who Will Help Us Solve Them? e ko yaba mu ndimi na shimbi 11 isha bena India. Yonse yabili e ko yaba na mu ciNgeleshi. Broshuwa ya “Moneni! Ifintu Fyonse Nafilenge Fipya” ne ya kuti Bushe Lesa mu Cituntulu Alatusakamana? na yo yene yalabomba bwino pa kushimikila ku baHindu. Broshuwa wa Cintu Lesa Afwaya ne citabo ca Ukwishiba na fyo fine kuti fyabomfiwa bwino ku kutungululamo amasambililo ya Baibolo.
4 Landeni pa Fintu Ifyo na bo Baishiba: Tacayafya ukulanshanya na baHindu pa fintu ifyo na bo baishiba. Basumina ukuti tuleikala mu nshita ububifi bufulile nga nshi kabili ukuti Lesa akafumyapo amafya yonse pano calo ukupitila mu kayofi kamo lyene pakesa inkulo ya fisuma. Mwamona fintu cinganguka ukwampanya ifi fisumino ku fintu Baibolo isambilisha pa lwa nshiku sha kulekelesha, ubucushi bukalamba, na pa lwa calo cipya. Apo abaHindu abengi baishiba ukuti ubumi bwaba ni nshita ya mafya ya mutatakuya, balatemwa ukulanda pa mikalile ya lupwa, ulukaakala ne fya kuicingilila, na pa cicitika nga twafwa. Pano pali imilandile ibili iyo pambi mwingeshako.
5 Nalimo umwaume uwaba no lupwa kuti atemwa ifi fyebo:
◼ “Ndetandalila abantu abasakamikwe pa lwa mikalile ya mu lupwa mu fyalo fyalekanalekana. Cinshi muletontonkanya icingekatanya aba mu lupwa? [Lekeni asuke.] Bamo balishibapo fimo ifyo amalembo ya baHindu yasosa pa lwa mikalile ya mu lupwa, lelo tabatala abalinganyapo fyene ku fintu Baibolo isosa pa lwa uyu mulandu. Nalatemwa ukulanshanya na imwe amashiwi yaba pa Abena Kolose 3:12-14.” Cilya mwabelenga ilembo, langeni mwine ng’anda icipandwa 15 mu citabo ca Ukwishiba no kumweba ati: “Kuti natemwa ukubelengako capamo na imwe ici cipandwa pa kashita akanono.”
6 Uwacaice nalimo kuti ayankulako bwino ku mashiwi ayapala aya:
◼ “Ukwabula no kutwishika walishiba ukuti Lesa e ko aba. Bushe kuti watila mifwaile nshi atukwatila?” Mulekeni asuke. Lyene belengeni Ukutendeka 1:28, no kulanda ati: “Mu ncende ishingi muno calo abantu baikala abatitikana kabili balacula. Bushe kuti watila Kalenga kuti atwafwilishako ukupwisha amafya yatucusha?” Nga mwaumfwa ifyo ayasuka, mulangeni ulupapulo lwingalinga.
7 Sangalaleni ku fya Kufumamo Fisuma: Umwaume wa myaka 22 umuHindu aile pali nkashi uwaleshimikila pa cisankano no kulomba ukulamusambilishako Baibolo. Umwaume atile palipitile ne myaka 8 apo aumfwilile ulya nkashi alelanshanya na banyina ifya mu Baibolo. Nangu cingati alitemenwe nga nshi ifyasuko fisuma ifya mu Baibolo ku mafya yacusha abantunse, banyina tabalefwaya ukusambilila kabili amwene ukuti acili mwaice sana, te kuti atendeke ukusambilila icine pa lwakwe. Apo nomba aali nakula, aalefwaya ukusambilila ifyalundwapo. Umulumendo taikete na ku cani. Mu nshiku fye 23, alipwile ukusambilila icitabo ca Ukwishiba, kabili imyeshi fye ine ukufuma apo akumanine na nkashi pa cisankano alombele ulubatisho!
8 Munyina umo atendeke isambililo no mwaume umuHindu uo akumenye mwi shitima. Umwaume alecula na mafya ya mu cupo. Kabili aali ni cakolwa. Ulya mwaume alisumine ukuti Nte akaye ku mwakwe no kulanshanya nankwe ukupanda amano kwa Baibolo pa lwa mikalile ya mu lupwa. Ifisambilisho fya mu Baibolo pa lwa mikalile isuma fyalimusekeshe, kabili alisumine ukulasambilila Baibolo. Atendeke ukusangwa ku kulongana capamo no lupwa lwakwe. Inshita imbi baaleshimikilako icine kuli balupwa na ku fibusa. Pali ino nshita, abantu 6 pali abo balipokelela icine!
9 Lesa afwaya ukuti ‘abantu [ba misango misango, NW] bakapusuke no kufika ku kwishibe Cine.’ (1 Tim. 2:4) E kutila na bantu bonse ababa mu mipepele ishili ya Bwina Kristu, ifili nga abaHindu, na bo bene bafwile ukupusuka. Nga mwalishibako abaHindu mu cifulo mubombelamo, esheniko ukubatandalila nomba line no kulanda na bo ukubomfya imitubululo ili muli cino cipande.